“Stap Tingbaot From Wanem Mi Laef Folem Gospel Ia,” Liahona, Jenuware 2025.
Ol Yang Adalt
Stap Tingbaot From Wanem Mi Laef Folem Gospel Ia
Stap rimaenem miwan long ol risen blong mi abaot “from wanem” i pusum mi blong kam moa kolosap long Sevya mo folem i go tru long ol gol blong mi long saed blong spirit.
Sam taem mi gat tingting we i fasfas, be mi laekem filing blong kamfot we mi filim taem mi wokbaot i go insaed long japel. !Hemia i wan long ol risen from wanem mi laekem tumas blong go long jos!
Mo taem mi tingbaot wanem we mi laekem tumas abaot gospel—eksampol, olsem blong filim Tabu Spirit—mi filim moa insperesen blong folem i go tru wetem ol evri dei fasin blong mi long saed blong spirit, olsem blong stap go long tempol, stap ridim ol skripja mo stap prea i go long Papa long Heven.
From laef i save kam bisi tumas, i save kam isi blong fogetem ol simpol samting we yumi laekem tumas. Be blong stap rimaenem miwan oltaem long ol risen blong from wanem mi laef folem mo lavem gospel blong Jisas Kraes, i helpem mi blong riniu ol gol blong mi long saed blong spirit we bae oli tekem mi i kam moa kolosap long Papa long Heven.
Stap Putum Ol Niu Gol long Saed blong Spirit
Long stat blong evri yia, mi laekem blong luklukbak mo luk sapos i gat eni jenis wetem ol gol blong mi long saed blong spirit, taem mi stap raetemdaon ol samting blong mekem long niufala yia blong stretem. Sapos yu tu yu stap mekem wan smol tingting blong lukluk long yuwan, mo tingting long olsem wanem blong mekem rilesensip blong yu wetem Kraes i kam moa gud long niu yia ia, askem yuwan kwestin ia:
“?From wanem mi laekem tumas gospel blong Jisas Kraes?”
Sista Ann M. Dibb, foma Seken Kaonsela long Yang Woman Presidensi, i eksplenem se “lav blong yumi long gospel i gro taem yumi eksperiensem lav blong Papa long Heven mo pis we Sevya i promesem, taem yumi soem long Hem se yumi wantem blong obei mo folem Hem.”
Blong save from wanem yu laekem tumas gospel, bae i helpem yu blong filim mo luksave lav we Papa long Heven mo Jisas Kraes i gat long yu. Putum tingting long hemia oltaem, bae i helpem yu blong no filim se i tumas long yu taem yu stap traehad blong putum mo kasem ol gol blong yu long saed blong Spirit.
Tingting blong mi blong “from wanem” blong stap laef mo lavem gospel blong Jisas Kraes, we i tekem tu, save ia se ol famli oli save stap tugeta blong oltaem mo pis we mi filim afta wan prea we i kam long hat blong mi i go long Papa long Heven.
Wanem kaen tingting blong “from wanem” we yu gat, holemtaet i stap wetem yu—bae i givim long yu paoa blong faea blong spirit yu nidim blong kam wan moa gud disaepol blong Jisas Kraes.
Stap Laef Folem Tingting blong Yu blong “From Wanem”
Stret long taem we mi luksave from wanem mi bin stap laef folem gospel, wei we mi stap yusum blong putum ol gol blong mi long saed blong spirit i jenis. Mi stop blong tingting abaot wanem mi bin stap fel blong mekem mo tingting moa long wanem mi save mekem. Mi tingbaot se mi laef folem gospel from se mi lavem Sevya blong mi.
Elda Dieter F. Uchtdorf blong Kworom blong Olgeta Twelef Aposol i bin talem: “Yumi nid blong akseptem se olgeta komanmen blong God oli no jes wan longfala lis blong ol gud tingting Oli ol tabu kaonsel, we oli stanap long ol trutok we oli no save finis, we God i givim blong putum pis long wol ia, mo laef we i no save finis long wol we bae i kam’ [Doktrin mo Ol Kavenan 59:23].”
Blong stap folem i go tru wetem ol gol blong mi long saed blong spirit, i rimaenem mi long huia mi: wan tabu pikinini blong papa mo mama long heven. Prinsipol ia i givim strong paoa long tingting blong mi blong fesem ol wari mo ol samting we mi no strong long hem tru long Jisas Kraes (luk long Ita 12:27).
Presiden Russell M. Nelson i bin tijim se: “Lod i no askem long yumi blong kam stret gud evriwan naoia, long taem ia blong progres blong yumi long laef we i no save finis. Be Hem i askem yumi blong stap kam antap long fasin blong kam klin evriwan.” So, mi stap traem bes blong mi evri dei blong stap kolosap long Jisas Kraes mo tingbaot from wanem mi jusum blong folem Hem.