Filifiliina o le Malumalu

O le malumalu e sili ona latalata mai ia te au o loo i se isi motu. Ina ia oo atu iina, e tatau ona matou faia se malaga i le vaalele e 45 minute po o se malaga e 12 itula i le vaa. Ou te lei alu muamua lava i le malumalu, ma i lo’u tausaga mulimuli o le aoga, sa faia ai e lo’u tina ni fuafuaga mo i matou e o. Sa ia teuina se tupe mo se tausaga ina ia mafai ona o faatasi lo’u aiga.

Ae paga lea, e matou te toe foi i le fale ua a’e le aoga, lea na ou popole ai. Sa taua i taimi uma ia te au le i ai o se averesi lelei o togi (GPA) i le aoga ina ia mafai ona ou maua se sikolasipi mo le kolisi. Sa ou mafaufau e le alu i le malumalu, aua o le toesea e ono afaina ai la’u GPA mulimuli. Ona fai mai lea o lo’u tina, “Aisea e te le tatalo ai ma ole atu mo le fesoasoani a le Alii?”

Sa fai si ou musu ona sa ou fefe, ae sa ou filifili e tatalo. Sa taialaina au e le Tama Faalelagi, ma sa ou filifili e alu i le malumalu. Mo le vaiaso atoa sa matou i ai iina, sa matou o i le malumalu i aso uma. Sa ofoofogia lava! O le faia o papatisoga o se aafiaga ofoofogia; sa mafai ona ou lagonaina le malosi o le Agaga.

I le iuga, na mafai ona ou faamaeaina le aoga i se GPA lelei. O le faatumauina o se sootaga vavalalata ma le Faaola na fesoasoani ia te au e maua ai le faamoemoe i lena taimi. Sa ou iloaina sa Ia faatasi ma au, ma tuuina mai ia te au le malosi. E silafia e le Alii a tatou taumafaiga, ma a tatou tuuina atu mea i Ona aao, e mafai ona tatou faatuatuaina o le a lelei mea uma.

Ou te matua faafetai lava ona sa i ai i lo’u uso le lototele e valaaulia ai faifeautalai i lo matou fale. O ia ma a’u o tagata muamua i lo matou aiga na papatisoina—sa 13 ou tausaga ae 15 ona tausaga. Ou te iloa o au o se afafine pele o lo tatou Tama Faalelagi. E lei i ai lava lo’u tama faalelalolagi i lo’u olaga, ae e fesoasoani ia te au e iloa ai o loo i ai so tatou Tama Faalelagi ma ua foafoaina au i Lona faatusa. Ou te lagonaina Lona alofa mo au; ou te iloa i taimi sili ona faigata, o loo i ai o Ia i o’u autafa.