Oli Nidim Evriwan insaed long Bodi blong Kraes

Jeneral sajen blong Y.S, jif helt eduketa blong Yunaeted Stet, i serem toktok ia abaot hamas ol rilesensip oli impoten: “Fasin blong stastap yuwan mo wantem stap longwe aot long ol narawan, we i kam moa bigwan raon long wol, i kam wan had samting blong pablik i tekem i series, we i bin stap spolem helt blong wanwan man o woman mo ol sosol rilesensip. Ol rilesensip blong yumi oli wan stamba ples blong kasem hiling mo kamfot we man i no save luk be i stap From we i gat ol impoten risal blong fasin blong stastap yuwan mo stap longwe aot long ol narawan, yumi mas putum i kam faswan fasin blong stap bildimap sosol koneksen long semmak wei we yumi stap tekem ol pablik helt problem i kam moa impoten Tugeta, yumi save bildim wan [sosaeti] we i moa helti, moa strong, fasin blong stastap yuwan i godaon, mo stap konek oltaem wetem ol narawan.”

Tugeta yumi save help blong bildim wan wol waed rilesensip blong ol sista nomata yia blong olgeta we i moa helti, mo strong, fasin blong stastap yuwan i godaon, mo stap konek moa wetem ol narawan from kavenan rilesensip blong yumi wetem God mo responsabiliti blong yumi long wanwan long yumi olsem wan disaepol blong Kraes.

Sevya blong yumi i bin talem se: “Nao from we yufala i stap lavlavem yufala, bambae olgeta man oli luksave se yufala i man blong mi” (Jon 13:35).

Yumi save help blong mekem fasin blong stastap yuwan i godaon taem yumi stap krietem fasin blong stap givim welkam mo ol sef spes raon long ol kongregesen blong yumi mo speseli insaed long Rilif Sosaeti blong yumi, we long ples ia evriwan i save filim lav blong Lod from se, lav blong yumi i raonem olgeta.

Eksperiens blong yumi long jos i blong givim ol impoten koneksen ia wetem Lod mo wetem wanwan long yumi, we yumi nidim tumas blong bodi, ol filing mo gudfala laef blong yumi. I gat bigfala paoa insaed yuniti mo naes samting aot long filing blong stap defren; evriwan i bodi blong Kraes (luk long 1 Korin 12:12–27). Semmak olsem ol bigfala red wud tri we i konek wetem ol rus blong olgeta mo oli save stanap strong agensem ol fos blong neja, from se oli stanap tugeta, yumi nid blong joenem ol han, stanap tugeta, mo mekem wanwan long yumi i kam moa strong aot long ol strong win blong laef.

Taem yumi kam blong save gud olgeta we oli filim se oli defren long yumi, yumi kam blong luksave se yumi gat plante samting i semmak bitim we yumi stap tingting long hem. Wanwan man o woman i gat plante samting blong kontribiut long hem, plante naesfala mo ol defdefren eksperiens blong laef we i save blesem laef blong yumi. Blong stap lisin long ol stori blong ol narawan mo lukaotem blong andastanem olgeta, bae i jenisim hat blong yumi, mo ol jajmen mo fraet we maet yumi bin gat we i go long sam long olgeta, oli save riplesem wetem ol filing blong talem tangkyu blong gat olgeta long laef blong yumi.

Lod i save helpem yumi blong lukluk ol narawan olsem we Hem i stap lukluk olgeta, mo Hem i save fulumap hat blong yumi wetem lav, givim paoa long yumi blong save leftemap, givim kamfot, laflaf wetem, krae wetem mo leftemap tingting blong olgeta we oli stap raon long yumi. Hem bae i helpem yumi blong save wanem yumi nidim mo olsem wanem blong stap wan blesing long ol narawan long rod blong olgeta.

Yes, i gat Wan nomo we i save andastan fulwan mo gat sore we i stret evriwan. Olsem pat blong atonmen mo sakrifaes blong Hem, Hem i safa “long ol harem nogud long ol sobodi mo fulap hadtaem mo temtesen blong evri kaen; … [mo i tekem] long hem ol sobodi mo ol sik blong ol pipol blong hem” (Alma 7:11) mekem se yumi save gat hop se, yumi neva stap yumiwan.

Oli singaotem wanwan long yumi blong lavem mo givhan long ol pikinini blong Papa long Heven olsem we Sevya bae i mekem. Yumi patna wetem Hem blong stap blesem ol narawan blong mekem se, tugeta olgeta mo yumi i save filim lav blong Sevya we i moa fulwan. Letem yumi joenem ol han mo wokbaot wetem glad i gobak long hom blong yumi wanwan. Mi testifae se hemia i tabu wok we oli singaotem yumi evriwan blong mekem.