Kros Tumas blong Prea

“!Nogat wan i andastanem mi!” Gabriela i singaot strong taem hem i sarem strong doa blong rum blong hem. Tedei i bin wan had dei. Wan long skul i bin jikim hem. Mo taem Gabriela i kambak long haos, hem i kros kros mo Mutti (Mama) i tok long hem.

Gabriela i foldaon long bed blong hem mo stat blong krae. Wota blong ae i ron daon long ol jik blong hem, mo jes blong hem i filim taet wetem kros. Hem i no laekem blong filim olsem.

Hem i tingbaot se hem i bin lanem long Praemeri se hem i save prea long Papa long Heven eni taem taem hem i nidim help. Hem i wantem blong talem wan prea blong helpem hem blong filim moa gud, be hem i kros tumas blong tingting stret. Hem i sarem ol ae blong hem mo pulum sam longfala win. ?Wanem nao hem i save mekem blong mekem maen blong hem i kwaet?

Smol taem afta, wan tingting i kam long maen blong hem.

Tingting long ol samting we yu stap glad from.

Hem i openem ol ae blong hem mo lukluk raon long rum blong hem. I gat wan pikja blong Mutti mo Vati (Papa) long wol. Gabriela i lavem famli blong hem, iven taem hem i kros long olgeta.

“Mi glad from papa mo mama blong mi,” hem i talem.

Afta hem i tingbaot ol kasen blong hem Gwendolyn, Lydia, mo Thomas. Oltaem oli stap serem ol pleiplei blong olgeta wetem hem mo stap mekem hem i laf. Hem i laekem tumas blong plei plei wetem olgeta.

“Mi glad from ol kasen blong mi,” Gabriela i talem.

Afta hem i lukluk i go aotsaed long windo blong hem.

San i stap draon, mo skae i fulap long ol naes kala—orenj, red, yelo, mo pink.

“Mi glad from ol naesfala kala blong skae taem san i stap draon,” Gabriela i talem.

Afta hem i tingting long sam moa samting. Hem i glad long lanj we hem i kakae long skul tedei. Hem i glad from ol fren blong hem. Hem i glad from haos we oli stap long hem.

!I wan gud taem blong stap tingting long ol samting we yumi stap glad from! Gabriela i neva luksave we i gat plante gudfala samting long laef blong hem.

Hem i save se Tabu Spirit i bin givim tingting ia long hem blong hem i tingbaot ol blesing blong hem. Naoia hat blong hem i stap long pis. Hem i filim se hem i redi blong prea.

“Dia Papa long Heven,” hem i talem. “Mi sori se mi bin kros long Mutti. Mi talem tangkyu long Yu blong helpem mi blong mekem maen blong mi i kwaet mo mi hapi bakegen. Mi talem tangkyu long Yu blong sendem Tabu Spirit blong rimaenem mi long ol blesing blong mi. Long nem blong Jisas Kraes, amen.”

Hem i wokbaot i kamaot long rum blong hem. Mutti mo Vati i stap mekem dina long kijin. Hem i haggem Mutti.

“Mi sori blong kros long yu,” Gabriela i talem.

“I Oraet,” Mutti i talem. “!Tangkyu blong kam talem sori.”

Oli sidaon raon long tebol blong dina mo oli blesem kaekae. !Afta Gabriela i gat wan aedia!

“Yumi go raon long tebol mo wanwan long yumi i mas talem wan samting we oli glad from,” hem i talem.

Vati i smael. “!Hem ia i wan gudfala aedia!”

“Mi glad from sop,” Mutti i talem.

Vati i tingting blong wan smoltaem.

“Piza,” hem i talem. Olgeta evriwan i laf.

Afta, hem i taem blong Gabriela. Hem i save finis wanem hem i wantem talem.

“Mi glad from prea.”

Ol pikja droing oli kam long Simini Blocker