?Misin Kol blong Mi I wan Mistek?

Tu yia insaed long wok blong mi long saed blong ol kos blong digri long matematik mo faenens, mi bin kasem wan strong filing tru long Spirit blong go long wan misin. Mi jusum blong givim seves, nomata se bae mi lusum sam long ol sko we mi kasem long kolej, we bae oli mas karemaot taem mi no yusum.

Wan sot taem afta, taem mi ridim misin kol blong mi blong go long Yuta Sol Lek Siti Sentrol Misin, taem ia mi filim se i no tru nomo. Mi no save eniwan we i bin go givim seves long misin long Sol Lek Siti. Mi ting se ating mi bin openem rong misin kol. Taem mi kam long Sol Lek Siti, mi filim se evri samting we mi bin save, oli karemaot long mi. Mi luk se mi stap long long wan baeskel long sno mo no gat eni aedia long olsem wanem blong stap wan misinari. Wetem defren kalja mo sisen blong ol weta, mi filim olsem se Sol Lek Siti i stap longwe we longwe long Saot Afrika, olsem we bae mi travel.

Long fas eria blong mi, mi mo kompanion blong mi i visitim wan memba blong gat dina wetem hem we nem blong hem, Chris Ruppel. Hem i askem sapos wan long mitufala i save miusik. Kompanion blong mi talem smol se mi save plei piano mo singsing, so, mi singsing wan singsing long famli ia. Afta, wan spesel samting i hapen. Brata Ruppel i lukluk long mi mo talem, “Elda Vizzini, sapos yu gohed blong singsing olsem ia bae yu kam wan sakses misinari.” Mi tingting se i naes tumas blong hem i talem olsem ia be mi no tingting tumas long toktok ia.

Sam manis i pas, wetem brata Ruppel, mi helpem hem blong oganaesem wan misinari faeasaed blong miusik. Long evri eria we mi wok long hem, mifala i yusum semmak plan ia blong mekem faeasaed. Plante pipol oli tekpat wetem mifala, stat long ol memba blong stek go kasem ol lokol popula singga mo ol memba blong ol narafala jos. Mifala i tij abaot Sevya tru long miusik long ol pipol we oli no wantem blong sidaon mo go tru wan lesen. Mi lanem se, miusik i save tajem hat blong tugeta, ol puaman mo olgeta we oli rij, olgeta we oli kasem edukesen mo olgeta we nogat edukesen.

Misin blong mi i bin tijim mi se, mi save mekem ol had samting. Taem mi wok long wan eria we i stap longwe mo i defren plante long hom blong mi, mi lanem se evriwan i wan pikinini blong God. Mi bin luk ol merikel long laef blong ol pipol long narasaed blong wol long Yuta, mo mi bin luk olgeta long ples ia, long Saot Afrika. Mi save se, sapos yumi gat fet ia nomo, ol merikel i save hapen long wanwan laef blong yumi (luk long Momon 9:15–21).