Ansarem Ol Kwestin blong Mi Wan abaot Jos Histri

Long histri klas blong mi, tija blong mi i bin stat blong tokbaot Jos Ia blong Jisas Kraes blong Ol Lata-dei Sent. Hem i no talem ol gudfala tingting abaot Jos. Hem i talem se yumi praktisim poligami mo fasin blong agensem ol nara man folem kantri o kala blong skin.

Evri samting we mi bin lanem abaot Jos, mi kam blong andastanem. Be eksperiens blong mi long klas i bin mekem mi tingbaot sam had kwestin abaot Jos Histri, olsem, from wanem ol blak pipol oli no bin letem olgeta blong holem prishud long wan taem, mo from wanem fasin blong gat plante woman i bin hapen.

From hemia, mi bin stat blong tingting, tingting hevi, mo stap prea. Mi ridim ol skripja, toktok wetem papa mo mama blong mi mo ol lida, mo bin lanem moa miwan. Nomata mi bin gat ol kwestin, mi no bin givap.

Taem mi stadi mo lan, mi filim olsem se glad i fulumap mi. Mi no andastanem fulwan evri samting yet, be mi bin save faenem pis.

Naoia taem mi gat ol kwestin, mi holemtaet wanem we mi save finis, olsem evri eksperiens we oli bin helpem testemoni blong mi blong gro. Taem wan samting i mekem mi konfius, oltaem mi prea faswan, mo afta mi traem blong lisin long Spirit taem mi stap ridim ol skripja.

Long las twelef manis, mi bin kam blong save gud paoa blong Spirit, mo mi bin filim pis mo kamfot mo lav. Mi save se i tru, i gat wan God we i toktok wetem yumi, mo i wantem yumi blong gobak hom.