Restoresen I Stat

Palmaera, Niu Yok (1820): Josef Smit mo famli blong hem i bin laef long ples ia. Evri memba blong famli blong Josef oli stap go long ol defdefren jos, mo Josef i no save wanem jos nao blong joenem. Hem i ridim long Baebol se: “Sapos wan long yufala i no gat waes, hem i mas askem long God” (Jemes 1:5

Tabu Bus (spring blong 1820): Josef Smit i bin prea mo askem God abaot wanem jos nao bae hem i joenem. Papa long Heven mo Jisas Kraes i bin visitim hem. Tufala i talem long hem se bae hem i no joenem eni long ol jos ia. Tufala i singaotem Josef blong i help blong putumbak gospel blong Jisas Kraes we i fulwan long wol.

Rum blong Josef (1823): Enjel Moronae i visitim Josef Smit. Hem i talem long Josef abaot ol buk we oli wokem long gol we i gat gospel blong Jisas Kraes we i fulwan. Taem Moronae i stap toktok, Josef i luk wan visen blong ples we oli bin berem ol buk we oli wokem long gol.

Hil Kumora (1827): Enjel Moronae i bin givim ol buk we oli wokem long gol long Josef Smit long Hil Kumora. Josef i bin kasem ol spesel tul tu we oli bin berem wetem ol buk ia. God i bin rere long olgeta blong helpem Josef blong transletem ol buk ia. Ol buk ia we oli bin transletem, i kam Buk blong Momon, mekem se evri pikinini blong God bae oli save ridim ol toktok blong Hem.