“Mane I No Save Pem Hapines, be Kraes I Givim Glad Fri Nomo,” Liahona, Jenuware 2025.
Ol Yang Adalt
Mane I No Save Pem Hapines, be Kraes I Givim Glad Fri Nomo
Taem we fasin blong no wantem lego mane i tekem ples ova long ol samting we mi stap putum i kam faswan, mi luksave se mi stap jusum ol samting blong wol ova long Papa long Heven.
Ol foto blong man we i raet i kam long Stephen Neilsen
Taem mi stap gro i kam antap, mi gat plante samting we mi wantem mekem long laef. Mi luk ol pipol we yia blong olgeta i semmak long mi, oli stap mekem mane finis mo oli stap faenem sakses long sosol media. Mi wantem nomo blong kam olsem olgeta.
Taem mi stap go long yunivesiti mo stap lanem blong laef miwan, mane i kam fas samting long mi. Evri samting we mi wantem i blong kwalifae from ol skolasip, sevem mane, mo stap rere from fiuja wok blong mi long saed blong art.
Iven ol pej blong mi long sosol media i fulap wetem ol mesej abaot fasin blong mekem mane o eni samting, long saed blong invesmen, mo ol smosmol wok long saed blong mekem ekstra mane. Mi wari se sapos mi no tekem evri janis we mi gat blong stap tingting waes wetem mane blong mi, bae mi no save gat i naf mane blong sapotem mi.
Mi holemtaet kalja ia, mi stap tingting se bae hemia nao i mekem mi hapi mo gat sakses. Oltaem mi stap lukluk nomo long mane mo stap talem long miwan se wan dei, taem mi gat moa mane, bae mi save mekem moa donesen i go long ol jareti oganaesesen mo kam wan moa gud woman long wei ia.
Mi no bin luksave long tetaem ia, be taem tingting blong mi blong wantem mane i tekem ples blong ol fas samting long laef blong mi, mi stat blong stap lusum glad long laef blong mi. Mi kam antap bigwan long fasin blong stap jalus, speseli wetem olgeta we oli stap gat moa mane.
Mi stat blong wantem gat moa sakses long sosol media, long wok blong mi, mo iven wetem, wei we ol man bae oli lukluk long mi. Be i olsem se, taem mi traehad blong kasem sakses, mi filim se mi gat smol sakses nomo—mo moa, mi kam blong stap longwe long Papa long Heven.
Stap Luksave Ol Samting blong Wol
Afta wan yia i pas taem mi stap filim olsem, mi stap lisin long wan toktok blong Presiden Dallin H. Oaks, Fas Kaonsela long Fas Presidensi. Mi filim hat blong mi i foldaon taem mi harem hem i tokbaot stret wanem kaen man mi stap kam olsem:
“Iven tedei, sam we oli talemaot fasin blong stap wan Kristin Man, ol samting blong wol i pulum tingting blong olgeta nao moa—ol samting we oli sapotem laef long wol ia, be oli no fidim olgeta blong kasem laef we i no save finis.”
Mi ting se mi save mekem tugeta i kam ol fas samting long laef blong mi semmak taem, be ol toktok blong Presiden Oaks mo niufala tingting ia long Matiu 6:24 i pruvum se i tru: “I no gat man we i save wok blong tu masta wantaem: bambae hem i laekem wan, be i no laekem narawan, i agens long hem. Yufala i no save mekem we God i bos blong yufala, be long semtaem nomo, mane tu i bos blong yufala.”
Taem we maen blong mi i stap long ol samting we i blong wol, mi luk se i kam moa had blong tekem gospel i kam series. Mi no andastanem olsem wanem blong stap go long jos mo ridim ol skripja i save helpem mi wetem ol samting we mi wantem blong mekem long laef blong mi.
Long taem we mi stap gohed blong stadi moa long edukesen blong mi mo stap kasem wan gudfala mane aot long ol hadwok blong mi, mi stap putum olgeta i kam faswan tumas long laef blong mi. Ol samting ia oli kontrolem mi. Mi luksave se bae mi nomo hapi kasem taem mi lanem blong jenisim ol samting we tingting blong mi i stastap long olgeta.
Stap Lukluk Nomo long ol Samting We Oli Moa Impoten
Mi prea long Papa long Heven mo askem Hem sapos Hem i save helpem mi blong stat blong stap lukluk nomo long ol samting we oli moa impoten. Mi stat taem mi stap ridim ol skripja. Taem mi stap stadi long ol ves we mi tingting se mi bin ridim plante taem bifo, ol stori ia we mi save finis, oli stat blong pulum tingting blong mi. !Mi filim Tabu Spirit i stap toktok wetem mi!
Wan stori we i tajem mi bigwan i blong yangfala rij man ia. Jisas i talem long hem se: “Sapos yu wantem kam stret gud olgeta, yu go, yu salemaot olgeta samting blong yu, yu tekem mane … yu givim long ol puaman, … yu kam yu biaen long mi” (Matiu 19:21).
Taem mi ridim skripja stori ia, mi filim insperesen blong stop mo tingting long olsem wanem mi save yusum hemia long miwan. Long fas ples, i no olsem se mi semmak long yangfala rula ia—hem i gat ol samting blong hem finis, mo i no wantem blong seremaot olgeta. Mi long narasaed, mi no rij yet, mo mi ting se ol hadwok blong mi blong kasem moa mane, oli stret gud evriwan.
Be afta, mi kam blong luksave se, bae i had long mi blong givimaot mane blong mi, semmak olsem yangfala rij man ia. Speseli, mi stap tingting se mi bin stap traehad finis blong lego ol tingting blong gohed blong mekem moa mane.
Mi wantem blong putum Papa long Heven faswan long laef blong mi bakegen. Mi disaed blong openem jenol blong mi, raetem wanem mi stap filim, mo luklukbak long ol fas samting we mi bin stap raetemdaon, blong andastanem moa gud wanem nao i bin statem strong tingting ia blong mi blong wantem mekem plante mane oltaem.
Taem mi mekem hemia, mi kam blong luksave moa olsem wanem mi putum ol fas samting long laef blong mi go biaen. Taem mi luk long wan toktok we mi bin raetem insaed long jenol we i se, “Mi stap gohed blong tingting long olsem wanem mi save mekem profit aot long evri samting, be mi no tingting abaot olsem wanem bae mi save kam moa gud o blong helpem ol narawan.”
Long en, taem mi stap stadi long ol skripja, stap lisin long Spirit, mo raetem ol filing blong mi long jenol, mi stat blong jenisim laef blong mi.
Stap Trastem God bitim Mane
I naes tumas blong filim promes ia long Ol Proveb 3:5–6 i kam tru long laef blong mi:
“I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.
“Long olgeta samting we yu stap mekem, yu mas tingbaot hem oltaem, mo sapos yu stap mekem olsem, hem bambae i soemaot stret rod long yu, blong yu yu folem.”
Mi stap gohed yet blong developem ol talen blong mi mo wokhad long edukesen blong mi mo blong mekem art wok. Blong stap lukaotem blong gat inaf mane blong save sapotem yumiwan mo ol famli blong yumi, oli ol tingting blong hat we i stret mo gud. Be, yumi mas lukaot gud se ol tingting blong yumi blong gat sakses mo mekem mane, bae i no kam moa impoten bitim eni narafala samting.
Long ol dei ia, mi no kea sapos mi kam popula o mekem bigbigfala mane tru long art wok blong mi o no. Mi luksave se, blong stap laef long wan laef we bae mi save kam blong lavem—mo filim lav tru long—Papa long Heven mo Jisas Kraes, famli blong mi, mo art wok, oli inaf blong mi. I nomo isi long mi blong harem nogud long ol samting we mi spenem mane long hem we oli no stap long plan blong mi, o sakses blong ol narawan. Be, mi kam moa fetful long gospel blong Jisas Kraes from se hemia i gohed blong sevem mi aot long wan laef blong stap selfis, fasin blong komperem samting mo filing blong wantem moa samting. Mo taem mi stat blong fogetem, oltaem ol skripja mo ol profet oli rimaenem mi long wanem we i moa impoten long laef.
Presiden Russell M. Nelson i tijim:
“Taem wol i fos blong gat paoa, gat ol samting, blong stap popula, mo ol harem gud blong bodi oli givim hapines, !ol samting ia oli no givim hapines! !Oli no save givim hapines!
“!Trutok i we, bae yu kam moa taet blong lukaotem hapines long ples we bae yu neva save faenem hapines long hem! Be, taem yu putum yok[ol wari] blong yuwan long Jisas Kraes mo mekem wok we i nid blong mekem long saed blong spirit blong winim wol, Hem, mo Hemwan nomo, i gat paoa blong leftemap yu ova long wol ia.”
Stap Winim Wol
Ol jenis we Sevya i bin helpem mi blong mekem long sol blong mi, i bin wan bigfala merikel. Mi save naoia se, blong kam sakses i no abaot stap pruvum hamas mi save mekem i gud tumas o stap traem blong luk hamas mi impoten from plante mane we mi mekem; hem i abaot fasin blong talem tangkyu blong gat eksperiens long laef ia mo stap luk ol gudgudfala blesing we Papa long Heven i givim long mi oltaem. Mi save se sapos mi putum Hem i kam faswan, evri samting bae oli kam stret long ples blong olgeta.
Mi leftemap tingting blong yu blong tingting long ol fas samting long laef blong yu. ?Yu yu stap lukluk nomo long ol samting blong wol mo wanem we yu no gat? O ?yu yu stap lukluk nomo long ol samting we oli moa impoten? Stap ones wetem yuwan. Luk sapos yu nidim blong mekem jenis long rod we yu stap long hem i gobak long Sevya.
Taem yu mekem joes ia, bae yu faenem moa glad bitim we yu eva ting se bae i posibol.