Lukluk long Kraes

Kailey we i gat seventi yia i bin wan lida blong wan grup blong danis long ol spot kompetisen, be afta long wan aksiden, bren blong hem i damej. Hem i stap wet blong kam oraet fulwan mekem hem i no go long skul, mo hem i stat blong filim se hem i stap hemwan. Hem i bin stap sik long saed blong filing mo no save wea blong lukluk long hem blong kasem help. Wan fren blong hem i talem long hem blong lisin long ol misinari. Oli tijim hem abaot Atonmen blong Jisas Kraes. Blong lanem moa abaot Kraes i givim hem hop, mo hem i bin filim olsem we God Hemwan i stap toktok long hem.

Kailey i talem long mama blong hem, “Mi neva filim se God i lavem mi. Be naoia mi save se Hem i lavem mi.”

Mama blong hem, Michelle, i sapraes sol. Hem mo hasban blong hem, Brock, i bin lego Jos Ia blong Jisas Kraes blong Ol Lata-dei Sent taem Kailey i gat seven yia from plante kwestin, tu tingting, mo ol wari. Tufala i ting se pikinini gel blong tufala bae i moa hapi taem bae hem i no save long ol miting mo ol komanmen. Tufala i neva ting se joes blong tufala bae i kipim Kailey long wan koneksen we kolosap wetem God. Taem Michelle mo Brock i wajem olsem wanem Kailey i jenis, tufala i luksave se i bin wan longfala taem we tufala i bin filim kolosap long God, mo tufala i wantem blong filim olsem ia bakegen.

Olgeta oli mit wetem bisop, mo i no longtaem famli ia, tugeta wetem Kailey mo brata blong hem Braeden oli kambak long jos. Blong filim kolosap long God mo stap konek wetem Hem—speseli tru long prea—i bin putumbak fet blong olgeta. Blong stap kambak long jos i no bin ansarem evri kwestin o wari blong olgeta, be, olgeta oli luksave se blong gat wan strong koneksen wetem God i moa impoten bitim ol fasin blong olgeta blong no biliv.

Evri samting ia i stat taem wan fren—wan yangfala olsem yu—i bin invaetem Kailey blong lukluk long Kraes. !Mo hem i mekem!

Jisas Kraes i bin talem se, “Luk long mi long evri tingting blong yutufala; no gat tu tingting, no fraet” (Doktrin mo Ol Kavenan 6:36). Hemia nao tingting biaen long 2025, Stamba Toktok blong Ol Yut. Letem mifala i serem olsem wanem yu save jusum tras be i no tu tingting, fet be i no fraet taem yumi lukluk long Kraes:

Tamara W. Runia

Taem mi stap fesem hadtaem, oltaem i helpem mi blong pikjarem Jisas Kraes wetem ol han blong Hem we oli open i kam long fored. Taem mi lukluk long Hem, mi tingbaot ol toktok blong singsing ia, “Bae Mi Wokbaot Wetem Jisas”: “Hem bae neva livim mi, iven taem mi foldaon.”

Emily Belle Freeman

Taem mi ridim stamba toktok ia long skripja, mi tingbaot Pita long Solwota blong Galili. Blong stap lukluk nomo long strong win i mekem fraet mo tu tingting i kam bigwan, we i mekem hem i draon i go long ol strong solwota. Be taem hem i lukluk nomo long Sevya, i mekem Hem i mekem samting we hem i neva mekem bifo: hem wokbaot long wota! Hem i spesel tumas, mi no kiaman. ?Wanem nao yu save mekem taem yu lukluk long Hem?

Andrea Muñoz Spannaus

Taem mi stat blong gat filing blong fraet, nomata weaples mi stap o long wanem situesen mi mi stap long hem, wetem mining mi tingting long rilesensip blong mi wetem Papa long Heven mo Jisas Kraes. Mi ripitim long tingting blong mi plante taem: MI MI WAN PIKININI GEL BLONG GOD. Mi gohed blong mekem olsem kasem taem mi stat blong filim gud. !I wok oltaem!

Bradley R. Wilcox

Askem yuwan huia nao i kea mo lavem yu moa. ?Hem i ol papa mo mama blong yu mo ol Jos lida blong yu? ?Hem i ol pipol long sosol media, we long olgeta yu yu wan namba nomo? Lukluk long Papa long Heven mo Kraes. !Tufala i kea long yu!

Steven J. Lund

Tingbaot wanem we toktok blong Aronik Prishud Kworom mo Yang Woman stamba toktok oli stap talem long yu taem yu stap talem baehat: Yu yu wan pikinini boe o pikinini gel blong God. Gat fet se Papa blong yumi i gat plan blong yu. Blong stap lukluk long Kraes i minim blong stap luksave se Atonmen blong Hem hem i stap stret long medel blong plan ia.

Michael T. Nelson

!Stap ridim ol skripja i blong lukluk long Kraes! Ol tu tingting mo ol fraet bae oli ronwe taem yumi tingbaot ol merikel mo ol tijing blong Jisas. Yumi laki tumas blong gat akses long ol toktok blong Hem. Oli aplae long evri situesen we yumi eksperiensem long laef blong yumi.