Ol Blesing blong Restoresen

Plante yia i pas, mi bin filim plante se mi olsem yangfala Josef. Mi konfius tru long “wo ia blong ol toktok mo raorao blong ol tingting” (Josef Smit—Histri 1:10) we i stap kamaot long plante defren jos long Fiji. Long fastaem we mi mitim ol misinari, mi bin gat plante kwestin. Sam oli jikim mi se mi wan man we mi lanem samting slo from se mi spenem eit yia blong faenemaot ol infomesen abaot Jos. Fasin blong mi blong jenisim laef i stat tru long andastaning blong mi abaot nem blong Jos.

Long taem blong seves blong Hem long wol ia, Jisas Kraes i stanemap Jos Ia blong Hem. Taem i pas, doktrin mo prishud atoriti blong Jos Ia blong Hem i lus. Long dei blong yumi, Jisas Kraes i putumbak tru long Profet Josef Smit, semmak jos we Hem i stanemap taem Hem i bin laef long wol (luk long OL Toktok blong Bilif 1:6). Mo tu, Hem i givim komanmen tru long revelesen se, “Bae olsem ia nao oli mas singaotem jos blong mi long ol las dei, we i Jos Ia blong Jisas Kraes blong Ol Lata-dei Sent” (Doktrin mo Ol Kavenan 115:4).

!Jos i tekem nem blong Jisas Kraes from se hem i Jos blong Hem ! Afta long eit yia i pas, trutok ia i fulumap maen mo hat blong mi. Mi kasem baptaes taem mi gat 27 yia mo i no longtaem oli singaotem mi olsem kaonsela long presidensi blong Ol Yang Man mo wan eli moning seminari tija. Folem rod ia, testemoni blong mi i gohed blong gro.

Laef blong mi i jenis taem mi tijim seminari, mi go long sakramen miting mo lisin long jeneral konfrens. Mi filim wan kwaet filing tu blong kamfot mo paoa blong insperesen we i kam tru long Spirit taem mi stap ridim Buk blong Momon—wan samting we yumi save tajem olsem wan pruf mo we i soemaot klia Restoresen mo singaot blong Josef Smit we i kam wan profet.

Taem God i singaotem Josef “mo toktok long hem, mo givim ol komanmen long hem” (Doktrin mo Ol Kavenan 1:17), Hem i soem se Hem “i stap toktok long ol man mo i stap singaotem olgeta blong mekem tabu wok blong hem long taem ia mo long jeneresen ia, semmak olsem long taem blong ol jeneresen blong bifo;” mo se “hem i semfala God yestedei, tedei, mo blong oltaem.” (Doktrin mo Ol Kavenan 20:11–12).

Restoresen ia we i stat wetem Josef i stap gohed tedei. Olsem Ol Lata-dei Sent, oli singaotem yumi blong toktok tru long nem blong Sevya blong mekem “se fet … i save kam antap long wol,” “Blong kavenan blong [Hem] we i no gat en i save stanap,” mo “blong olgeta we oli no strong mo oli simpol bae oli talemaot ful gospel blong [Hem] kasem evri en blong wol,” (Doktrin mo Ol Kavenan 1:21–23). Yumi kasem blesing blong save help blong bildimap Jos mo rere long wol from dei we Jisas Kraes bae i kambak.

Fasin blong Talem Tangkyu long Profet Josef

Wan yia afta mi baptaes, mi mo waef blong mi, Anita, mitufala i travel i go long Nuku’alofa Tonga Tempol blong sil blong taem we i no save finis. Testemoni blong mi abaot Restoresen i bin mekem trip blong mitufala blong go long tempol i gat moa mining. !Gospel blong Jisas Kraes we i bin kambak, i tru tumas se i minim evri samting ia nao! Hat blong mi i fulap long fasin blong talem tangkyu from ol blesing we i tekem i kam long mi mo famli blong mi.

Ol gudgudfala blesing ia oli kam long wol tru long “Josef Smit, Profet mo Sia blong Lod, [we] i bin mekem moa, be i no moa bitim Jisas, from wok ia blong fasin blong sevem man long wol ia bitim eni narafala man we i bin laef long wol ia” (Doktrin mo Ol Kavenan 135:3). Oltaem yumi mas talem tangkyu from—mo no karemaot ae long—wanem we profet blong las dispensesen ia i bin givim long yumi.

Tru long Josef, yumi andastanem kavenan rilesensip blong yumi wetem Papa long Heven mo Jisas Kraes. Yumi gat prishud, ol odinens mo ol kavenan we oli bin kambak. Long eksperiens blong Josef insaed long Tabu Bus, yumi lanem se iven bifo Papa i introdiusum Pikinini blong Hem, Jisas Kraes, Hem i singaotem Josef long nem blong hem (luk long Josef Smit—Histri 1:17). Hem i save nem blong yumi tu. Mo semmak olsem we Hem i openem ol heven mo ansarem, simpol prea we i kamaot long hat blong wan boe we i gat 14 yia, Hem bae i ansarem tu ol prea blong yumi long tingting blong Hemwan, wei mo taem blong Hem, no mata yia blong yumi. Ol trutok ia oli fulumap sol blong mi. Mi witnesem se oli tru.

Mi hop se mi wan we i stap mekem gud samting long wol. Sapos yes hem i mi, be, Josef Smit i mekem plante moa blong kontribiut long hemia. Laef blong mi bae i no semmak long huia mi tedei, bae mi no save kam wan hasban o papa olsem we mi stap tedei, mo bae mi no hapi olsem tedei, sapos i no gat gospel ia we i kambak we Profet Josef i sakrifaesem laef blong hem blong tekem i kam long wol. Gospel i givim laet mo hop long mi. From hemia, oltaem bae mi talem tangkyu from Profet Josef.

Mi karem wan kopi blong Buk blong Momon long weaples mi go, mi stap hop blong givim long wan mo introdiusum gospel blong Jisas Kraes we i bin kambak long olgeta. Mi bin givimaot handred kopi truaot long wol. Mi laekem tumas blong serem mesej blong Restoresen—enitaem, eni ples.

Hemia i tru, speseli taem mitufala i stap tijim mo stap testifae long ol pikinini blong mi wetem Anita insaed long ol wol blong hom blong mitufala. Pikinini gel blong mitufala, naoia i stap givim seves long wan misin long Niu Yok Siti, YSA. Mitufala i bin talem long hem “Go mo testifae abaot Sevya long saed blong yu long wol. Mama mo papa blong yu bae tufala i mekem semmak long pat blong wol long saed blong tufala.” Mifala i laekem tumas blong stap apdeitem mifala long seves blong mifala. Mo naoia mitufala i gat wan apupikinini gel we i gat fo yia. Hop mo filing blong hat blong i wantem se bae oltaem hem i harem mo oltaem gohed blong tingbaot Bubuman blong hem we i stap testifae abaot Sevya mo gospel blong Hem.

Yumi evriwan i save testifae abaot ol blesing blong gospel we i bin kambak—enitaem, eni ples—taem yumi stap laef mo stap wan eksampol blong wan disaepol blong Jisas Kraes. Yumi save serem Buk blong Momon: Wan Narafala Testeman blong Jisas Kraes. Mo yumi save testifae se Jisas Kraes i bin putumbak gospel blong Hem we i fulwan mo i stap lidim Jos blong Hem tedei. Presiden Russell M. Nelson i bin tijim se “revelesen i stap gohed blong kam long Lod long taem blong Restoresen ia we i stap gogohed.” Mi testifae se hemia i stap gogohed tru wan laen blong ol ki blong prishud we i no brok we ol profet, ol sia mo ol reveleta oli gat, we oli givim insperesen, lidim mo helpem yumi blong fasem yumiwan i go long Sevya, Jisas Kraes.

Hemia i witnes mo testemoni blong mi. Oltaem bae mi glad blong serem mo neva gat tu tingting long hem.