“Hemia I Presen blong Yu,” Liahona, Jenuware 2025.
Ol Voes blong Ol Lata–dei Sent
Hemia I Presen blong Yu
“Papa long Heven,” mi prea, “?wanem talen nao bae mi developem blong blesem ol pikinini blong Yu?”
Olsem wan yang woman, Yanina i kasem insperesen blong save se singsing i wan talen we hem i save yusum blong blesem ol narawan. Afta, oli bin jusum hem olsem wan long ol memba blong intanasonol blong singsing wetem Tabenakol Kwaea long taem blong jeneral konfrens (foto oli tekem long Sol Lek Tabenakol).
Taem Presiden Gordon B. Hinckley (1910–2008) i bin visitim Ekuado long 1999, mi harem hem i talem, “Wanem we yu jusum blong mekem, mekem bes we yu save mekem.”
Olsem wan pikinini, mi lanem se God i givim ol talen long yumi we i letem yumi blong blesem ol narawan (luk long Moronae 10:8–18). Mi prea se, “Papa long Heven, ?wanem talen nao bae mi developem blong blesem ol pikinini blong Yu?”
Long taem we mi gat 16 yia, mi stat blong stadi long singsing folem toktok blong daerekta we i givim blong leftemap tingting blong mi we i stap long lokol miusik skul. “Yu gat wan voes we i naes tumas,” hem i talem long mi.
Taem ol man we oli stap wajem mi taem mi singsing oli klapem han blong olgeta afta long fas taem we mi singsing, wan toktok i kam klia long maen blong mi se: “Hemia nao talen blong yu.” Mi krae from ansa blong prea blong mi i kam. From long kantri blong mi, i had tumas blong mekem wan man o woman i kam wan singga. Be mi save se Lod i mekem rere wan rod. So, mi gohed blong stadi long singsing, mi traehad blong mekem evri bes blong mi blong kam gud.
Taem mi kasem 19 yia, mi kasem wan skolasip blong stadi ovasi. Janis ia mo semmak nara janis, be, oli no bin hapen. Taem mi kam blong andastanem, mi save we Lod i wantem mi blong stap long Ekuado.
Ol pipol oli bin talem long mi se mi no gat fiuja long miusik from se mi no popula long edukesen blong singsing long ovasi, mi no gat rij samting o oli luksave nem blong mi raon wol. Be mi save se God i gat wan plan blong mi, mekem se mi yusum talen blong mi blong stap givim seves insaed long Jos, long ples ia, mi fomem grup blong singsing ol kwaea, mi daerektem ol miusik, mo mi traem blong givim insperesen long ol narawan blong developem ol talen blong olgeta.
Afta, taem oli givim wok long mi long wan televisen stesen, mi wari abaot ol temtesen we i kam wetem ol indastri blong miusik. Be ansa blong ol prea blong mi i we, “Akseptem wok ia mo soem se yu save kam wan singga be no putumdaon ol standet blong yu from hemia.”
Mi bin wok olsem ol televisen prodaksen , olsem wan asisten blong lidim ol miusik blong Symphonic Kwaea blong Guayaquil, mo stap insaed long Haos blong Kalja blong Ekuado blong provins blong Guayas.
Mi testifae se, i posibol blong mekem ol drim blong yumi i kam tru be i no blong sakrifaesem ol prinsipol blong yumi. Tedei, kantri blong mi i luksave nem blong mi mo long wok blong mi—tangkyu long komitmen blong mi blong laef folem gospel mo developem ol talen we Papa long Heven i givim long mi.
Taem yumi obei long tingting blong Papa blong yumi, ol samting we i no posibol oli kam posibol (luk long Matiu 19:26). Mi save Hem i lavem yumi mo wantem blong helpem yumi blong developem ol talen blong yumi blong blesem ol narawan.