O le Alofa o Lo Tatou Faaola e Ala i Talafaasolopito o Aiga

A o tatou faamanatuina le soifua mai o lo tatou Faaola, o Iesu Keriso, tatou te manatua le meaalofa taua ua Ia ofoina mai ia i tatou taitoatasi e ala i Lana Togiola—o le meaalofa o le ola e faavavau ma le faaeaga. 

I le avea ai ma “Faaola i luga o le Mauga o Siona” i, e mafai ona tatou faalautele atu lenei meaalofa i o tatou tuaa e ala i sauniga o le malumalu. O talafaasolopito o aiga ma galuega o le malumalu e faatagaina i tatou e fesoasoani e togiolaina i latou na muamua mai ia i tatou, ma tuuina atu ia i latou le avanoa e taumamafa ai i le mana togiola o Keriso.  

O Marie Purcell, o le Uarota o Massey Park i le Siteki a Aukilani Niu Sila Papatoetoe, na molmauina le olioli o lenei galuega ina ua faamauina e ia ma ona matua lona tamamatua pele, o Afele Schwenke, i lona aiga—o se faamanuiaga na te lei mauaina i lona olaga atoa e ui lava i lona faamaoni ma lana auaunaga i Le Ekalesia a Iesu Keriso o le Au Paia o Aso e Gata Ai. 

O Afele Schwenke, na fanau iā Aperila 10, 1912, sa matuā mauaa i lona faatuatua ma tuuto atu i lona aiga. Faatasi ma lona faletua o Soala, sa auauna atu Afele i faifeautalai o Malaela, Aleipata mo le toeitiiti lua sefulu tausaga. Sa tatalaina e le ulugalii lo la‘ua fale i faifeautalai, ma sa la faatauanau mai e nonofo [faifeautalai] i lo la falepalagi ae nonofo Afele, Soala, ma lo la fanau i lo latou fale Samoa. O lona agalelei na tuua ai se aafiaga tumau, ma na avea lona aiga ma se nofoaga e a‘oa‘o ai le talalelei. 

E ui lava sa i ai se molimau malosi a Afele ma totogi ma le faamaoni ana sefuluai, ae sa tauivi o ia ma le tausia atoatoa o le Upu o le Poto. E lei faavaivai lava lona alofa mo le Ekalesia, ae na maliu o ia i le 1967 e aunoa ma le mauaina o faamanuiaga o le malumalu. 

I tausaga mulimuli ane, a o iloiloina faamaumauga o talafaasolopito o aiga, na iloa ai e Marie ma ona matua e lei faamaumauina le faamauga o lona tina i ona matua. Sa vave ona lagona e Marie se uunaiga malosi faaleagaga—e le gata ina manaomia ona faia le faamauga o lona tina, ae faapea foi le faamauga o lona tamamatua o Afele. Na atagia mai ona foliga i lona mafaufau, ma sa ia iloaina e tatau ona faamaeaina loa galuega o le malumalu. 

I le faatuatuaina o lenei uunaiga, na faatulaga ai e le aiga se taimi faatulagaina o le faamauga. Ae peitai, ina ua la taunuu i le malumalu, sa iloa e Marie e lei saunia atoatoa i laua i pepa o faamatalaga manaomia. Sa latou faaauau i isi sauniga, ae i totonu o le potu o faamauga, sa lagona uma e Marie ma lona tina se faanoanoaga manino i le tuua o le sauniga e le‘i faia. 

I le naunau ai e faamaea le galuega, na toe faatulaga e Marie ma ona mātua se isi taimi e faia ai. I le aso 6 o Aperila, 2024, na latou toe foi atu ai i le malumalu, ua saunia atoatoa. O le a tutu Marie ma lona tama o ni sui mo ona matua matutua, ae sa iloa e Marie sa i ai ona matua matutua iina e oo lava i le taimi na la taunuu ai. 

Ina ua ta‘ua e le tagata na faia le faamauga le igoa o lona tina, sa lofiaina i latou i se lagona loloto o le filemu. E manatua e Marie loimata na tafe mai a o faamaeaina le sauniga. 

E ala mai i le Togiola a Iesu Keriso ma galuega paia o le malumalu, na maua ai e Afele Schwenke ma lona faletua o Soala, faamanuiaga o le faavavau. 

I le avea ai ma Faaola i luga o le Mauga o Siona, e mafai ona tatou ofoina atu i o tatou tuaa le meaalofa lava lea e tasi o le faaeaga ua ofoina mai e Keriso ia i tatou. I le toe mafaufau ai i le aafiaga o le faamauina o ona matua matutua, na faasoa mai ai e Marie, “Ou te molimau atu o le olioli e oo mai i le auai i talafaasolopito o aiga e aumaia ai le fiafia faavavau.” 

“Sa ou lagonaina i latou o loo i le isi itu o le veli e ala i lenei galuega tele ma le ofoofogia. Ma ou te iloa o loo latou taliaina ma le fiafia le mauaina o nei sauniga paia, a o ou opoina ma le olioli le tuufaatasia o lo‘u aiga e faavavau i lenei itu o le veli.”

O le mana faamau na faamanatu atu ai ia te ia o faamanuiaga o le Togiola e oo i tala atu o le veli. E pei ona valaaulia ai e le Mataupu Faavae ma Feagaiga 128:22, “Pe tatou te le o atu pea ea i lenei savali sili?” I le Kerisimasi lenei, ia tatou faamanatuina le soifua mai o le Faaola e le gata i le mauaina o Lana meaalofa o le faaolataga ae e ala i le ofoina atu ia i latou o e na muamua atu ia i tatou, ma fesoasoani ia i latou e taumamafa i faamanuiaga faavavau o le talalelei.