Taulimaina o A’u Fesili e uiga i le Talafaasolopito o le Ekalesia

I la’u vasega o talafaasolopito, na amata ai ona talanoa lo’u faiaoga e uiga i Le Ekalesia a Iesu Keriso o le Au Paia o Aso e Gata Ai. Sa le’i i ai sona manatu maualuga e uiga i le Ekalesia. Sa ia fai mai o i matou o ni tagata e tele avā ma faailoga lanu.

O mea uma sa ou aoaoina muamua e uiga i le Ekalesia sa talafeagai ia te au. Ae o lo’u aafiaga i le vasega na ou mafaufau ai i ni fesili faigata mai le talafaasolopito o le Ekalesia, e pei o le mafuaaga na le faatagaina ai tagata uli e umia le perisitua mo se taimi, ma le mafuaaga na tupu ai le faaipoipoga autaunonofo.

Ona o lena mea, na amata ai ona ou matua mafaufau, mafaufau loloto, ma tatalo. Sa ou faitau mai tusitusiga paia, talanoa ma o’u matua ma taitai, ma aoao atili mo a’u lava. E ui lava sa i ai ni a’u fesili, ae ou te lei fiu pe musu.

A o ou suesue ma aoao, sa toetoe lava a ou lagonaina e pei o loo aveina a’u. Ou te le malamalama atoatoa lava i mea uma, ae sa mafai ona ou maua le filemu.

O le taimi nei a i ai ni a’u fesili, ou te taofimau i mea ua uma ona ou iloa, e pei o aafiaga uma na fesoasoani e tuputupu ae ai la’u molimau. Pe a taia a’u i se mea, o le tatalo o se vaega e masani lava ona ou alu i ai, ona ou taumafai lea e faalogo i le Agaga a o ou faitauina tusitusiga paia.

O le tausaga ua tuana’i, ua ou iloa moni ai lava le mana o le Agaga, ma ua ou lagonaina le filemu ma le mafanafana ma le alofa. Ou te iloa o loo i ai moni lava se Atua o loo talanoa mai ia i tatou ma e finagalo ia tatou toe foi atu i le aiga.