Stap Go long Jos wetem Guka

I kam long Kelvin Njenga Mungai

Kelvin i neva luk wan jos olsem bifo.

Wan tru stori we i kam long Kenya.

Kelvin i stakemap gud ol glas botel blong melek we i saen long self. Hem i bin muv i no long taem i pas, i kam blong stap wetem ol apu blong hem long wan vilej aotsaed long siti. Tufala i gat stoa blong melek, mo Kelvin i laekem blong stap help.

“Tedei long naet bae yumi go long wan aktiviti long jos blong mifala,” Guka (Apu man) i talem. “?Yu wantem folem mitufala? Bae hem i wan gud taem.”

Kelvin i laekem blong gat gud taem. “!Yes!” hem i talem. “!Bae mi go wetem yu.”

Afta we oli klosem stoa, Kelvin mo tufala apu blong hem oli wokbaot i go long aktiviti. Oli pas bitim ol nara stoa we oli stap salem ol kaliko, frut, mo ol plan we oli stap long pot. Afta smol taem, oli kasem jos.

Boe mo apu man blong hem aotsaed long wan bilding blong jos

Kelvin i stanap wetem ol ae blong hem we oli bigbigwan taem hem i stap lukluk naesfala bilding ia. Hem i neva luk wan jos olsem bifo. Plante long ol jos oli gat wan kros antap, be hemia i no gat.

Insaed long jos, ol apu blong Kelvin oli introdiusum hem long plante naes pipol. Oli kakae ol naes kaekae mo oli plei ol gem.

Be Kelvin i rili wantem save ol samting. Hem i wokbaot olbaot long ol korido blong jos. Hem i luk ol peinting blong Jisas Kraes. Afta hem wokbaot i go insaed long wan klasrum mo i luksave sam foto long wol.

?Huia ol pipol ia? Kelvin i askem hemwan.

Afta we hem i aot long rum, hem i luk tu yangfala man long korido. Tufala i werem ol waet set mo nek tae. “Halo,” wan long tufala i talem. “Mifala ol misinari. ?Wanem nem blong yu?”

Kelvin i introdiusum hemwan. Afta hem i askem, “?Huia man long pikja ia?” Hem i poen i gobak long wan long ol foto insaed long rum.

“Hemia profet ia,” nara misinari i talem. “?Yu save wanem i wan profet?”

Kelvin i smael mo sakem hed blong hem se no.

“Wan profet i wan mesenja blong God,” misinari ia i talem. “Hem i tijim yumi abaot wanem we God i wantem blong yumi save.”

Taem Kelvin i wokbaot i gobak long hom wetem ol apu blong hem long naet ia, hem i stap holem wan kopi blong Buk blong Momon we ol misinari oli bin givim long hem. Hem i glad tumas blong lanem moa abaot ol profet mo niu jos ia.

“?Yu save ridim long mitufala?” Guka i askem taem oli kasem haos. Ol apu blong Kelvin oli no save olsem wanem blong rid.

Boe i stap ridim Buk blong Momon long tufala apu blong hem

“!Yes!” Kelvin i talem. Hem i openem Buk blong Momon mo ridimaot laod. Hem i no andastanem evri toktok, be hem i filim wan samting we i spesel.

Long Sandei, Kelvin i wokbaot wetem ol apu blong hem i gobak long jos. Hem i go long wan klas we i blong evri pikinini. Oli singaotem Praemeri. !Hem i faenem fulap fren! Hem lanem moa abaot ol profet mo Jisas.

Ol misinari oli kam blong tijim Kelvin moa. Wan dei oli askem wan kwestin long hem. “?Bae yu save folem eksampol blong Sevya mo kasem baptaes?”

Kelvin i smael bigwan. “!Yes!”

Long dei blong baptaes blong hem, Kelvin i stanap i go insaed long wota. I bin kolkol long taem ia. Be taem Kelvin i lukluk raon long hem, hem i luk tufala apu blong hem, ol misinari, mo evri niu fren blong hem long jos. !Hem i filim se oli lavem hem!

Taem hem i jusum blong folem Jisas Kraes, Kelvin i bin kam wan paeonia long famli blong hem. Hem i no save wet blong gohed blong stap folem Sevya—!mo blong helpem ol narawan blong folem Hem tu!