Ua Amata le Toefuataiga

Palamaira, Niu Ioka (1820): Sa nonofo iinei Iosefa Samita ma lona aiga. Sa o uma tagata o le aiga o Iosefa i lotu eseese, ma sa le iloa e Iosefa po o le fea lotu e auai i ai. Sa ia faitau i le Tusi Paia, “Afai ua leai se poto i so outou, ina ole atu ia i le Atua” (Iakopo 1:5).

O Le Vao Paia (tautotogo o le 1820): Sa tatalo Iosefa Samita ma ole atu i le Atua po o le fea ekalesia e auai i ai. Sa faaali mai le Tama Faalelagi ma Iesu Keriso ia te ia. Sa La fai atu ia te ia e le tatau ona auai o ia i soo se tasi o ekalesia. Sa La valaauina Iosefa e fesoasoani e toefuatai mai le talalelei atoa a Iesu Keriso i le lalolagi.

Potu o Iosefa (1823): Sa asiasi atu le agelu o Moronae ia Iosefa Samita. Sa ia ta’u atu ia Iosefa e uiga i papatusi auro sa i ai le talalelei atoa a Iesu Keriso. A o tautala Moronae, sa vaaia e Iosefa se faaaliga vaaia o le mea na tanumia ai papatusi.

O Le Mauga o Kumora (1827): Na tuuina atu e le agelu o Moronae ia Iosefa Samita papatusi auro i le Mauga o Kumora. Na maua foi e Iosefa ni meafaigaluega faapitoa sa tanumia faatasi ma papatusi. Na saunia i latou e le Atua e fesoasoani ia te ia e faaliliu ai papatusi. O papatusi na faaliliuina na avea ma Tusi a Mamona ina ia mafai ai e fanau uma a le Atua ona faitau Ana afioga.