Savali Faaleautaitai i le Eria
O Loo Matala Lagi
Na amata le Toefuataiga o le talalelei a Iesu Keriso i le 1820 ina ua fesili atu se tamaitiiti, o lē o le a avea ma Perofeta o Iosefa Samita, i le Atua po o le fea ekalesia e tatau ona ia auai. Talu mai lena taimi, ua toefuatai mai e faaaliga paia i le lalolagi upumoni faavae e uiga i le natura o le Atua, o Lana pule o le perisitua ma Lana fuafuaga mo le faaolataga o le tagata.
Ua aoao mai Peresitene Russell M. Nelson o loo faaauau pea le Toefuataiga i le asō o se faavae ola, ma faatupulaia o Le Ekalesia a Iesu Keriso o le Au Paia o Aso e Gata Ai.
I lenei savali, tatou te sailiili ai i nisi o aoaoga loloto a Peresitene Nelson e uiga i le Toefuataiga ma lona uiga ia i tatou ma le lalolagi.
O Le Toefuataiga o se Galuega Faifai Pea
I le 2020, na faalauiloa mai ai e Peresitene Nelson se folafolaga e faamanatu ai le 200 tausaga o le Uluai Faaaliga a Iosefa Samita. O loo molimau mai ai o loo faaauau pea ona faailoa mai e le Atua Lona finagalo e ala i faaaliga faifai pea:
Ua faamautu mai e lenei folafolaga e ala i le Toefuataiga, ua toe faailoa mai ai e le Atua Lona finagalo, tatala le lagi, ma saunia auala mo tagata uma e o mai ai ia Keriso.
“Matou te tautino atu ma le fiafia o le Toefuataiga folafolaina e agai i luma e ala i faaaliga faifai pea. O le a le toe tutusa lava le lalolagi, aua o le a ‘faaopoopoina [e le Atua mea uma] ia Keriso’ (Efeso 1:10).”
Na faasino Peresitene Nelson i lenei upumoni i le 2018 ina ua ia saunoa mai:
“O i tatou o ni molimau i se faagasologa o le toefuataiga. . . . Afai e te manatu ua toefuataiina atoatoa le Ekalesia, ua na o le amataga ua e vaaia. E tele atu isi mea o le a oo mai. . . . Faatali seia oo i le tausaga a sau. Ma le tausaga e sosoo ai. Ia taumafa au vaitamini. Ia maua sau malologa. O le a manaia.”
O Le Matafaioi Autu a Iosefa Samita i le Toefuataiga
I le 2021, sa molimau Peresitene Russell M. Nelson e faapea o le perofeta o Iosefa Samita “o le perofeta o le tisipenisione mulimuli lenei . . . o se molimau i le matafaioi taua a le Perofeta o Iosefa i le Toefuataiga e taua tele mo i tatou uma o loo folafolaina atu le talalelei a le Alii”
Sa ia faamatala mai:
“Matou te maofa i le ala na mafai ai e Iosefa ona ausia mea uma na ia faia i le taimi puupuu o lona soifuaga. O mea ofoofogia na ia ausia na mafai ona ia faia i le mana faavavega ma le mafaatusalia o le Atua Malosi Aoao, o le Alii o Iesu Keriso ma le tele o isi tagata faalelagi. . . .
“Na asiasia Iosefa e, pe sa vaaia i faaaliga, le toatele o perofeta ma agelu anamua. . . . E ala mai i nei aafiaga ofoofogia, na malamalama ai Iosefa e faapea o le malamalama faalelalolagi e itiiti pe a faatusatusa i le malamalama faalelagi.”
Ona valaaulia lea o i tatou e Peresitene Nelson e mafaufau i le sao o Iosefa Samita i lo tatou lava malamalamaaga o le talalelei toefuataina:
“O le tele o a tatou tusitusiga paia taua sa faaalia e ala mai i le Perofeta o Iosefa Samita. Ua tatou mauaina e ala mai ia te ia le tele o itulau o tusitusiga paia nai lo se isi lava perofeta.”
“E ala mai ia Iosefa Samita, na auina mai ai e le Alii tusitusiga paia na Ia silafia e talafeagai mo Ona soo ia malamalama i ai. Latou te aoao atu e faatatau i le fuafuaga faavavau o le fiafia a le Atua ma Lana ala o le feagaiga i le mamalu faavavau.”
Auai i le Galuega o le Toefuataiga
O le naunautai o lo tatou perofeta o Russell M. Nelson mo le Toefuataiga e le mafaafitia:
“E le mafai ona ou tautala e uiga i le Toefuataiga e aunoa ma le sagisagi fiafia. O lenei itu moni o le talafaasolopito e matua ofoofogia lava! E maoae! E faagaeetia! Pe le ofoofogia ea le o mai o avefeau mai le lagi e aumai le pule ma le mana mo lenei galuega?
“O le taimi nei, o loo agai i luma le galuega a le Alii i Le Ekalesia a Iesu Keriso o le Au Paia o Aso e Gata Ai i se tulaga faanatinati.”
O loo ia fautuaina i tatou uma ina ia auai i le galuega faifaipea o le Toefuataiga, e ala i le faapotopotoina o Isaraelu i itu uma e lua o le veli ma saunia le lalolagi mo le toe afio mai o Iesu Keriso i le lalolagi.
O loo lapataia i tatou e Peresitene Nelson e faapea o le a le faigofie aso oi o tatou luma atu:
“I le lumanai, o le a seasea lava faigofie pe lauiloa le avea ma se tagata faatuatua o le Au Paia o Aso e Gata Ai. O le a tofotofoina i tatou uma taitoatasi. Na lapatai mai le Aposetolo o Paulo e faapea, o aso e gata ai, o i latou o e mulimuli ma le filiga i le Alii ‘e sauaina i latou’ (2 Timoteo 3:12). O lena lava sauaga e mafai ona olopala ai oe seia e vaivai ma lemagagana, pe faaosofia ai foi oe ia e avea ma faataitaiga lelei ma lototele atili i lou olaga i aso uma.”
Ona ia faamanatu mai lea ia i tatou le ala e faamalosia ai i tatou e le Alii i Lana galuega:
“O le ala e te taulimaina ai tofotofoga o le olaga, o se vaega o le atinaega o lou faatuatua. E oo mai le malosi pe a e manatua o loo i ai sou natura paia, o se tofi e le uma lona taua. Ua faamanatu mai e le Alii ia te oe, lau fanau, ma fanau a lau fanau, o oe o suli faatulafono, ma sa faapolopoloina oe i le lagi mo lou taimi ma le nofoaga faapitoa e te fanau mai ai, e te ola ae ai ma avea ma Ana ave fu’a ma tagata o le feagaiga. A o outou savavali i le ala o le amiotonu a le Alii, o le a faamanuiaina outou e faaauau pea i Lona agalelei ma avea ma se malamalama ma se faaola i Lona nuu” (tagai Mataupu Faavae ma Feagaiga 86:8–11).