Famli Histri Wok: Rod blong Wokbaot blong Fet blong Yumi mo Koneksen

“Jisas i talem long hem se,Mi nao, mi stamba blong laef bakegen long ded mo mi stamba blong laef.  Man we i bilif long mi, nating we bambae i ded, hem bambae i mas laef (Jon 11:25).

Olsem wan famli, mifala bin agri we tempol mo famli histri wok bae i wan bigfala pat blong mared laef blong mifala. Naoia mifala i komplitim taosen odinens blong ol famli blong mifala we oli ded finis, tugeta wetem handred nem blong ol man Samoa, we mifala i lanem i se had tumas blong faenem from oli no bin rekodem ol histri. Be, hasban blong mi Sosene Faleofe “Fe”wetem strong tingting i spenem plante aoa mo ol dei long Famli Histri Senta blong ridim ol maekrofilm( olfala raeting,nius, ol foto, we oli putum tugeta long wan tep mo save wajem tru long wan masin). Afta plante hadwok hem i bin faenem ol nem blong famli blong hem long laen blong hem. Taem mifala i tekem ol nem ia i go long tempol long wanwan manis, hem i naes tumas blong save se mifala i stap fasem i kam tugeta lo famli blong mifala blong oltaem.

Blong mekem wok ia i kam moa bigwan, mifala i plan blong gat ol tempol dei long evri yia blong famli blong mifala blong fo jeneresen: papa mo mama blong mi, hasban blong mi, mo mi, boe blong mi mo waef blong hem, ol bigfala bubu boe blong mi, sista blong mi mo famli blong hem. Mifala i mekem ol baptaes, ol konfemesen, mo ol wasing blong sam moa handred famli memba long ol spesel famli tempol dei ia, stap joenem bigfala famli blong mifala long wan wei ia, we i nomo gat wan moa wei blong mekem.

Long wan nara eksperiens wetem fulap memori, mi bin stap olsem wan tempol odinens woka taem wan sista i kam long smol rum blong mi. Long fas toktok we i kamaot, Spirit i strong tumas mekem se mi krae truaot long ful odinens ia. Taem hem i go, mi luksave se nem long kad ia i wan famli blong mi, mo mi save aot long eksperiens ia se sista ia narasaed long vel i akseptem wok we mi mekem long bihaf blong hem.

Blong stap mentenem komitmen blong yumi long tempol mo famli histri wok i no isi. Yumi mas komitim yumiwan mo sapotem wanwan long yumi. Fe i neva wok long kompiuta bifo mo i no save eni samting abaot ol websaet hao blong faenem, be i no tekem hem longtaem blong kasem save ia from fet blong hem mo ol gudfala wok blong hem. Hem i gohed blong yusum niufala save blong hem ia blong faenem moa long ol famli blong hem.

Wan Satedei insaed long Famli Histri Senta, mi stat blong lukluk long wan kapod blong microfiche—(wan flat film we i gat ol smol foto, raeting mo pikja we istap long hem) we i kipim ol impoten pepa. Insaed long hem mi faenem wan hip blong Kent, England we oli faelem long rong kantri. Taem mi tekemaot blong putum long stret ples blong hem, mi kam blong luksave se oli blong semmak eria we famli blong mi i stap long hem, mekem se mi sidaon mo ridim wanwan long ol fiche ia. Kwik taem, mi fas long wan famli blong papa mo mama mo sikis pikinini we mi luksave se i wan sista blong famli blong angkel blong mi. Mifala i  bin no save se oli stap laef i stap. Hemia i wan klia eksampol se Spirit i oltaem gaedem yumi long tabu wok ia.

Lukluk bak long rod blong wokbaot blong mi, mama blong mi i talem se papa blong mi i lego mi from mi wan gel mo hem i wantem wan boe. Wan dei, taem mi stap hangem ol klos, mi filim wan strong filing blong spirit blong komplitim tempol wok blong famli blong hem, blong mekem se mi save mekem hat blong mi i sofsof from hem mo karemaot ol yia blong hevi harem nogud we mi gat, from hem i no wantem mi. Mi faenem angkel blong papa blong mi mo handred nem blong ol famli mo gat janis blong tekem i go long tempol. Taem angkel ia i ded, gel blong hem i givim mi raet blong finisim wok blong hem long tempol, mo tu brata blong hem we i ded finis, glad se hem i save gat wan pilo blong putum hed blong hem long hem long heven. Petriakol blesing blong mi i promesem  mi sakses sapos mi komplitim famli histri wok blong mi, mo mi save testifae se mifala i bin faenem plante sakses lo tabu wok ia.

“Mo nao, ol gudfala brata mo sista blong mi we mi lavem tumas, letem mi talem stret long yufala se ol prinsipol ia long saed blong olgeta we oli ded mo olgeta we oli laef, bae yumi no save tingting nating long hem, hemia long saed blong fasin blong sevem yumi. From fasin blong sevem olgeta i wan nid mo i wan mas long fasin blong sevem yumi, olsem we Pol i talem long saed blong ol papa blong bifo—se olgeta, sapos i no gat yumi, oli no save kam stret gud evriwan—mo semmak, yumi, sapos i no gat olgeta dedman blong yumi, bae yumi no save kam stret gud evriwan”(Doktrin mo Ol kavenan 128:15).

 “Olgeta ded we oli sakem sin bae oli save kam klin tru long fasin blong obei long ol odinens blong Haos blong God” (Doktrin mo Ol Kavenan 138:35).