Fausiaina o Fale ma Molimau
Sa olaola le pisinisi faufale a Sara. Ae sa i ai sana faaiuga e tatau ona fai.
Ata na pueina e Christina Smith, vagana ua faamatalaina
Mo Noa, o se vaa. O le Tupu o Peniamina sa faaaogaina se ‘olo Sa faaaoga e le Uso o Iareto ia vaa. Ae mo Sarah Christensen mai Monatana, ISA? Ia, sa ia filifili e manao e fausia ni fale.
O Hermana Christensen, o le ua avea nei ma se faifeautalai faamisiona o loo auauna atu i le Misiona a Minesota Minneapolis, sa i ai se taimi na tau ita ai ona o se misiona ua faalavelave i ana sini faufale—ma e le o lana lava misiona lea!
Tatou amata i le amataga
Sa ou fesoasoani i lo’u tama e fausia mea i lo’u olaga atoa, o lana tala lea. “Sa ou masani i meafaigaluega e faaaoga ai le eletise ma le faufale, ma sa ou matua fiafia lava i ai. O lea, ina ua 16 o’u tausaga, sa ou filifili ai ou te manao e amata la’u lava pisinisi faufale.”
“Sa aoaoina au e lo’u tamā e tuufaatasi mea, mai laupapa e lua i se fale atoa,” o le tala lea a Sara.
Fausiaina o se Pisinisi
Na muamua toe faafou e Sara se fale i le tasi le tausaga i le taumafanafana. Sa matuai fiafia lava o ia i ai ma sa ia toe faia ai se isi galuega faatino e toe faafou ai i le tausaga na sosoo ai. Mulimuli ane, sa ia filifili e fai se galuega faatino e sili atu ona tele—o se fale “faapitoa”, po o se fale o le a latou fausia ma lana vaega o soa faigaluega mai le faavae e oo i le faaiuga, e faamoemoe e faatau atu mo se tupe mama.
Aso e talepe ai! Ua ave e Sara se samala i se faletaele i se tasi o ana galuega faatino.
O le amataina o se pisinisi sa le o se galuega faigofie, aemaise lava ona sa pisi lava Sara i le aoga maualuga ma tamoega i le atunuu atoa.
Na amata e Sara lana lava kamupani faufale ina ua 16 ona tausaga.
“Sa ou aoaoina le tele o mea,” o lana tala lea. “Sa tatau ona ou faaaogaina se tusi siaki e totogi ai tagata, lea ou te lei faia muamua lava. Sa tatau ona ou to’a e talanoa i tagata ese o a’u soa faigaluega. Ua ou aoaoina foi le auala e taulima ai le atuatuvale o le faafoeina o se kamupani, lea sa le o taimi uma e malie ai. E i ai lava i taimi uma le popole o le a e le mauaina le tupe e manaomia e vaevae tutusa ai pe a faatau atu se fale.”
E Le Tuua Toatasi
Ae e ui lava i popolega ma atuatuvalega e oo mai i le faatautaia o se pisinisi, e lei tuua lava Sara e faasaga atu na o ia i ana miti tetele.
“Sa lelei lava i taimi uma, ma ou te iloa ona o le Alii,” o lana tala lea. “E le mafai ona faia lenei mea faapisinisi e aunoa ma Ia. Sa fesoasoani o Ia ia te au i aso leaga, le galuega faigata, o mea uma.”
O le faiā vavalalata a Sara ma lona aiga e maua mai i le galulue faatasi.
Sa lagolagoina foi o ia e lona aiga i soo se itu—lea e taitai atu ai i matou i lena misiona lea sa faalavelave i ana fuafuaga.
Sa fuafua lona tuagane matua o Tyler e fesoasoani ia Sara e fausia se fale pe a taunuu i le fale mai lana misiona. Ae i se tasi aso, sa ia valaau atu ai ia te ia ma le tala ua talosagaina o ia e faaopoopo lana auaunaga faafaifeautalai.
Sa ou ita tele ia te ia, sa ia tautino mai ai. “Sa ou faapea, ‘Tyler, e le mafai ona e taliaina lena mea. Ua ou fuafuaina lenei mea.’ Ma sa ia fai mai, ‘E sili atu le taua o le galuega a le Alii nai lo lau galuega.’ Na taia a’u i lena mea. Sa ou iloaina sa sa’o o ia ma e tatau ona ou faatuatuaina le fuafuaga a le Atua.
Sa faafeiloai e le aiga o Sara lona tuagane o Tyler i le fale ina ua uma lona taimi faaopoopo i
Ata mai faaaloaloga a Sara Christensen.
Pe o ia mauaina se fesoasoani mai lona tama po o se fesoasoani mai le Tama Faalelagi, ua iloa e Sara e le o tuua na o ia.
O Lana Lava Misiona
O le faataitaiga a Tyler na musuia ai Sara e amata ona mafaufau e uiga i le auauna atu i lana lava misiona. “Sa ou iloaina le toatele o tagata na fesoasoani lo’u tuagane e o mai ia Keriso, ma sa ou vaaia foi le tele o lona sau ia Keriso lava ia. Sa ou manao ia i ai ni aafiaga faapena,” o le tala lea a Hermana Christensen. Sa amata ona ou matua suesue i le talalelei ma iloa ai o le tele o le tuputupu ae o la’u molimau ma la’u sootaga ma lo’u Faaola, o le tele foi lena o lo’u manao e faasoa atu mea sa ia te au.”
Na faia e Sara le filifiliga e taofi lana pisinisi faufale ma auauna atu i le Alii. O lenei filifiliga ua ia maua ai ni malamalamaaga fou mamana.
“O le mea muamua lava ua aoaoina ai au e la’u misiona o le talalelei e suia atoa ai olaga,” o le tala lea a Hermana Christensen. “O le ola ae i le Ekalesia na faigata ai ia te au ona iloa le taua tele o le talalelei i lo’u olaga.
“O iinei i la’u misiona, ua siomia ai au e tagata e le iloa e uiga i le Tama Faalelagi ma Iesu Keriso. A latou iloa o i latou o fanau a le Atua ma e i ai Lana fuafuaga mo i latou, e suia ai o latou olaga. O se mea sili ona manaia le molimau atu ma avea ma se vaega. Sa ou malamalama i lena mea a o lei faia la’u misiona, ae o lea ua ou iloa o le talalelei a Iesu Keriso e taua tele mo le olioli i lenei lalolagi ma le lalolagi a sau.”
O Hermana Christensen (taumatau) ma lana soa o Hermana Teila (agavale) e fiafia e auauna atu i soo se auala la te mafaia.
Ata mai faaaloaloga a Sara Christensen
O Le Faatuatua e Sili Atu i le Fefe
I isi talavou o loo mafaufau e auauna atu i se misiona, na fai mai ai Hermana Christensen, “Ia faatuatua ma aua le fefe. E le faigofie misiona, ae e aoga. O le a faamanuiaina oe e le Atua i ni auala e le mafaufauina a o e faia se faaiuga e avea ma se tasi o Ana auauna.”
E ui ina misia e ia le mafai ona fausia o fale a o ia auauna atu, ae e le faanoanoa Hermana Christensen i lana filifiliga. “Ioe, o loo i ai se tuputupu ae faamoemoeina semanu e mafai ona maua e la’u pisinisi a o avea au ma se faifeautalai faamisiona,” o lana tala lea. “Ae ou te iloa o le a faamanuiaina e le Alii la’u osigataulaga o le tuua mo sina taimi. E mafai ona faatali la’u pisinisi, ae e le mafai e le galuega a le Alii!”