Eria Lidasip Mesej
Ol Heven i Open
Restoresen blong gospel blong Jisas Kraes i stat long 1820 taem wan boy, we bae i kam profet Josef Smit, i bin askem God, wanem jos nao bae hem i sapos blong joenem. Stat long taem ia, ol tabu revelesen, ol stamba trutok abaot fasin blong God, prishud atoriti blong Hem mo plan ia blong Hem blong sevem man i bin kambak long wol ia.
Presiden Russell M. Nelson i tijim se Restoresen i stap gohed tedei olsem fandesen blong Jos Ia blong Jisas Kraes blong Ol Lata-dei Sent we i stap lae mo stap gro.
Long mesej ia, yumi kam blong lanem moa abaot ol bigfala tijing blong Presiden Nelson abaot Restoresen mo wanem hem i minim long yumi mo long wol.
Restoresen i wan Wok we i stap Gogohed
Long 2020, Presiden Nelson i bin talemaot wan ofisol toktok blong makem mo tingbaot 200 yia aniveseri blong Fas Visen blong Josef Smit. Ofisol toktok ia i talemaot witnes se God i stap gohed blong soemaot tingting blong Hem tru long ol revelesen we i stap gogohed blong hapen:
Ofisol toktok ia i talemaot se tru long Restoresen, God i bin soemaot tingting blong Hem bakegen, i bin openem ol heven mo i mekem i posibol blong ol pipol oli save kam long Kraes.
“Yumi talemaot wetem glad se Restoresen we oli promesem, i stap go fored tru long revelesen we i stap gogohed. Wol ia bae i neva semmak bakegen, taem God bae i karem ‘olgeta samting long heven mo long wol bambae oli kam joen long Kraes’ (Efesas 1:10).”
Presiden Nelson i tokbaot trutok ia bakegen long 2018 taem hem i talem:
“Yumi ol witnes blong proses blong restoresen. Sapos yu ting se Jos Ia i kam bak fulwan, yu, yu stap luk stat blong hem nomo. I gat plante moa blong kam. … Wet kasem nekis yia. Afta long nekis ia. Tekem ol meresin blong yu. Tekem ol spel blong yu. Bae yu sapraes wetem glad.”
Impoten Wok blong Josef Smit insaed long Restoresen
Long 2021, Presiden Russell M. Nelson i bin talemaot witnes se Profet Josef Smit “hem i profet blong las dispensesen ia…wan testemoni abaot impoten wok blong Profet Josef insaed long Restoresen i impoten tumas blong yumi evriwan we i stap prijim Gospel blong Lod.”
Hem i eksplenem se:
“Yumi glad long olsem wanem Josef i bin save evri samting we hem i bin mekem long laef blong hem long wol ia. Ol gudfala samting we hem i mekem, i hapen tru long bigfala paoa blong merikel blong God We I Gat Olgeta Paoa, Lod Jisas Kraes mo plante narafala mesenja blong heven. …
“Sam long ol profet mo ol enjel blong taem bifo oli bin visitim o kamaot long Josef long wan visen…Tru long ol naesfala eksperiens ia, Josef i kam blong andastanem se save blong wol ia i no impoten tumas taem oli komperem wetem save we i kam long heven.”
Presiden Nelson i invaetem yumi blong tingbaot kontribusen blong Josef Smit long save blong yumiwan abaot gospel ia we i kambak:
“Fulap long ol naesfala pat blong skripja blong yumi i bin kamaot tru long Profet Josef Smit. Tru long hem yumi bin kasem plante moa pej blong skripja bitim eni nara profet.”…
“Tru long Josef Smit, Lod i bin tekem i kam ol skripja we Hem i save se oli impoten blong ol disaepol blong Hem oli andastanem. Oli tij abaot bigfala plan blong hapines blong God we i no save finis mo kavenan rod blong Hem blong kasem glori we i no save finis.”
Stap Tekpat long Wok blong Restoresen
Lav we profet blong yumi Russell M. Nelson i gat from restoresen ia bigwan:
“Mi no save tokbaot Restoresen wetem wan voes we i smol. Trutok blong histri ia i naes tumas! !I gud tumas! !I fulap long sapraes! ?I no naes tumas se ol mesenja blong heven oli kam blong givim atoriti mo paoa blong wok ia?
“Tedei, wok blong Lod insaed long Jos Ia blong Jisas Kraes blong Ol Lata-Dei Sent i stap muv fored long wan spid we i kwik.
Hem i askem yumi evriwan blong tekpat long wok ia blong Restoresen we i stap gogohed, taem yumi stap karem Isrel i kam tugeta long tugeta saed blong vel mo rere wol ia from kambak blong Jisas Kraes.
Presiden Nelson i givim woning se ol dei we oli stap kam bae i no isi:
“Long fiuja bae i no oltaem isi o popula blong stap wan fetful Lata- Dei Sent. Wanwan long yumi bae i gat tes. Aposol Pol i givim woning se long ol las dei, olgeta we oli fetful blong folem Lod “bambae ol man oli save mekem i nogud tumas long olgeta” (2 Timoti 3:12). Ol hadtaem ia i save daonem yu i go kwaet mo wik o i save mekem tingting blong yu kam strong blong stap olsem wan moa gud eskampol mo gat strong tingting long laef blong yu.”
Hem i rimaenem yumi olsem wanem Lod i mekem yumi kam strong long wok blong Hem:
“Olsem wanem yu go tru long ol jalenj blong laef, hem i pat blong divelopmen blong fet blong yu. Paoa i kam taem yu tingbaot se yu gat wan tabu fasin, wan samting we yu kasem we i no gat en mo gat bigfala valiu… Taem yu wokbaot long rod blong Lod blong stap stret mo gud, bae yu kasem blesing blong gohed long gud fasin blong Hem mo stap olsem wan laet mo wan seyva long ol pipol blong Hem” (luk long Doktrin mo Ol Kavenan 86:8–11).