Ol Blesing blong 1836 mo Ol Hadtaem blong 1837

Long Jenuware 1836, taem kolosap tempol i finis, Ol Sent oli stat blong eksperiensem ol blesing long saed blong spirit, blong wan tempol we i stap long medel blong olgeta. Oli bin kasem promes se insaed long Ketlan Tempol, bae oli save kasem paoa blong endaomen (luk long Doktrin mo Ol Kavenan 38:32, 38). Promes ia i semmak olsem wanem we Sevya i bin talem long Ol Aposol blong Hem long Jerusalem insaed long Niu Testeman. Afta long Laef Bakegen long Ded blong Hem, Hem i talem long olgeta se oli no mas aot i go blong prij kasem taem we oli endao wetem “paoa ya blong God [we] i aot long heven i kamdaon” (Luk 24:49). Afta long Dei blong Pentekos, Ol Aposol blong Hem oli kasem paoa ia taem we Spirit i kamdaon long olgeta olsem “wan bigfala win i blu Mo olgeta evriwan, Tabu Spirit i kam fulap long olgeta, nao oli stat toktok long ol lanwis blong ol narafala man (Ol Wok 2:2, 4).

Long Jenuware 1836, Josef Smit i mit wetem ol narafala lida blong Jos blong oli prea, blesem olgeta wanwan mo kondaktem ol bisnis blong Jos. Afta we oli blesem Profet Josef, hem i luk wan visen blong selestial kingdom. Hem luk Papa long Heven mo Jisas Kraes, Adam mo Ebraham, papa mo mama blong hemwan (we tufala i stap laef yet), mo bigfala brata blong hem Alvin, we i ded be i no bin kasem baptaes. Josef i lanem se “evriwan we i bin ded be oli no kasem save long gospel ia, we bae oli akseptem sapos mi bin letem olgeta oli stastap, bae oli gat ples long selestial kingdom blong God” (Doktrin mo Ol Kavenan 137:7).

Tu manis i pas, long 27 Maj, 1836, Ol Sent oli kam plante raon long Ketlan Tempol blong luk dedikesen. Oli lisin long prea blong Josef blong dedikesen, we hem i askem Papa long Heven blong akseptem Ketlan Tempol olsem wan ples we Sevya “i save … kamaot long ol pipol blong hem.” (Doktrin mo Ol Kavenan 109:5). Oli skwisim olgeta long tabu spes ia, Ol Sent oli singsing “Spirit blong God i olsem Faea.” Oli singaot tugeta, “!Hosana! “!Hosana! “!Hosana long God mo long Smol Sipsip!”

Oli eksperiensem ol blesing long saed blong spirit long taem blong dedikesen mo long wik we i stap kam. Oli livim kaekae, oli prea, oli tekem sakramen, wasem leg blong olgeta wanwan, mo gat eksperiens long saed blong visen. Oli filim se oli gat paoa blong go fored mo prijim gospel. Oli bin kasem paoa we i kamdaon long heven.

Be ol samting we oli kamkamaot long olgeta long saed blong spirit i no stap long en. Long 3 Epril, 1836, Sevya i kamkamaot long tu wokman blong Hem. “Vel i bin kamaot long maen blong mitufala, mo ae blong andastaning blong mitufala i bin open,” Josef Smit mo Oliva Kaodri i talem. “Mitufala i bin luk Lod i stanap antap long strong wud blong pulpit, long fored blong mitufala; … , i stap talem: Mi mi faswan mo laswan; Mi mi hem ia we i stap laef, mi mi hem we oli bin kilim hem i ded; mi mi loya blong yufala long fored blong Papa” (Doktrin mo Ol Kavenan 110:1–4).

Folem visit blong Sevya, Moses, Elaeas, mo Elaeja, wanwan long olgeta i kamkamaot long Josef mo Oliva mo givim long tufala ol ki blong letem tufala blong prijim gospel blong Jisas Kraes mo karem i kam tugeta Isrel, blesem wol wetem kavenan blong Ebraham mo silim ol famli tugeta (luk long ol ves 11–16).

Be stori blong Ketlan i no stop wetem ol gudgudfala samting ia nomo we i hapen. Wan yia afta long dedikesen blong tempol, komuniti i stap brokbrok. Ol problem blong intanasonol ekonomi i stap lid i go long bigfala namba blong ol man we oli no gat wok long Yunaeted Stet. Ol bank oli klos raon long kantri, we i tekem tu, wan smol bank we Jos i stanemap tru long ol lida blong Jos long Ketlan blong mekem developem long komuniti i gro hariap. Josef Smit mo ol narafala lida blong Jos oli wantem tumas blong traem blong sevem ekonomi blong komuniti. Be ol hadtaem blong ekonomi raon long kantri i strong tumas. Ol pipol oli stat blong lusum ol hom mo ol wok blong olgeta. Plante oli stat blong komplen agensem God mo Jos. ?From wanem Lod i letem ol pipol blong Hem blong oli no gat sakses long saed blong ekonomi? Sam oli stat blong toktok smosmol mo afta oli talemaot se Josef i wan giaman profet.

Long wan miting long taem blong sama blong 1837 long Ketlan Tempol, Josef Smit Senia, petriak blong Jos, i toktok long bihaf blong boe blong hem we i no bin stap. Taem hem i stap toktok, wan we i no agri wetem hem, i pulumaot hem long pulpit. Taem we Wiliam Smit i difendem papa blong hem, wan man Aposol i wantem blong kilim Wiliam wetem wan naef blong faet. Ol narafala man we oli gat ol naef mo ol pistol oli raonem Wiliam. Tempol, we i bin wan ples blong tabu fasin mo gat spirit blong wantaem bifo, naoia i kam wan ples blong faet, fasin blong no agri mo nomo gat oda.

Taem Josef Smit i kambak long Ketlan, plante memba oli bin sastenem hem olsem profet, be i gat tri Aposol we oli karemaot olgeta long Kworom blong Olgeta Twelef. Ol problem blong ekonomi oli tanem i kam ol problem long saed blong spirit. Blong sam moa manis, Lod i talem long Josef blong aot long Ketlan from sefti blong famli blong hem mo from laef blong hemwan.

Ol ae witnes oli testifae abaot ol hadtaem blong taem ia. Vaelet Kimball, waef blong Aposol Heber C. Kimball, i sendem wan leta i go long hasban blong hem, we i stap givim seves olsem wan long ol fas misinari long Inglan. “Mi no gat tu tingting be bae i mekem hat blong yu i soa,” hem i raetem i go long Heber, mo stap talem long hem abaot ol man we oli no stap agri. “Oli talemaot se oli biliv long Buk blong Momon mo Doktrin mo Ol Kavenan be ol wok blong olgeta oli go agensem olgeta.”

Vaelet i save se Josef i no stret gud evriwan. Hem i bin mekem ol mistek long taem blong ol hadtaem long ekonomi long Ketlan. Mo hem i gohed blong lavem plante long medel blong olgeta we oli no stap agri. Be hem i luk wan bigfala lesen tru long ol samting we i hapen long 1837: “Lod i talem, hem we i no save go tru hadtaem be i go agensem mi, bae i no save kam tabu.”

Insaed long semmak leta, Marinda Hyde i putum wan not blong hasban blong hem, Orson, we hem tu i wan Aposol we i stap givim seves long Inglan. Bigfala brata blong Marinda i wan long ol Aposol we i bin lego Jos. Hem i raetem, “Sam taem long Ketlan yu neva witnes olsem we naoia yumi save, i luk olsem se tras long wanwan long yumi i lus”.

?From wanem tingbaot ol nogud samting blong 1837 mo i no blong tingbaot nomo ol gudgudfala samting blong 1836? From yes, tufala ia bae yumi neva save seperetem. Hemia i semmak olsem long laef blong yumi wanwan. God i givim long yumi wanwan, ol taem blong ol blesing long saed blong spirit, ol taem we Hem i toktok long sol blong yumi mo lidim yumi wetem han long rod blong kavenan. Hem i givim long yumi ol taem blong gat inaf samting blong sapotem yumi, ol taem we ol famli blong yumi oli helti mo hapi, ol taem we ol fren blong yumi oli stap kolosap long yumi mo toktok wetem yumi. Yumi evriwan i laef long ol taem we oli olsem blong 1836.

Be God i neva promes se bae yumi eksperiensem 1836 nomo. Blong wanwan long yumi, 1837 i stap kam. I kam wetem ol problem blong ekonomi, taem yumi wari abaot weaples mane bae i kam long hem. I kam wetem ol samting we oli balens long laef blong yumi wan, taem ol famli blong yumi oli safa long ol siknes we i kam kwiktaem, ol sik we oli no save tritim, filing blong harem nogud o wari. I kam wetem fasin blong wok wetem komuniti we i no balens, taem ol ol fren blong yumi oli aot sloslo o oli stap giaman long yumi.

Sapos yumi no tingbaot ol eksperiens blong 1836 blong yumiwan,—ol taem blong yumiwan we yumi bin filim han blong Lod long laef blong yumi—maet 1837 i save givim fasin blong gohed strong long saed blong spirit. I save temtem yumi blong talem se, “Hemia bae i no mekem eni jenis.” I save temtem yumi blong talem se, “God i no lavem mi.” I save temtem yumi blong talem se, “Josef Smit i no wan profet” o “Presiden Nelson i no wan profet blong God.” I save temtem yumi blong talem se, “Rod blong kavenan i no blong mi.”

Be sapos yumi mekem wok long saed blong spirit blong stap tingbaot taem we yumi bin gat ol eksperiens long saed blong spirit blong 1836, iven taem yumi eksperiensem ol hadtaem blong 1837, fet blong yumi long Jisas Kraes bae i save stap strong yet, bae yumi save yet se God i lavem yumi, mo bae yumi save yet se Restoresen blong gospel mo Jos Ia blong Jisas Kraes i tru mo se Lod i lidim Jos blong Hem tru long ol wokman we Hem i bin jusum.