Vaavaai mo Iesu Keriso

Vaai faalemafaufau i le mea lenei:

I le po na fanau ai Iesu, sa e tilotilo atu ai i fafo o lou faamalama i Ierusalema ma vaaia ai le fetu fou o susulu i le lagi.

Ina ua Asiasi atu o Ia i Ierusalema mo le taimi muamua, sa e iloaina sa i ai se mea e ese mai ia te Ia—sa matuai susulu lava o Ia i le agalelei.

Ina ua Ia faasilasila mulimuli ane Lona faasinomaga paia o le Faaola o le lalolagi, sa e faalogologo ma le fia iloa i le mea o le a Ia fetalai mai ai. Sa e alu soo e nofo ma faalogologo ia te Ia, ma o taimi uma lava, sa e iloa ai o Ia moni lava o le Alo o le Atua.

Ina ua e faalogo ua ave o Ia ma faasatauroina, sa e tagi loimata o le faanoanoa; ae ina ua e vaai atu ia te Ia ua toetu mai, sa e tagi loimata o le olioli.

Vaai faalemafaufau nei i le mea lea:

Ua e malaga i le faitau afe o tausaga i le lumanai. O le tausaga o le 1820, ma e le masani mea uma: o tagata, o lavalava, e oo lava i meaai. E te savali atu i faleoloa, saili i le isi itu o le taulaga mo se tasi po o se mea atonu e te iloa, ae e leai se tasi e mafai ona fesoasoani ia te oe.

Ae o le mea e sili ona leaga, e leai se mea e maua ai le atoatoaga o le talalelei a Iesu Keriso. Ua fai mai nisi ua latou mauaina, ae latou te le o manatuaina tonu lava Iesu—po o le Tama Faalelagi—sa’o. E manatu nisi o le Atua o se Agaga, ma o nisi e manatu ua na ona soifua o Ia e faasala tagata ona o le faaletonu. O nisi e le talitonu lava ia te Ia.

E na o le tasi lava le manatu e oo mai i lou mafaufau: “O fea Iesu, ma pe faapefea ona ou maua o Ia?”

E te manaomia se toefuataiga—e pei lava ona sa faia e tagata uma—ina ia toe maua ai Iesu ma iloa atili ai o Ia.

I le toe mafaufau ai i le 200 tausaga o le Uluai Faaaliga, sa fesili ifo ai Peresitene Jeffrey R. Holland, o le Sui Peresitene o le Korama a Aposetolo e Toasefululua, ia te ia lava po o le a se mea semanu na te vaavaai i ai pe ana faapea na ola o ia a o lei oo i le Toefuataiga. Sa ia fai mai, “Semanu matou te saili mo ‘uiga faamatua o le Atua,’… o se Tama Alofa i le Lagi, nai lo o se faamasino saua e tufaina atu le faamasinoga tonu malosi.”

Ina ua faaali mai le Tama Faalelagi ia Iosefa Samita, o le mea muamua lava na Ia ta’ua o “Iosefa” (tagai Iosefa Samita Talafaasolopito 1:17). E le faapea “ua tele mea sese ua e faia,” po o le “E leai so’u taimi mo oe.” E foliga mai o le mea muamua lava na faia e le Tama Faalelagi i le toefuataiga o le talalelei o le mautinoa lea na iloa e Iosefa na silafia o ia e lona Tama oi le Lagi ma e alofa ia te ia.

O le mea lona lua na Ia faia o le faailoa atu lea o Iesu Keriso. “O Lo’u Atalii Pele Lenei” Faalogo ia te Ia!” Iosefa Samita Talafaasolopito 1:17). Faatasi ai ma aoaoga faavae autu uma, upumoni e faavavau, mataupu faavae, ma le faatulagaga e toefuatai mai, e lua mea na finagalo le Atua ia iloa muamua e Iosefa (ma i tatou) o:

• E silafia patino oe e le Atua ma e alofa ia i oe.

• O Iesu Keriso o le Alo o le Atua, ma e tatau ona tatou faalogo i mea o loo Ia fetalai mai ai.

O se tasi o faamoemoega taua o le Toefuataiga o le fesoasoani lea ia i tatou ia iloa moni po o ai le Tama Faalelagi ma Iesu Keriso.

Toe vaai faalemafaufau tasi i ai:

Ua e toe foi mai i le 1820. E mavae atu aso, lea e oo atu i vaiaso, lea e liua i ni masina—ma ua amata ona e lagonaina le lotovaivai. E te maua le Tusi Paia, lea e faamanatu atu ai ia te oe aso na oulua nonofo faatasi ai ma Iesu, ma faalogologo ia te Ia. Ae o nisi vaega ua suia pe ua misi foi.

Na e filifili e nofo i se tamai taulaga e ta’ua o Palamaira, Niu Ioka. I se tasi aso o le tautotogo, na e faalogo ai i se mea e uiga i se tamaitiiti talavou o fai mai ua vaai o ia i le Atua ma Iesu Keriso. E te le fiafia tele … muamua. Ua outou faalogo na iloa e le tamaitiiti e leai se tasi o ekalesia i le lalolagi e moni ae ua sauni Iesu e toe faatuina Lana Ekalesia, faatasi ai ma Lana talalelei atoa!

O le ā sou lagona, pe a e iloa ua toe faaali mai Iesu? O le a le uiga o lena mea ia te oe?

E ala i le Toefuataiga o le Ekalesia a le Faaola, O Le Ekalesia a Iesu Keriso o le Au Paia o Aso e Gata Ai, ua tatou maua ai se malamalama loloto atu e uiga i le Faaola. E lē tatau ona avea i tatou ma tagata malaga i le taimi e iloa ai po o ai Iesu. E mafai ona tatou suesue i tusitusiga paia e faitau ai Lana afioga, ma e mafai ona tatou maua faamanuiaga e ala i Lana pule, le mana toefuataiina o le perisitua.