Presen blong Prea

I kam long Presiden Susan H. Porter

Praemeri Jeneral Presiden

Oli tekemaot long, “Prea, Hem I Stap,” Liahona, Mei 2024, 77–79

Papa long Heven i bin givim wan spesel presen long yu. Hem i presen ia blong prea. Prea i save helpem yumi eni taem mo long eni ples.

Mi wantem serem tri presen we yu save prea from.

1. Prea blong save.

Sapos yumi no save luk Papa long Heven taem yumi stap mekem prea blong yumi, ?olsem wanem nao yumi save se Hem i stap lisin?

Presiden Russell M.Nelson i bin invaetem yu blong, “talemaot hat blong yu long Papa blong yu long Heven. … !Mo afta, yu lisin!”* Yu save save se Papa long Heven i stap harem prea blong yu taem yu lisin long wanem yu stap filim insaed long hat blong yu mo ol tingting we i stap kam long maen blong yu.

2. Prea blong gro.

?Olsem wanem nao yu wantem gro? ?Yu wantem blong lanem wan niu skil o gat sam niu fren? Yu save prea blong gro blong !kam moa olsem Jisas Kraes!

Niufala fren blong mi Jonah i bin talem long mi abaot olsem wanem hem i stap wari plante taem long skul. Be taem hem i stat blong stap prea bifo hem i go long skul, hem i filim pis. Jonah i prea blong hem i gro evri dei, !mo yu save mekem tu!

3. Prea blong soem.

Olsem wan yang gel mi bin prea from famli blong mi. Mi bin wantem blong save olsem wanem mi save helpem olgeta. Papa long Heven i bin helpem mi blong save se mi save stap olsem wan eksampol blong gospel blong Jisas Kraes. !Hemia i wanem we mi save mekem!

Sapos yu stap prea from famli blong yu o ol narawan we yu lavem olgeta, !no givap! Papa long Heven bae i soem long yu wanem yu save mekem. Taem yu askem help blong Hem wetem wan tru hat, bae Spirit blong Hem bae i lidim yu.

Ol Prea blong Mi

Tingbaot ol kwestin ia evri taem yu prea. Afta, kalarem wan flaoa. Luk sapos yu save !kalarem wan ful pej!

?Wanem nao mi wantem blong save?
?Olsem wanem nao mi wantem blong gro?
?Olsem wanem nao mi save soem lav blong Papa long Heven long ol narawan?