Autu a le Autalavou 2025
Vaai atu ia Keriso,
Mataupu Faavae ma Feagaiga 6:36
O le Autu a le Autalavou 2025 o le a fesoasoani ia te oe e filifili ai le faatuatuaina nai lo le masalosalo ma le faatuatua nai lo le fefe.
Sa i ai Kailey e sefulufitu tausaga le matua i se au faafiafia seia oo ina tupu se faalavelave na iu ai i se manua matautia o le faiai. O lona toe manuia na taofia ai o ia mai le auai i le aoga, ma sa amata ona ia lagonaina le faaesea ma le tuuatoatasi. Sa feagaio ia ma tauiviga faalelagona ma sa le iloa po o fea e saili i ai mo se fesoasoani. Sa fautua mai se uo e faalogo i faifeautalai. Sa latou aoaoina o ia e uiga i le Togiola a Iesu Keriso O le aoao atili e uiga ia Keriso na tuuina atu ai ia te ia le faamoemoe, ma sa ia lagonaina e pei o loo aapa atu le Atua lava Ia ia te ia.
Sa fai atu Kailey i lona tina, “Ou te lei lagonaina lava e alofa le Atua ia te au. Ae o lenei ua ou iloa e alofa o Ia i a te a’u.”
Sa faateia teisi lona tina o Michelle. Sa la tuua ma lona toalua o Brock, Le Ekalesia a Iesu Keriso o le Au Paia o Aso e Gata Ai ina ua fitu tausaga o Kailey ona o fesili eseese, masalosaloga, ma popolega. Sa la’ua manatu o le a sili atu le fiafia o le la tama teine e aunoa ma sauniga ma poloaiga uma. La te lei mafaufauina lava o le la filifiliga o le a taofia Kailey mai se sootaga vavalalata ma le Atua. A o matamata Michelle ma Brock i le suiga o Kailey, sa la iloaina ua leva ona la lagonaina le latalata atu i le Atua, ma sa la mananao e toe lagonaina lena lagona.
Sa latou feiloai ma lo latou epikopo, ma e lei umi ae toe foi mai le aiga, e aofia ai ma le tuagane o Kailey o Braeden, i le lotu. O le lagonaina o le latalata atu i le Atua ma toe fesootai atu ia te Ia—aemaise lava e ala i le tatalo—na toefuatai mai ai lo latou faatuatua. O le toe foi atu i le lotu e lei foiaina uma ai a latou fesili po o popolega, ae sa latou iloaina o le i ai o se sootaga patino malosi atu ma le Atua sa sili atu ona taua nai lo lo latou le talitonu.
Na amata nei mea uma ina ua valaaulia e se uo—o se talavou e pei o oe—ia Kailey e vaai atu ia Keriso. Ma sa ia faia lava!
Ua fetalai mai Iesu Keriso, “Vaai mai ia te a’u i mafaufauga uma; aua le masalosalo, aua le fefefe” (Mataupu Faavae ma Feagaiga 6:36). O le musumusuga lenei o loo i tua atu o le Autu a le Autalavou 2025. Faataga i matou e faasoa atu pe faapefea ona e filifili le faatuatuaina nai lo le masalosalo ma le faatuatua nai lo le fefe a o e vaai atu ia Keriso:
Agavale i le taumatau: Sister Runia, Peresitene Freeman, Sister Spannaus
Tamara W. Runia
Pe a ou tauivi, e fesoasoani lava ia te au le vaai faalemafaufau ia Iesu Keriso ofaaloloa mai ona lima. Pe a ou vaai atu ia te Ia, ou te manatua upu o le pese, “Ou te Savali faatasi ma Iesu”: “E le tuua lava a’u e Ia, e tusa lava pe ou te pau.”
Emily Belle Freeman
Pe a ou faitauina lenei mau autu, e faamanatu mai ia te au ia Peteru i le Sami o Kalilaia. O le taulai atu i le afa na faateleina ai lona fefe ma le masalosalo, ma mafua ai ona magoto o ia i galu matagia. Ae o le taulai atu i le Faaola na mafai ai e Ia ona faataunuu se mea na te lei mauaina muamua: sa savali o ia i luga o le vai! E ofoofogia, e moni lava. O le a se mea e mafai ona e ausia a o e vaai atu ia te Ia?
Andrea Muñoz Spannaus
Pe a amata ona ou lagona le fefe, e tusa lava po o fea ou te i ai po o le a foi le tulaga o loo ou i ai, ou te mafaufau ma le loto i ai i la’u sootaga ma le Tama Faalelagi ma Iesu Keriso. Ou te toe fai atu i lo’u mafaufau mo ni nai taimi: O A’U O SE AFAFINE O LE ATUA. O loo faaauau pea ona ou faia lenei mea seia oo ina amata ona ou maua se lagona lelei. E galue pea lava.
Agavale i le taumatau: Uso Wilcox, Peresitene Lund, Uso Nelson
Bradley R. Wilcox
Fesili ifo ia te oe lava po o ai e sili ona popole ma alofa ia te oe. Pe o ou matua ma taitai o le Ekalesia? Pe o tagata i luga o ala o faasalalauga faaagafesootai lea e ono avea ai oe ma na o se numera? Vaai atu i le Tama Faalelagi ma Keriso E matuā popole lava i La’ua!
Steven J. Lund.
Manatua mea e faamanatu atu ia te oe pe a e taulotoina autu o le Korama a le Perisitua Arona ma Tamaitai Talavou: O oe o se atalii po o se afafine pele o le Atua. Ia faatuatua o loo i ai se fuafuaga a lo tatou Tama mo oe. O le vaai atu ia Keriso o lona uiga o le vaai atu o Lana Togiola o loo i le totonugalemu tonu lava o lena fuafuaga.
Michael T. Nelson
O le faitauina o tusitusiga paia o le vaai atu lea ia Keriso! E masani lava ona mou ese atu masalosaloga ma popolega a o faamanatu mai ia i tatou vavega ma aoaoga a Iesu. Ua tatou matua faamanuiaina lava i le mauaina o Ana afioga. E faatataui tulaga uma tatou te oo i ai i o tatou olaga.