O Le Perofeta ma Lona Faaola
I se isi itu, o le tala i le Toefuataiga o le tala lea i le latalata atili atu o Iosefa Samita ia Iesu Keriso.
Ia Tootutuli Tulivae Uma, saunia e Dan Wilson
O le tala i le soifuaga o Iosefa Samita e sili atu nai lo na o se tala i le soifuaga o Iosefa Samita.
Pe a tatou faamatala le tala i le Toefuataiga o le talalelei a Iesu Keriso, e masani ona tatou amata i le faamatala atu o le tala ia Iosefa Samita. Ma e sa’o ma fetaui lelei lena mea. Sa faamatala mai e ia lava le tala i lona uluai olaga i ni nai taimi eseese e fesoasoani ai i tagata ia malamalama i le auala na amata ai le Toefuataiga. Ae i se isi itu, o le tala i le soifuaga o Iosefa Samita o le tala lea i lona latalata atili atu ia Iesu Keriso.
O Se Vaaiga Mamao o le Faamagaloga
Sa lagona e le taulealea o Iosefa Samita le le mautonu e uiga i lotu. Ma sa i ai se lagona faaopoopo na uunaia ai o ia e tatalo i lena togavao o laau lea na ia maua ai lana Uluai Faaaliga: “Sa ou lagona le faanoanoa mo a’u lava agasala.”
Ina ua fetalai atu le Faaola ia Iosefa, sa Ia fetalai mai, “Iosefa e, lo’u atalii e, ua faamagaloina au agasala ia te oe.”
Na iloa e Iosefa lava ia o loo soifua Iesu Keriso. Sa ia aoaoina foi e alofa mutimutivale Iesu Keriso ma faamagalo i agasala. O lenei malamalama patino sa taua ia Iosefa. “O le faaolataga o lo’u agaga e sili ona taua ia te au [aua] ua ou iloa mo le mautinoa o mea e faavavau,” sa ia saunoa ai i se tasi taimi.
O lenei malamalama e uiga ia Iesu Keriso sa taua foi i le galuega na valaauina Iosefa e fai o se perofeta. Sa ia tuuina atu se molimau mamana i le alofa tunoa ma le alofa mutimutivale o Iesu Keriso i lona olaga atoa. Mo se faataitaiga, sa ia aoao mai i se tasi taimi, “E tatau i loto uma ona salamo ma ia mama, ma o le a silasila mai le Atua ia i latou ma faamanuiaina i latou i se auala e le mafai ai ona faamanuiaina i latou i se isi lava auala.”
O Mea Sese ma le Alofa Mutimutivale
O le galuega na valaauina Iosefa Samita e fai sa matuai taua lava. Ma sa aoao Iosefa e manatu mamafa i poloaiga ma fautuaga a le Alii, o se vaega o lena aoaoga sa ala mai i mea sese na ia faia.
Mo se faataitaiga, ina ua leiloloa itulau o tusitusiga o le Tusi a Mamona, sa aveese e le Alii le meaalofa o le faaliliuga mai ia Iosefa ma mulimuli ane fetalai atu ia te ia: “Ua faafia ona e soli o poloaiga ma tulafono a le Atua. … Aua, faauta, sa lē tatau ona sili atu lou fefe i tagata nai lo i le Atua” (Mataupu Faavae ma Feagaiga 3:6–7).
Ae sa i ai foi i le Alii le savali lenei mo Iosefa: “Ae ia manatua, ua alofa mutimutivale le Atua; o lea, salamo” (Mataupu Faavae ma Feagaiga 3:10).
Sa salamo Iosefa ma sa toe tuuina atu foi ia te ia le meaalofa o le faaliliuga. Atonu sa tiga le aafiaga atoa mo ia, ae sa ia aoaoina ni lesona taua—e aofia ai le mafai ona tatou salamo ma faamanuiaina aua e alofa mutimutivale le Alii.
Faaola ma Uo
Sa i ai ia Iosefa Samita ni faaaliga, asiasiga, ma faaaliga na ia vaai pe faalogo i ai i le Alii o Iesu Keriso pe aoao foi e uiga i Lona natura, uiga, ma le misiona (tagai, mo se faataitaiga, i le Mataupu Faavae ma Feagaiga 19; 76; 93; 110).
O se tasi o upumoni sa ia aoaoina o le galuega togiola a le Faaola e mo tagata uma o e na ola i lenei lalolagi—ma lalolagi uma o loo nonofo ai atalii ma afafine o le Atua (tagai i le Mataupu Faavae ma Feagaiga 76:24).
I le taimi lava e tasi sa ia aoaoina ai le tele o le galuega a le Faaola, sa aoaoina ai foi e Iosefa e silafia ma alolofa le Tama Faalelagi ma Iesu Keriso ia i tatou taitoatasi. La te mananao i se sootaga vavalalata ma i tatou taitoatasi. La te mananao ia tatou osia feagaiga, tausia, ma tumau ma le faamaoni e oo i le iuga. O lenei mafutaga faalolotoina o le a aumaia ai ia i tatou le olioli ma le mautinoa.
O le sootaga a Iosefa lava ia ma le Tama Faalelagi ma Iesu Keriso na matua loloto lava ma i se tasi o vaega aupito maualalo o lona olaga, a o lokaina i le Falepuipui o Liperate, sa mafai ai ona ia faapea mai:
“O le a ou taumafai ia faamalieina i lo’u tulaga, ma le iloaina o le Atua o la’u uo. O ia o le a ou maua ai le faamafanafanaga. Ua ou tuuina atu lo’u ola i ona aao. Ua ou saunia e alu i lana valaau. O lou manao ia faatasi ma Keriso.”
A o e suesue i le soifuaga ma aoaoga a Iosefa Samita, e mafai ona e mulimuli i lana faataitaiga. Salamo, osia ma tausia feagaiga, ma faaauau pea ona faamaoni. Ona mafai lea ona e iloa o le Faaola o lau Uo.