O le a le atoaga o le talalelei?

Iesu i Ketesemane, saunia e Dan Burr

Ua fetalai mai le Alii o le atoatoaga o le talalelei o le “feagaiga tumau-faavavau,” lea ua Ia “auina atu i le fanauga a tagata” (Mataupu Faavae ma Feagaiga 66:2). E aofia ai mea uma e manaomia mo fanau a le Atua e ulu atu ai i se sootaga o le feagaiga ma Ia ma maua ai le faaolataga ma le faaeaga.

O le talalelei o le “tala fiafia” e uiga ia Iesu Keriso. O le “ata o le faaolataga a le Atua, ua mafai ona o le Togiola a Iesu Keriso. O le talalelei e aofia ai upumoni e faavavau po o tulafono, feagaiga, ma sauniga e manaomia e le tagata e toe ulufale atu ai i le afioaga o le Atua” (Taiala i Tusitusiga Paia, “Talalelei”). O le tele o nei mea na leiloloa. Ae o lenei, e ala i faaaliga i perofeta, e amata atu ia Iosefa Samita, ua toefuatai mai ai e le Alii le atoatoaga o Lana talalelei.

Faatasi ai ma le Toefuataiga o le atoatoaga o Lana talalelei, ua “valaaulia ai i tatou uma e Iesu Keriso e o mai ia te Ia ma Lana Ekalesia, ia maua le Agaga Paia, o sauniga o le faaolataga, ma ia maua le olioli tumau” (“O Le Toefuataiga o le Atoatoa o le Talalelei a Iesu Keriso: O Se Folafolaga e Lua Selau Tausaga i le Lalolagi,” Potutusi o le Talalelei).