Autu a le Autalavou 2025
O Auala e 7 e Vaai atu ai ia Keriso
Faataitai nei mausa e faatulaga ai ou vaaiga i le Faaola.
O le faaaogaina o le autu a le autalavou i le tausaga lenei—“Vaai atu ia Keriso”—e tuuina mai ai sina luitau. E faapefea ona e vaai atu i se tasi e le o i ai faaletino? Amata i mausa nei e fitu.
1. Manatua E Le o Lafi o Ia
Ioe, e tatau ona e vaai mo Ia. Ae e finagalo ia maua o Ia! E le o se taaloga o le igā vea. E naunau lava le Alii e faamanuia oe—o le mea moni, e fiafia i ai o Ia (tagai i le Mataupu Faavae ma Feagaiga 41:1). E le o sailia e ia ni mafuaaga e faaleaogaina ai oe. E faafeagai lava: O loo saili pea o Ia e faamanuia oe. E pei ona aoao mai Elder Patrick Kearon o le Korama a Aposetolo e Toasefululua, “Leai, e le faatuina e [le Faaola] ni vaega e poloka ai ma ni papupuni; Na te aveesea na mea. Na te le taofia oe i fafo; Na te faafeiloai ia te oe i totonu. O Lana auaunaga atoa o se tautinoga ola lea o lenei faamoemoega.”
2. Ia Faailoa Lana Uunaiga i Lou Olaga
E fiafia le Alii pe a tatou ta’uta’u atu … lona aao i mea uma (Mataupu Faavae ma Feagaiga 59:21). O lea ia mautinoa ai e faailoa atu Lana uunaiga i lou olaga! Faafetai ia te Ia pe a lelei mea uma mo oe ma saili le filemu ma le malamalama pe a leai.
3. Ia Faafetai mo Mea ua E Maua
Faatasi ai ma le faailoaina o le uunaiga a le Alii i lou olaga, e taua foi le lagonaina—ma le faaalia—o le lotofaafetai. Atonu e te le vaai faaletino i le Faaola, ae e mafai ona e vaaia Ana faamanuiaga i lou olaga! Na saunoa Elder Gary B. Sabin o le Fitugafulu, O le a leai lava se taimi e sili atu ai lou fiafia nai lo lou lotofaafetai. Faafetai i le Alii i aso uma mo ou faamanuiaga. A e lagona le lotovaivai, mulimuli i le fautuaga o le viiga tuai: Faitau ou manuia; tau taitoatasi i latou, ma o le a faateia ai oe i mea ua faia e le Alii.
4. Tatalo i Aso Taitasi
O le a sili atu ona mafai ona e vaai i le Faaola i le aso atoa pe afai e te amata i le talanoa atu i le Tama Faalelagi. Ole atu ia te Ia e fesoasoani ia te oe e manatua le Faaola ma matau Lana uunaiga i lou olaga. E mafai ona e tatalo soo i le taimi e te manao ai i le aso. Ma a o lei moe, toe tatalo e ta’u atu i le Tama Faalelagi pe na faapefea mea uma. E le vaivai lava o Ia i le faalogo mai ia te oe!
5. Tauloto Mau ma Viiga
O se tasi o auala e taulai atu ai ou mafaufauga ia Iesu Keriso o le tuu atu lea o upu i se mau e sili ona e fiafia i ai po o upu o se pese faagaeetia e te manatuaina. Faataitai le manatuaina o na mea pe a e lagonaina le tolotolo mai o mafaufauga le lelei. E masani lava ona lava le na o le toe manatuaina (ma le usuina le leoa) o le ulutala o se viiga e toe faasino ai ou mafaufauga: O au o se atalii o le Atua. “Ua naunau ia te Oe.” “Be still, my soul.”
6. Vaai atu i Ata o le Faaola
Saili ni ata o le Faaola e te fiafia i ai, ona tuu lea i se mea o le a e vaai soo i ai. O nisi nofoaga atonu e aofia ai le puipui o lou potumoe, faaata o lou faletaele, loka o lau aoga, po o se ata i lau komepiuta po o le lau autu i lau telefoni.
7. Vaai i le Lalolagi o siomia ai Oe
E ese le matagofie! Ma na faia e le Faaola mo oe (tagai i le Mataupu Faavae ma Feagaiga 14:9)! E leai se mafuaaga tatou te iloa ai e tatau ona matagofie le lalolagi. Atonu e mafai lava ona tatou faaaluina le olaga faaletino i se lalolagi e mafolafola, faatafafa, ma puaoa. Nai lo lena ua faia e le Faaola se lalolagi “mo le lelei ma le faaaogaina e le tagata, e faafiafia ai mata ma faaolioli ai le loto” (Mataupu Faavae ma Feagaiga 59:18). I se isi faaupuga, e matagofie le lalolagi auā o mea matagofie e tatou te maua ai ni lagona lelei. Afai e te manao e manatua le Faaola, na o le tilotilo solo lava.