God I Soemaot Klia Ol Wok blong Hem

Mi gat wan apoenmen we oli putum taem blong mi go luk dokta blong bren, afta sam dei i pas, be long moning ia blong Jenuware, bigfala sista blong mi, Keli, i kasem insperesen se famli blong mi i mas tekem mi i go long imejensi rum long wan hospital we i stap kolosap. Kwiktaem ol dokta oli rikwestem wan temografi skan long kompiuta (KT) mo sam long ol fas tes blong faenem sik blong katemdaon fos blong klia wota ia long skal. Nekis dei, mi gat tu MRI (wei blong mekem ol pikja blong ol pat blong bodi insaed). Afta, wan dokta we i wok speseli wetem ae i jekem mi.

“?Hamas fingga nao yu save luk?” hem i askem, i leftemap sam fingga stret long fes blong mi. Mi no save luk eni samting.

Afta we hem i mekem ol tes mo jekem mi finis, hem i talem long en se, mi gat ol saen blong giaman kansa long bren mo wan sik we i afektem ae. Nogat wan long tufala sik ia i responsibol long sik long ae blong mi. Hem i eksplenem se wetem series kondisen blong ae blong mi we i blaen, blong save mekem i kam gud bakegen, bae i save tekem ova wan yia olsem mo maet bae mi nomo save lukluk bakegen. Hem i givim advaes blong mi mas tekem ol meresin mo ol stik mo ol narafala medikesen.

Afta, hem i go, mi stat blong stap krae. Mama blong mi i toktok long mi blong karemaot wari long mi, “Sapos yu no save holemtaet fet blong yu naoia, yu save dipen long fet blong mifala.”

Long nambatri dei blong mi long hospital, dokta blong mi i askem blong mi go long wan MRV (wan tes we bae oli pusum yu i go insaed long wan masin blong kompiuta i save skanem ol insaed bodi blong yu) blong pat blong bren we i kontrolem tingting, mo filing, blong lukaotem sapos i gat wan bren kansa o wan ples we i blok. Long 4:00 klok long moning, tu dei afta we mi wekap mo mi blaen, mi statem wan faef aoa MRV. Blong stap rere, famli blong mi i mekem plan blong prea mo fast from mi long moning ia. Papa blong mi we i slip wetem mi long saed long wan jea evri naet long rum blong mi long hospital, i givim wan narafala blesing long mi—nambatu blesing aot long sam we mi bin kasem finis.

Taem wan teknisen blong hospital i askem sapos mi wantem blong lisin long miusik long taem blong tes, mi askem ol singsing blong fevret singga blong blong mi. Teknisen i putum tu pis blong raba iafon long tufala sora blong mi mo putum hed blong mi daon long wan fes mask blong mekem se mi no muvmuv. Long taem we hem i stap mekem, kolosap hem i bangem ol iafon aot long sora blong mi. I had blong mi harem eni miusik taem we oli statem MRV tes blong mi.

From we i tekem tumas taem blong go tru long tes ia, mi filim ples i hot tumas insaed long bigfala masin ia. Afta we mi luk se i tekem tumas taem, oli talem long mi se mi mi oraet mo blong gohed bakegen blong smol moa taem. Be mi filim fraet mo wari long hot, ol saon we i laod, mo ol samting we oli holem mi blong stap kwaet.

Long saelen prea, mi krae strong: “Papa long Heven, plis givim kamfot long mi. Mi stap miwan nomo. Mi nidim help blong Yu. Mi nidim famli blong mi.”

Kwiktaem, wan miusik blong piano i kam kwaet long sora blong mi. I kam long wan long ol fevret singsing blong mi—wan we smol sista blong mi, Morgan i bin stap plei long hem long piano. Mi no bin ting se bae mi harem long iafon ia we i slak i stap, ova long noes blong masin ia. I olsem se, Morgan i stap wetem mi, mo we mi no stap miwan. Noes ia i ronwe. Ples i nomo hot. Fraet blong stap insaed long masin ia i ronwe.

Mi filim se spirit blong mi i kamaot long bodi blong mi, olsem mi stap flot long wan solwota antap long spes. Mi filim lav blong God i raonem mi mo wetem lav blong famli blong mi. Olsem ia nao, wari blong mi godaon. Hem i haf pas seves long moning, taem we famli blong mi oli stat blong livim kaekae from mi. Narafala faef aoa blong MRV i pas i go kwiktaem, mo afta, mi harem, “Yu finis ia nao.”

Lav we mi bin mi filim long eksperiens ia i mekem wota blong ae blong mi i fulap mo i karemaot wari we mi bin filim long taem we mi stap long hospital. Mi no bin save sapos bae mi save lukluk bakegen, be mi save se God i bin stap long ples ia mo i bin harem prea blong mi. Afta fo dei i pas long hospital, oli rilisim mi.

Evri dei blong nekis tu wik, mi gobak long hospital blong karem medikesen, mo evri dei mi lukaotem wan jenis long ae blong mi—ples we mi luk i tudak i stat blong lus mo kam grei, mi save laen we i mekem sep blong ol fingga long fored blong fes blong mi, kala orenj long TV we i stap muvmuv ia, i stat blong tanem i kam wan floa. Evri smosmol jenis ia i wan samting we mi winim.

Tu wik afta we oli rilisim mi, wan tes i soemaot se lukluk blong mi i bin stap long siro we i go kolosap blong tufala ae blong mi i kam stret mo gud evriwan.

“Bronwyn, ?wanem i bin hapen?” spesel dokta blong ae blong mi, i askem.

Mi ansa, “Yes, mifala i bin stap prea, mo mi bin kasem ol blesing.”

“Hemia i wan bigfala merikel!” hem i talem. “Mi neva luk hemia i hapen. Yumi no save kasem ol risal olsem o iven kolosap olsem ia, blong samples afta sikis manis olsem.”

Afta, hem i talem long mi se, i had blong olgeta we oli blaen we oli gat siro lukluk, blong oli save lukluk bakegen kwiktaem olsem. Long wan wik taem ia, mi bin kam wan long ol nogud blaen wan blong hem i go long bes blaen wan blong hem.

Long en blong 2022, ol lida long wod blong papa blong mi, oli jusum wan stamba toktok blong wod blong yia 2023. Hemia i bin kam tru long insperesen tijing blong Presiden Russell M. Nelson,we long stat blong yia ia, i bin talem, “Lukaotem mo wet long ol merikel.”

Long tetaem ia, papa blong mi i ting se stamba toktok ia bae i save helpem ol memba we oli stap go tru long ol hadtaem. Hem i no tingting se bae hemia i kam wan problem long wanwan long mifala insaed long famli.

Stamba toktok i rid olsem, “Folem Laet blong Kraes”. “!Wet long ol merikel! !Wet blong kasem glad!”

Tu yia i pas, lukluk blong mi i kam moa gud naoia i bitim taem we mi blaen. Mi talem tangkyu long Papa long Heven evri dei from merikel blong mi mo from fet blong famli blong mi we i no stap muvmuv. Tru long tes ia, God i soemaot klia wok blong Hemwan. Mi mekem testemoni blong mi i gro moa strong, glad blong mi abaot laef i kam mo dip, mo lav blong mi long Hem, famli mo ol fren blong mi i kam mo bigwan.

Tedei, mi stap mekem evri samting we mi save mekem, we i tekem tu, mi olsem wan woman blong stap dro, blong yusum ol blesing, talen mo glad we God i bin givim long mi—blong givim glori long Hem mo blesem ol narawan.