Tala Fiafia mo Oe ma le Lalolagi

I totonu o se togavao, na faaali mai ai le Atua le Tama ma Lona Alo, o Iesu Keriso, ma fetalai atu ia Iosefa Samita e tali atu i le tatalo a Iosefa po o le fea ekalesia e tatau ona ia auai i ai (tagai i le Iosefa Samita—Talafaasolopito 1:16–20). Sa ta’u atu e Iesu ia Iosefa e aua le auai i soo se lotu. Na Ia folafola mai o le a faaali mai le atoatoaga o Lana talalelei ia Iosefa i le lumanai.

I le to’atele, na foliga mai o Iosefa o le tagata e sili ona lē mafai ona valaauina i se galuega tāua faapena. I la latou vaai, sa na o ia o se tamaitiiti e le’i a’oa’oina mai se tamai faato’aga. Ae e ala mai ia Iosefa, o le a faia ai e le Tama Faalelagi ma Iesu Keriso le mea ofoofogia moni lava. O le a tuuina atu ia Iosefa poloaiga, faaaliga taua, ma aoaoga faavae taua e uiga i le fuafuaga alofa a le Tama Faalelagi ma le alofa togiola ma le Togiola a Iesu Keriso e faamanuia ai i tatou ma fesoasoani ia i tatou ia iloa pe faapefea ona tatou toe foi atu i le aiga.

Na faaali atu le agelu o Moronae ia Iosefa Samita ma ta’u atu ia Iosefa se talafaamaumau, na tusia i luga o papatusi auro, na tanumia lata ane (tagai Iosefa Samita—Talafaasolopito 1:33–34). Mulimuli ane, na faaliliuina e Iosefa lena faamaumauga i le mea o le a avea ma Tusi a Mamona, lea e tutu faatasi ma le Tusi Paia o se isi molimau ia Iesu Keriso.

I le Tusi a Mamona atoa, sa iloa ma valoia e tagata, i le faitau selau o tausaga a o lei oo mai Keriso, Lona afio mai ma sa latou moomoo mo lena afio mai. Ua tatou faitau foi i le auala na faaali mai ai le Faaola ma auauna atu i sa Nifaē. Na Ia valaaulia tagata uma e o mai ia te Ia. Sa ia faamaloloina e mamai, pipili, tauaso, ma i latou uma sa mafatia. Ona Ia faamanuiaina lea o tamaiti laiti ma tatalo mo i latou (tagai i le 3 Nifae 11:14–15; 3 Nifae 17:7–9; 3 Nifae 17:21).

Ua aoaoina i tatou e le Tusi a Mamona i le tele o mea e uiga i le alofa ma le agaalofa o le Faaola. Ua molimau moni atu o “Iesu o le Keriso.” O loo i ai le matagofie o Lana talalelei e faavavau. Ua tuuina mai i le Tusi a Mamona se ata manino o le auala e alofa ai lo tatou Tama oi le Lagi ma lo tatou Faaola ia i tatou e sili atu nai lo soo se mea e mafai ona tatou mafaufauina.

Na o mai isi avefeau faalelagi ia Iosefa Samita. Na sau Ioane le Papatiso e toefuatai mai le pule e papatiso ai. Na toefuatai mai e Peteru, Iakopo, ma Ioane le tulaga faaaposetolo ma ki o le pule o le perisitua. “Sa ō mai fo’i isi, e aofia ai Elia, o lē na toefuata’i maia le pule e faamau faatasi ai aiga e faavavau i mafutaga e faavavau lea ua to’ilalo ai le oti.”

Ona faatuina lea e Iesu Keriso e ala mai i le Perofeta o Iosefa se Ekalesia na mamanuina e tusa ai ma le Ekalesia na Ia faatulagaina i taimi o le Feagaiga Fou (tagai i le Mataupu Faavae o le Faatuatua 1:6). E ala mai ia Iesu Keriso ma Ana aposetolo ma perofeta, ua maua ai e Le Ekalesia a Iesu Keriso o le Au Paia o Aso e Gata Ai faamanuiaga o le mana toefuataiina o le perisitua mo fanau uma a le Atua.

Ou te faapea atu afai e te lagona le faanoanoa ma lagonaina e te le o fuaina pe e te le o auai, ia sili atu lou agalelei ia te oe lava ma iloa ai le alofagia o oe e le Tama Faalelagi ma Lona Alo, lo tatou Faaola, e sili atu nai lo le mea e mafai ona e mafaufauina. Ua valaaulia tagata uma e o mai ia Keriso ma Lana Ekalesia. Ole Ekalesia e le mo e atoatoa . E pei lava o se falemai tatou te maua ai le faamalologa. I le lotu tatou te liliu atu ai i tatou lava i fafo, auauna atu i isi ma le alofa, ma faasoa atu le talalelei. E mafai ona tatou “manatua [i latou} ma tausia i le afioga lelei a le Atua” (Moroni 6:4). E mafai ona tatou maua le filemu ma le faamalologa. Oka se faamanuiaga ofoofogia!

E alofa le Tama Faalelagi ma Lona Alo pele, o Iesu Keriso, ia te oe ma e naunau—e sili atu nai lo se isi lava mea—e aumai oe i le aiga ma maua e faavavau le ituaiga olaga o loo La soifua ai. Ua faaalia mai i le Toefuataiga ua La’ua faia mea uma ina ia avea ai lenei mea ma se avanoa mamalu mo oe. E i ai taimi, atonu e te oo ai i tofotofoga ma faigata, ae ua e i ai “ina ia [e] maua le olioli” (2 Nifae 2:25) i lenei olaga ma le isi. Sa sili atu le iloa e le Perofeta o Iosefa o lenei mea nai lo le toatele. O le a e iloaina e mafai ona e maua le olioli pe a e salamo pea ma liliu atu i lou Tama oi le Lagi ma lou Faaola.

Sa feagai Iosefa ma tetee ma sauaga, ae sa ia tausia pea lona “uiga fiafia moni” (Iosefa Samita—Talafaasolopito 1:28). Sa tumau lona olioli, malosi, ma le maufetuunai, ma sa ia faataunuuina le galuega na tuuina atu ia te ia e fai. E faapena fo’i i latou uma na suitulaga iā te ia.

Sa le taugamalie i le popofou o le Ekalesia, ma e mafai ona le taugamalie i le asō, ae sa faaauau pea le Toefuataiga i lena taimi—ma o loo faaauau pea i le asō. E taitaiina e Iesu Keriso Lana Ekalesia. O loo faaauau pea ona taialaina i tatou e perofeta soifua. O le a faaauau pea ona fausia maota o le Alii. O le alofa o le Atua ma Iesu Keriso o le a oo atu i le lalolagi atoa a o tatou mulimuli i le poloaiga a le Faaola e fafaga Ana mamoe ma faasoa atu Lana talalelei. O le a oo mai upu moni o le Toefuataiga i auala ma nofoaga ia atonu sa faigata ona mafaufauina i aso o Iosefa. O le a tatou taumafai ia agalelei teisi le lalolagi ma faaitiitia le fevaevaeaiga.

A o e suesue e le aunoa i le talalelei, tatalo soo, ma auauna atu i isi, o le a pai atu le savali o le Toefuataiga i lou loto ma suia ai lou olaga. Atonu e le tupu vave, ae o le a aumaia ai ia te oe le olioli—e pei ona sa i ai mo le Perofeta o Iosefa.

Tau ina ia faamanuiaina ma taialaina lou olaga i tala fiafia o le alofa ma le olioli lea e aumaia e le Toefuataiga—i le taimi nei ma taimi uma.