Ol Voes blong Ol Lata–dei Sent
Dei Ia we I Naes Tumas Bitim Ol Narafala Dei
Lod i yusum laen blong papa blong mi blong ol fas man blong Ostrelia blong putumbak frensip wetem famli blong mifala.
Let papa blong mi, Claude Roy, we i pasawe finis long 2015, i no longtaem afta we hem i kasem baptaes. Bifo long hemia, mama blong mi, ol brata mo sista mo mi mifala i bin memba blong Jos Ia blong sam taem, be blong ten yia, papa blong mi i bin stap strong blong no wantem blong joenem jos.
Taem i pas, hem i talem, “hat blong mi i kam strong, mo mi kam blong no laekem ol visit blong ol pikinini blong mi mo ol apupikinini blong mi mo wantem blong go stap miwan aot long famli blong mi. Wari i stap blong kam antap long haos blong mi, mo rilesensip blong mi mo waef blong mi i stap lus.”
Raon long taem ia, hem i stat blong folemap ol bubu blong hem, ol aborijinis blong Kanada, we oli laen blong Mi’kmaq mo Huron-Wendat. Afta we hem i folem Mi’kmaq komiuniti kolosap long ples we hem i groap long hem, oli invaetem hem blong go long wan powwow, wan seremoni blong Ol Stret Man Amerika.
Long naet, long taem blong powwow, wan hae jif i openem han blong hem mo askem ol pikinini blong kam long hem blong hem i save blesem olgeta. Storian we i folem, we i abaot hamas famli mo ol laen blong yu i impoten, i bin atakem papa blong mi olsem tanda.
Long taem ia, hem i talem, “mi luk famli blong mi oli stap pusum han blong olgeta i kam long mi, be mi tanem baksaed blong mi long olgeta. Wan filing blong harem nogud i fulumap mi, olsem mi neva filim bifo, olsem se hat blong mi i stap brokbrok long ol pisis. Mi save long stret taem ia se Lod i bin yusum ol toktok blong ol traeb blong ol bubu blong mi blong bifo blong mekem hat blong mi i kam sofsof. Mi save se mi mas tanem mi i go long Papa long Heven mo fiksim bak ol damej we mi bin mekem long famli blong mi.”
Papa i stat blong mekem pis wetem famli blong mifala, i askem fogivnes long wanwan long ol memba blong famli. Tru long eksampol blong waef mo ol pikinini blong hem, hem i stat blong prea mo ridim Buk blong Momon. From se hem i bin stap ridim plante histri blong ol bigbigfala kantri blong Amerika, Buk blong Momon i pulum tingting blong hem. Kwiktaem, oli konfemem ol trutok long hem.
“Ol famli blong mi oli raonem mi. Mi kasem baptaes olsem wan memba blong Jos Ia blong Jisas Kraes blong Ol Lata-dei Sent,” hem i talem. “!Dei ia i wan naesfala dei tumas long laef blong mi bitim ol narafala dei! Mi testifae long paoa blong eksampol blong stap soem lav long ol narawan. Blong 36 yia, waef blong mi i holemtaet fet blong hem mo i bin wan eksampol blong fasin olsem hemia blong Kraes long mi, nomata se hat blong mi i bin strong. Afta, wan wiken i jenisim evri samting blong mi.”
Naesfala stori blong papa blong mi i stap rimaenem yumi se Sevya “i stretem ol han blong sore i [kam] long [yumi],” mo hemia i taem we yumi sakem sin, i tru, Hem bae i akseptem yumi (luk long Alma 5:33).