Semmak Nomo Olsem Josef

I kam long Alelie Coronel-Camitan

?I tru se Josef Smit i bin luk Papa long Heven mo Jisas Kraes?

Wan tru stori we i kam long Filipin.

Lhensay i jam jam long jea blong hem we i stap narasaed long mama blong hem taem bas blong olgeta i draev i go long taon. !Sandei hem i fevret dei blong wik blong Lhensay! Hem i laekem blong go long Praemeri mo stap lanem abaot Jisas Kraes.

Bas i stop long ples blong oli stop long hem. Mama i holem han blong Lhensay taem oli wokbaot i go long jos.

Mama mo gel i stap wokbaot i go long jos

Afta long sakramen miting, Lhensay i wokbaot i go long Praemeri wetem fren blong hem Maria. Long blak bod, oli putum wan pikja blong wan yang man we i stap prea long bus.

“!Gud moning!” Tija blong olgeta Sista Cruz i poen i go long pikja ia. “?Eniwan i save huia hem?”

“!Hemia Josef Smit ia!” Lhensay i talem.

Sista Cruz i smael. “Yes, hemia i tru. Mo wanem nao Josef Smit i bin mekem?”

Lhensay i lukluk i gobak long pikja. Hem i save se Josef Smit i wan profet, be hem i nomo save eni moa samting abaot hem.

“Hem i fas profet blong jos blong yumi,” Maria i talem.

“!Yes hemia i tru bakegen!” Sista Cruz i talem. “Taem Josef i smol, hem i no save wanem jos blong joenem. Hem i go long ol bus mo prea long God blong faenemaot se wanem jos i tru. Hem i askem tu blong God i fogivim hem long ol sin blong hem. Taem hem i stap prea, wan laet we i saen strong i kamkamaot. ?Yu save huia i stap long laet ia?”

Lhensay mo ful klas blong hem i wet blong harem.

Sista Cruz i poen i go long wan nara pikja long blak bod. Pikja ia i soem tu man i stap stanap long ea long fored blong Josef Smit. Tufala i werem ol waet klos we oli saen strong.

“Papa long Heven mo Jisas Kraes i bin kamkamaot long Josef,” Sista Cruz i talem. “Tufala i talem long hem se bae hem i putumbak Jos Ia blong Jisas. Yumi singaotem hemia Fas Visen.”

Lhensay i openem ol ae blong hem bigwan mo leftemap han blong hem. “?Hemia tru wan ia?” hem i askem.

Sista Cruz i sakem hed blong hem blong agri. “!Yes, hem i tru!”

Lhensay i filim gud long hat blong hem. Hem i save wanem we Sista Cruz i bin talem i tru.

Long naet ia, Lhensay i wokem tingbaot Josef Smit. “Mama, ?olsem wanem nao mi save luk Papa long Heven mo Jisas, olsem Josef Smit i bin mekem?” hem i askem.

Mama i haggem Lhensay. “Plante long yumi bae i no luk Papa long Heven mo Jisas olsem we Josef Smit i bin luk. Be yet, Tufala i save toktok long yumi tru long ol tingting mo filing we i kam long Tabu Spirit. Afta bae yu save save se Tufala i stap wetem yu oltaem.”

Lhensay i tingbaot olsem wanem hat blong hem i filim gud taem Sista Cruz i bin talem long olgeta abaot Fas Visen. !Hemia i bin Tabu Spirit ia, we i sendem wan mesej long hem we i kam long Papa long Heven mo Jisas Kraes! Hem i smael mo haggem bak Mama. Tufala i bin toktok long hem, !semmak olsem Tufala i bin mekem long Josef Smit!