“Jos Ia blong Jisas Kraes we I Bin Kambak,” Liahona, Jenuware 2025.
Stap Yusum Ol Magasin blong Jos
Jos Ia blong Jisas Kraes we I Bin Kambak
Long Kam Folem Mi blong yia ia, we i stadi blong Doktrin mo Ol Kavenan bae i haelaetem olsem wanem Lod i putumbak Jos Ia blong Hem tru long ol lata-dei profet. Plante atikol long magasin blong manis ia i haelaetem ol blesing blong Restoresen.
Stap Lan aot long Magasin Ia
Tekpat long Kam Tugeta Ia
Long pej 2, Presiden Russell M. Nelson i serem ol wei we yumi save kam tugeta long Sevya, kam tugeta wetem Ol Sent mo kam tugeta long seves blong God. Tingting blong stap putum wan gol blong manis ia blong kontribiut long wan long ol trifala kaen kam tugeta ia.
Givim Seves insaed long Jos Ia we I Bin Kambak
Elda Patrick Kearon blong Kworom blong Olgeta Twelef Aposol i tokbaot ol janis we yumi gat insaed long Jos Ia blong Jisas Kraes we i bin kambak blong “givim seves long ol narawan wetem lav” (luk long pej 8). ?I gat ol pipol long wod o branj blong yu we oli stap traehad? Yu save prea from ol pipol ia mo askem insperesen long olsem wanem blong givim seves long olgeta.
Lanem Samting aot long Ofisol Toktok blong Restoresen
Long 2020, Fas Presidensi mo Kworom blong Olgeta Twelef Aposol i pablisim “Restoresen blong Gospel blong Jisas Kraes we I Fulwan: Tu Handred Yia Ofisol Toktok I Go long Wol” (luk long pej 40). Taem yu go tru long ofisol toktok blong Restoresen, maet yu save tingting long ol kwestin ia: ?Wanem ol ki samting we i tokbaot, mo olsem wanem nao Lod i givim daereksen blong ol samting we oli hapen ia?