E Faapefea Ona Tatou Aoao Atu Tagata e uiga i le Ata o le Faaolataga?

O le aoaoga faavae autu ua faaalia o le Ekalesia toefuataiina a Iesu Keriso ua aoao mai ai e faapea o fanau uma a le Atua—faatasi ma ni tuusaunoaga e matua faatapulaa le iloiloina iinei—o le a iu ina ea a’e i se malo o le mamalu I le faaiuga, o le a faamasinoina ai i tatou taitoatasi e tusa ma a tatou galuega ma manaoga o o tatou loto. A o lumanai lena mea, o le a manaomia ona tatou puapuagatia mo a tatou agasala e le’i salamo ai. Ua manino lava tusitusiga paia i lena mea. Ona auina atu lea e lo tatou Faamasino amiotonu i tatou i se tasi o na malo e tolu o le mamalu.

O le faamoemoega o le fuafuaga—o loo faaalia i mataupu autu ma aiaiga faavae a le Ekalesia toefuataiina—o le saunia lea o fanau a le Atua ina ia ausia le faaeaga i le malo selesitila, o le tikeri aupito maualuga lea o le mamalu. Ae e lē o tagata uma o le a mananao ma agavaa mo lenei mea. Ona o le alofa tele o lo tatou Tama Faalelagi mo Ana fanau uma, ua Ia saunia ai ni malo maualalo se lua o le mamalu.

Ua tatou iloa mai faaaliga o aso nei e faapea “o malo uma ua i ai se tulafono ua tuu atu i ai.” O le malo o le mamalu tatou te mauaina i le Faamasinoga Mulimuli e fuafua i tulafono tatou te filifili e tausia i le fuafuaga alofa a lo tatou Tama Faalelagi. I lalo o lena fuafuaga o loo i ai ni malo se tolu ina ia mafai ona tofia i ai Ana fanau uma i se malo e mafai ona latou “aumau ai.” O nei malo taitasi e sili atu ona matagofie nai lo le mea e mafai ona tatou malamalama i ai. O le Togiola a Iesu Keriso ua mafai ai nei mea uma.

O nisi aoaoga musuia e faatatau i le ata o le faaolataga e maua ai le malamalamaaga ma le faamafanafanaga. I ni auala e le’i faaalia maia, na faatosinaina ai e a tatou faatinoga i le lalolagi o agaga o tatou tulaga i le olaga nei. E faapena foi, o le tele o mea e sili ona taua o le olaga faaletino o le a faatulagaina tonu lava i le lalolagi pe a mavae le olaga nei. O le a i ai se meleniuma lea e maua ai e le fuafuaga sili o le fiafia se taimi mo le faataunuuina o mea uma e le i atoatoa i olaga o soo se fanau agavaa a lo tatou Tama.

Mo le taimi nei, e finagalo le Atua mo i tatou uma ia tinou mo Ana faamanuiaga silisili ona maualuga e mafai ona maua e ala i le tausiga o Ana poloaiga silisili ona maualuga, o feagaiga, ma sauniga, o mea uma ia e taualuga i Ona malumalu paia o loo fausia i le lalolagi atoa.

“O le Togiola a Iesu Keriso o le mea silisili ona maoa’e lea ua tupu i le talafaasolopito o tagata. E ala i Lana taulaga togiola, na faagaoioia ai e Iesu le fuafuaga a le Tama. E leai se mea tatou te mafaia pe ana le seanoa le Togiola a Iesu Keriso.”

E pei ona tautino mai e lo tatou perofeta, o le Togiola a Iesu Keriso o “le faatinoga totonugalemu lea o le talafaasolopito o tagata uma.”

Ua faatalitonuina a’u o lo tatou faamoemoega autu lava i le talaiina atu o le talalelei toefuataiina a Iesu Keriso i aso nei, o le faaliliuina lea o tagata ia Keriso.

O le asō, a o faaitiitia ma faaitiitia tagata ua malamalama i le misiona sili a lo tatou Alii ma le Faaola, e manaomia ona fuaāo e le autu o Iesu Keriso a tatou aoaoga.

O le faamuamua o Iesu Keriso i a tatou aoaoga faafaifeautalai o loo i ai nei e musuia. O le faateleina o le aofai—aemaise lava le autalavou ma talavou matutua—e manaomia ona toe maua mai le faafitia o le i ai o se Atua po o se Faaola po o le faapea mai o Iesu Keriso sa na o se tagata faaletino—o se faiaoga maoae ae le o le Alo o le Atua ma le misiona tulaga ese o loo otootoina mai i tusitusiga paia ma aoao mai e perofeta.

O isi e talitonu e ui atonu e i ai se Atua, ae Na te le faia ni poloaiga e manaomia ai le tali atu mo i latou lava, o lea la e leai ai se agasala. O se eseesega o lenei mea e faapea, e saoloto se tagata e gauai atu i uunaiga uma aua na faia i latou e le Atua i lena ala ma o lea o le a le faasalaina ai i latou mo a latou filifiliga. E faapena foi, na aoao mai Nifae e tolu auala a Satani e faaleagaina ai fanau a le Atua, o le lua o na auala e faamalieina ai le tagata lava ia (“ua lelei mea uma i Siona”) ma le le popole i poloaiga (“e leai se seoli”).

O le auala sili ona aoga e faafetaia’ia ai soo se tasi o na manatu e tetee ia Keriso o le aoao atu lea ma molimau atu i le moni o Iesu Keriso ma le manaomia o Lana misiona. E faapena foi, o le aoao atu o le ata o le faaolataga o se mea e tatau ai. O le ata o le faaolataga o le tali sili lea i le tele o fesili o loo faalavelave i tagata talavou ma a latou tupulaga e le o ni tagata o le Au Paia o Aso e Gata Ai. O loo faamamafa mai i le fuafuaga la tatou mataupu faavae autu o le Toefuataiga e pei ona taulai atu i le agavaa mo le faaeaga i le malo selesitila. Ua faaalia ai foi ia i tatou le tautino atu i sootaga alofa ma i latou e le’i tuuto atu i lena aoaoga faavae.

I lenei olaga faaletino, e tatau ona tatou taulai atu i le agavaa mo le tikeri aupito maualuga o le mamalu i le malo selesitila, lea o le a taialaina ai i tatou ma le alofa e Iesu Keriso ma faamalolosia i tatou. O feagaiga ua saunia i le ata o le faaolataga e mafai ai ona tatou maua Lona mana togiola. A o tatou saili ia iloa Iesu Keriso ma o mai ia te Ia i lena sootaga o le feagaiga, o le a Ia tuuina mai ia i tatou le mana ma le taitaiga e faia ai filifiliga sa’o, aua o Ia o le ala, o le upumoni, ma le ola.