Lav blong yumi long Seyva tru long Famli Histri

Taem yumi selebretem taem we Seyva blong yumi, Jisas Kraes i bon, yumi tingbaot ol naesfala presen we Hem i givim long wanwan long yumi tru long Atonmen blong Hem—presen ia blong laef we i no save vinis mo blong kam olsem wan god.

Olsem “Ol man blong sevem man long Hil blong Saeon” i, yumi save serem presen ia i go long ol pupu blong yumi tru long ol odinens insaed long tempol. Famli histri mo tempol wok i mekem i posibol blong yumi save help blong sevem olgeta we oli bin kam bifo yumi, blong givim long olgeta wan janis blong pat long paoa blong atonmen blong Kraes.

Marie Purcell, wan memba blong Massey Pak Wod long Auckland Niu Silan Papatoetoe Stek, i bin experiensem glad long wok ia taem papa mo mama blong hem mo hem oli silim pupuman blong hem we hem i lavem tumas, Afele Schwenke, i go long ol famli blong hem—wan blesing we hem i no bin kasem long taem blong laef blong hem long jos nomata long fetfulnes blong hem mo seves we hemi givim long Jos Ia blong Jisas Kraes blong Lata-Dei Sent.

Afele Schwenke, i bon long 10 Eprel 1912, mo i strong long fet blong hem mo long famli blong hem. Tugeta wetem waef blong hem Soala, Afele i bin givim seves long ol misinari blong Malaela, Aleipata blong kolosap 20 yia. Kapol ia i bin openem hom blong tufala long ol misenari, mo mekem tufala i stap long simen haos blong olgeta mo Afele, Soala, mo ol pikinini blong tufala oli stap long bus haos blong olgeta Ol Man Samoa. Kaen fasin blong hem i gat wan gudfala paoa we i stap long taem, mo hom blong hem i kam wan ples blong stap tijim gospel.

Nomata we Afele i bin gat wan strong testemoni mo stap fetful blong pem taeting blong hem, hem i fesem hadtaem blong laef folem Tok blong Waes. Lav we hem i gat long jos i neva muvmuv, be hem i bin ded long 1967 mo i no kasem ol blesing blong tempol.

Sam yia i pas, taem oli stap go tru long ol famli histri rekod, Marie mo papa mo mama blong hem i faenemaot se oli no bin rekodem siling blong mama blong Marie i go long papa mo mama blong hem. Kwiktaem Marie i filim wan strong filing we i kam long spirit—i no siling blong mama blong hem nomo we oli nid blong mekem, be blong apu man blong hem tu, Afele. Fes blong apu man blong hem i kam long maen blong hem, mo hem i save se hem i nid blong mekem wok blong hem long tempol.

Hem i trastem insperesen ia, mo ol famli oli putum wan siling apoenmen. Be, taem oli kasem tempol, Marie i kam blong faenemaot se oli no bin rere gud long ol pepa wok we bae oli nidim long tempol. Oli gohed wetem ol nara odinens, be long siling rum Marie mo mama blong hem i filim sore from odinens we oli no bin mekem.

Wetem strong tingting blong finisim wok ia, Marie mo papa mo mama i mekem wan nara apoenmen. Long 6 Epril, 2024, oli rere gud mo oli gobak long tempol. Marie mo papa blong hem i stanap olsem proksi long bihaf blong apu man mo apu woman blong blong hem, be hem i save tufala i stap wetem olgeta taem oli kasem tempol.

Taem we man blong mekem siling i singaot nem blong mama blong hem, wan dip filing blong pis i kavremap olgeta. Marie i tingbaot ol wota blong ae we oli ron taem oli finisim ol odinens ia.

Tru long Atonmen blong Jisas Kraes mo tabu wok blong tempol, Afele Schwenke mo waef blong hem, Soala, i bin kasem ol blesing blong taem we i no save finis.

Olsem ol sevya long Hil blong Saeon, yumi save givim semmak presen blong kam olsem wan god we Kraes i givim long yumi, long ol bubu blong yumi blong bifo. Taem hem i stap luklukbak long eksperiens blong siling blong apu man mo apu woman blong hem, Marie i serem se: “Mi testifae se glad we i kam tru long wok blong famli histri i givim hapines ia we i no save finis.”

“Mi bin filim olgeta long narasaed vel tru long bigfala mo gudfala wok ia. Mo mi save se oli fulap wetem glad taem oli stap kasem ol tabu odinens ia, olsem we mi tu mi fulap wetem glad long narasaed vel blong tekem i karem famli blong mi we i no save finis i kam tugeta.”

Paoa blong siling i rimaenem Marie se ol blesing blong Atonmen oli go bitim vel. Olsem long Doktrin mo Ol Kavenan 128:22 i talem, “?Bae yumi no gohed long wan bigfala wok olsem?” Long Krismes ia, letem yumi selebretem taem blong we Seyva i bon i kam long wol. taem yumi stap givim presen blong fasin blong sevem man we hem i givim long yumi i go long olgeta we oli ded fastaem long yumi, helpem olgeta blong tekpat long blesing blong gospel we i no save finis.