Glad Tumas blong Kam Tugeta

Wetem Ol Brata blong mi insaed long Fas Presidensi mo Kworom blong Olgeta Twelef Aposol, mifala i talemaot se: “Jos ia i angka long stret laef blong jif konaston blong hem, Jisas Kraes, mo long Atonmen blong Hem, we i no gat en, mo long stret Laef Bakegen long Ded blong Hem Hem i stap invaetem yumi evriwan blong go long Hem mo long Jos Ia blong Hem, blong kasem Tabu Spirit, ol odinens blong fasin blong sevem man, mo blong kasem glad ia we i stap oltaem.”

From se Restoresen i stap muv i go fored tru long revelesen we i stap gohed blong kam, “wol ia bae i neva semmak bakegen, from se God bae i ‘putum evri samting i kam joen wanples long Kraes’ (Efesas 1:10).”

“Evri samting” we i tekem tu, ol sipsip blong Hem. Sevya i stap singaotem yumi blong livim evri rabis fasin blong wol i stap biaen mo kam tugeta long Hem. Hem i wantem ol sipsip blong Hem blong stap wan laet we i saen gud, blong putum wan standet blong ful wol, blong soemaot olsem wanem wan tru disaepol i laef, we i tekem tu, olsem wanem oli eksperiensem tru glad taem oli mekem laef blong olgeta i lukluk nomo long Sevya.

Yumi kam tugeta long Sevya taem yumi kam long Hem (luk long Matiu 11:28) taem yumi eksasaesem fet tru long fasin blong sakem sin, akseptem blong baptaes blong kam insaed long Jos blong Hem, mo kasem presen ia we i Tabu Spirit.

Yumi kam tugeta long Sevya taem yumi eksperiensem hiling long saed blong spirit we i kam taem yumi stap tekpat long sakramen, stap olsem wan witnes taem yumi wantem blong tekem long yumi nem blong Hem, oltaem tingbaot Hem, mo obei ol komanmen blong Hem (luk long Doktrin mo Ol Kavenan 20:77, 79).

Yumi kam tugeta long Sevya taem yumi fulumap laef blong yumi evri dei wetem ol toktok blong Hem mo trutok, we i tekem tu, ol tijing blong ol profet blong Hem, ol sia mo ol reveleta.

Yumi kam tugeta long Sevya taem yumi mekem janis blong yumi blong harem Hem i kam moa gud, stap klin inaf blong harem ol kwaet toktok blong Tabu Spirit.

Yumi kam tugeta long Sevya taem yumi mekem fasin blong yumi blong jenisim laef i kam moa strong, mekem fet blong yumi i kam antap, mekem fasin blong yumi blong stap wan disaepol i kam mo strong, folem eksampol blong Hem, mo traehad blong kam gud smosmol evri dei.

Yumi kam tugeta long Sevya taem yumi mekem ol tabu kavenan mo kasem ol tabu odinens insaed long tempol.

Yumi kam tugeta long Sevya taem yumi gat fasin blong save wet longtaem mo strong paoa long tingting “blong stap biaen long evri samting we Lod i tingting blong putum long [yumi]” (Mosaea 3:19).

Laswan, yumi kam tugeta long Sevya taem yumi tij mo testifae abaot Hem, stap invaetem ol famli blong yumi, ol fren, mo ol neba blong kam tugeta wetem yumi i go long “laet, laef, mo hop blong wol.”

Taem yumi kam tugeta mo gat yuniti olsem ol memba blong Jos Ia blong Jisas Kraes blong Ol Lata-dei Sent, yumi kam insaed long felosip mo kompanionsip wetem wanwan long yumi. Yumi sapotem, tijim mo givhan long wanwan long yumi. Yumi traehad blong folem ol toktok blong Sevya, blong “stap wan” (Jon 17:21; luk tu long Doktrin mo Ol Kavenan 38:27) mo blong “lavlavem yufala” (Jon 13:34).

Presiden Dallin H. Oaks, Fas Kaonsela long Fas Presidensi, i bin tijim se, “ blong go long Jos i givim yumi paoa mo moa fet ia we i kam taem yumi joen wetem ol man we oli biliv mo stap wosip tugeta, taem yumi joen wetem olgeta we oli stap traehad blong stap long kavenan rod mo stap ol moa gud disaepol blong Kraes.”

Long Jos yumi faenem spel mo kambak niu long saed blong spirit. Yumi faenem ol odinens mo prishud atoriti blong givhan long olgeta. Yumi faenem trutok we i bin kambak, klin doktrin mo revelesen blong wanwan man o woman. Yumi faenem ol han blong givim welkam, ol hat blong givim kamfot, mo ol voes blong leftemap tingting. Yumi faenem ol janis blong laef folem tu bigfala komanmen (luk long Mak 12:30–31).

Lod i bin wonem yumi se “enemi i joen wanples” (Doktrin mo Ol Kavenan 38:12). Blong protektem ol famli blong yumi mo paoa blong setan we i stap gro, fasin blong stap wosip tugeta olsem Ol Sent i gat moa nid blong mekem.

Profet Josef Smit i bin tijim se “Yuniti” “hem i paoa.”

Mo tu, Profet Josef i talem se, “Ol dei ia i kwik mo stap muv hariap we restoresen blong evri samting bae i hapen we ol tabu profet oli bin profesae long olgeta, iven long saed blong stap karem i kam tugeta insaed long haos blong Isrel.” Wan long olgeta we i bin profesae tu i bin Jeremaea insaed long OlTesteman:

“Luk, i gat dei i stap kam we ol man bambae oli nomo talem se, ‘Hae God i laef, i stap we i stap, mo hem i God we i tekemaot ol man blong hem long Ijip bifo;

“Hae God i laef, i stap we i stap, mo hem i God we i tekemaot ol man blong hem long kantri ya long Not mo long ol narafala kantri we hem i mekem olgeta oli go stap olbaot long hem, nao i tekem olgeta oli kambak long kantri” (Jeremaea 16:14–15).

Profet Josef i talemaot moa se, “Yumi ol pipol we God i jusum blong yumi mekem Lata-dei glori i hapen.” … taem Ol Sent blong God bae oli kam tugeta olsem wan, aot long evri nesen, famli, lanwis mo pipol.”

Blong mekem wok ia i hapen, “Mi bambae mi sanem tok i go long ol man, blong oli kam pulum yufala, olsem we man i pulum fis. Mo bambae mi sanem ol man blong lukaot mit long bus, blong oli go lukaot yufala olbaot long ol hil, mo long ol hol long ston.” (Jeremaea 16:16).

Ol brata mo sista, olsem ol lata-dei kavenan Isrel—ol memba blong Jos blong Jisas Kraes we i bin kambak—yumi ol man blong Lod blong pulum ol narawan i kambak mo blong lukaot ol narawan olbaot. Oli singaotem yumi blong karem i kam tugeta olgeta we Hem i bin jusum, aot long evri maonten, hil mo smol vilej we i no gat jos. Oli singaotem yumi blong givim janis long ol pikinini blong God blong kam olgeta we oli gat ples we i fulwan long evri samting we Hem i bin promesem long ol fetful pikinini blong Hem. Hemia nao i bigfala seves we yumi we oltaem yumi save mekem.

Yumi mekem i hapen tabu wok ia taem yumi stap karem i kam tugeta Isrel long tugeta saed blong vel—blong stap serem gud nius blong Restoresen wetem ol narawan, stap lukaotem ol bubu blong yumi blong bifo, mo stap mekem ol defdefren odinens long bihaf blong olgeta insaed long tempol. Mo tu, yumi mekem wok ia i hapen taem yumi serem lav blong Sevya tru long seves blong yumi, eksampol, testemoni mo invitesen blong yumi i go long ol narawan blong joenem yumi.

“Lod i stap lidim Restoresen blong gospel blong Hem mo Jos blong Hem,” Presiden Henry B. Eyring, Seken Kaonsela long Fas Presidensi i talem. “Hem i stap go fastaem long yumi. Hem i save fiuja evriwan. Hem i stap invaetem yu blong wok. Hem i joenem yu long wok ia.”

?Wanem i hapen long poket waj blong Bubuman Nelson? Sam yia i pas, mi bin pasem i go long pikinini boe blong mi. Olsem we i mekem long mi, waj ia i konektem hem wetem ol stret bubu blong hem blong bifo mo rimaenem hem long diuti blong hem i go long ol pikinini blong hem.

Mo afta, i gohed olsem. Wanwan kavenan jeneresen i karem i go wok blong Lod, blong stap mekem pat blong hem taem oli mekem wol i rere from Seken Kaming blong Jisas Kraes.

Letem yumi talem tangkyu oltaem from spesel janis ia mo tras we Lod i bin givim long yumi taem yumi kam tugeta long Sevya, kam tugeta wetem Ol Sent mo kam tugeta insaed long seves blong Hem.