Kamp long Taem We I Ren

“?Gem blong mi tumoro nao, ah?” Lucy i askem Mama blong hem taem Mama blong hem i stap kavremap hem blong silip.

Mama i sakem hed blong hem blong agri. “!Yes! Tumoro long 6 klok long naet.”

Lucy i no save wet. Hem i bin stap lukluk fored from gem ia blong tim blong hem blong plante wik nao. Mo long yia ia, ol spot set blong olgeta !i kala pink! Hem i hapi tumas mekem se i had blong hem i silip.

Be long nekis moning, Lucy i lukluk aotsaed mo i tanem fes blong hem i harem nogud. I gat ol grei klaod long skae, mo i gat ol pul blong wota long evri ples. I bin ren ful naet.

Hem i nildaon blong mekem prea blong hem long moning. “Dia Papa long Heven, plis helpem weta blong i kam gud blong sofbol gem blong mi tedei long naet.”

Ful dei long skul, Lucy i tingbaot gem. Hem i stap pikjarem hemwan we hem i werem niu pink set blong spot, mo hem i stap jiam blong kasem balong we bae i mekem olgeta oli win. Be aotsaed, ren i stap ren yet mo ples i wetwet.

Lucy i mekem wan kwik prea long maen blong hem. Papa long Heven, plis helpem san blong i kamaot kwik mekem se mifala i save plei tedei long naet.

Taem bel blong skul i ring, Lucy i karem basket blong hem mo i ron i go aotsaed. !Hem i save luk se san i stat blong stap kamaot biaen long ol klaod!

Be taem mama i kam blong pikimap hem, hem i gat wan nogud nius. “Oli kanselem gem blong tedei long naet,” hem i talem. “Mi sore.”

Lucy i lukluk antap long skae. “Be san i stap kamaot ia. Maet bae ren i stop.”

“Mi save,” Mama i talem. “Be fil blong plei i fulap nogud long wota. Mekem se iven sapos ren i stop blong ren, bae ples i wetwet mo sofmad tumas blong yufala i plei. Bae oli putum taem blong gem ia long wan nara taem.”

Wota blong ae blong Lucy i fulap long ae blong hem. !Hem i filim nogud tumas! Hem i wantem tumas blong plei tedei long naet. ?From wanem Papa long Heven i no ansa long ol prea blong hem?

Long hom, Lucy i filim no hapi mo harem nogud olsem ol dak klaod blong ren ia. Hem i no filim tu blong ridim fevret buk blong hem. Mo nomata se Mama i bin mekem fevret makaroni blong hem blong dina, kaekae ia i no bin tes gud tumas long Lucy.

Afta long dina, smol sista blong Lucy i kam sidaon long leg blong Lucy. “?Yu wantem plei plei wetem mi?” hem i askem.

Lucy i pulum win i longfala. “Yes,” hem i talem. Afta, hem i gat wan aedia. “Yumi mas mekem wan samting we bae yumi gat gudtaem blong mekem.”

Hem i karem wan brum mo i fasem wan kaliko long en blong hem blong mekem wan flag. Afta hem i karem evri sista blong hem i kam tugeta. Hem holem flag i go antap mo hem i talem, “!Welkam long Kamp long Taem We I Ren! Hem i ples we bae yu go long hem blong gat gudtaem taem yu no save plei plei aotsaed.”

Ol sista blong hem oli singsingaot.

“Fas taem,” Lucy i talem, “bae yumi singsing kamp singsing blong yumi.”

Ol gel oli laflaf mo oli mekem ap wan krangke singsing wetem ol toktok we i go wetem. Afta oli maj raon long rum wetem flag blong olgeta mo oli stap singsing bigwan olsem we oli save mekem.

“!Naoia yumi nidim blong setemap ol tenet blong yumi!” Lucy i helpem ol sista blong hem blong karem ol blangket mo pilo i kam tugeta blong mekem wan haos. Haos i foldaon plante taem. Be taem oli fiksim, oli fasfas insaed long haos ia blong plei ol gem.

I no long taem, hem i taem blong go silip. “Mi hop se bae i ren bakegen tumoro,” sista blong Lucy, Liza i talem. “!Mi wantem plei plei Kamp long Taem We I Ren I Ren bakegen!”

“Tangkyu blong plei plei wetem ol sista blong yu,” Mama i talem taem hem i haggem Lucy blong talem gudnaet. “Yu bin mekem laet blong san blong yuwan aot long wan situesen we i gat klaod long hem. Mi praod long yu.”

Lucy i filim hapi taem hem i go silip long bed. Ol prea blong hem i no ansa long wei we hem i wantem. Be Papa long Heven i bin helpem hem yet blong faenem wan samting we i mekem hem i gat gud taem wetem famli blong hem—mo hemia i wan gudtaem we i semmak nomo olsem blong werem kala pink long fas gem blong hem.

Openem PDF

Ol pikja droing oli kam long Apryl Stott