« វិធី ៣ យ៉ាងដើម្បីស៊ូទ្រាំក្នុងជីវិត ហើយ រីករាយនឹងជីវិតនោះ » លីអាហូណា ខែ កញ្ញា ឆ្នាំ ២០២៤ ។
យុវមជ្ឈិមវ័យ
វិធី ៣ យ៉ាងដើម្បី ស៊ូទ្រាំក្នុងជីវិត ហើយ រីករាយនឹងជីវិតនោះ
ព្រះវរបិតាសួគ៌មានព្រះទ័យចង់ឲ្យយើងរកឃើញអំណរក្នុងជីវិតដែលយើងត្រូវបានប្រទានឲ្យ ។
ហ្គុយដូ មកពីប្រទេសអាល្លឺម៉ង់
តើពេលណាជាពេលចុងក្រោយ ដែលបងប្អូនពិតជាសប្បាយចិត្ត ?
តើសំណួរនោះពិបាកនឹងឆ្លើយឬ ?
ក្នុងអំឡុងពេលដ៏លំបាក យើងអាចត្រូវបានសន្ធប់ដោយការសាកល្បងទាំងឡាយរបស់យើង ដែលយើងពិតជាមិនអាចនឹកឃើញពីអារម្មណ៍នៃអំណរនោះទេ ។ ដូចជាស៊ីស្ទើរ រ៉េណា អ៊ី អាប៊ើតូ អតីតទីប្រឹក្សាទីពីរក្នុងគណៈប្រធានសមាគមន៍សង្គ្រោះទូទៅ បានពិពណ៌នា ៖ « ពពកខ្មៅក៏អាច … មានក្នុងជីវិតរបស់យើងដែរ ដែលវាអាចធ្វើឲ្យបាំងនូវពន្លឺរបស់ព្រះ ហើយថែមទាំងធ្វើឲ្យយើងសួរសំណួរថាតើពន្លឺនោះនៅមានសម្រាប់យើងទៀតដែរឬទេ » ។
សម្រាប់ពួកយើងជាយុវមជ្ឈិមវ័យជាច្រើន ពេលខ្លះយើងអាចមានអារម្មណ៍ថាជីវិតគឺជាអ្វីមួយដែលយើងគ្រាន់តែត្រូវស៊ូទ្រាំ—ជាអ្វីមួយដែលត្រូវពុះពារឆ្លងកាត់ រហូតដល់ទីបំផុតដល់យើងទទួលបានពរជ័យទាំងនោះដែលបានសន្យាដល់យើង ។
អ្វីដែលយើងភ្លេចនៅពេលខ្លះគឺថា វាក៏មានអ្វីដែលត្រូវ រីករាយ ផងដែរ ។ ពរជ័យនៃសុភមង្គលដ៏អស់កល្បជានិច្ចអាចចាប់ផ្ដើម ឥឡូវនេះ ។
នេះគឺជាវិធីមួយចំនួនដែលយើងអាចបញ្ឆេះពន្លឺ និងអំណរក្នុងជីវិតរបស់យើងឡើងវិញ ។
ចងចាំការពិតដ៏សាមញ្ញ
ជំនួសឲ្យការបង្ហាត់ភ្នែករបស់យើងឲ្យមើលឃើញនៅក្នុងភាពងងឹត យើងអាចស្វែងរកកាំរស្មីពន្លឺដែលដំណឹងល្អរបស់ព្រះយេស៊ូវគ្រីស្ទនាំមកដល់ជីវិតរបស់យើង ។
ប្រធាន រ័សុល អិម ណិលសុន បានរំឭកយើងថា « អំណរកើតមានឡើង ហើយដោយសារតែ [ ព្រះយេស៊ូវគ្រីស្ទ ] ។ ទ្រង់គឺជាប្រភពនៃអំណរទាំងអស់ » ។ នៅពេលបងប្អូនកំពុងពុះពាររកពន្លឺក្នុងជីវិតរបស់បងប្អូន ការបែរទៅរកព្រះយេស៊ូវគ្រីស្ទគួរតែជាជំហានដំបូងជានិច្ច ។
បងប្អូនក៏អាចទូលសូមព្រះវរបិតាសួគ៌ឲ្យជួយបងប្អូនចងចាំពីសារៈសំខាន់នៃអត្តសញ្ញាណដ៏ទេវភាពរបស់បងប្អូនផងដែរ ។
អែលឌើរ ហ្គែរី ប៊ី សាប៊ីន នៃពួកចិតសិបនាក់បានបង្រៀនថា វា « មានសារៈសំខាន់ចំពោះសុភមង្គលរបស់យើង ដែលយើងត្រូវចាំថា យើងជាបុត្រាបុត្រីនៃព្រះវរបិតាសួគ៌ដែលពេញដោយក្តីស្រឡាញ់ » ។ ការដឹង ពិតប្រាកដ ថាព្រះដឹងពីបងប្អូន ហើយមានព្រះទ័យចង់បាននូវអ្វីដែលល្អបំផុតសម្រាប់បងប្អូន អាចបំភ្លឺជីវិតរបស់បងប្អូនបាន ។
ទោះបីជាមានឧបសគ្គទាំងឡាយដែលបងប្អូនប្រឈមក្ដី ការចងចាំពីគោលការណ៍មូលដ្ឋាននៃដំណឹងល្អទាំងនេះអាចជួយបងប្អូនឲ្យអញ្ជើញពន្លឺរបស់ព្រះអង្គសង្គ្រោះចូលទៅក្នុងជីវិតរបស់បងប្អូនបាន ។
ស្វែងរកអ្វីដែលនាំសុភមង្គលដល់បងប្អូន
ពេលខ្លះ វាអាចពិបាកក្នុងការចងចាំថា សុភមង្គលរបស់យើងមិនតែងតែមើលទៅដូចគ្នានឹងមនុស្សគ្រប់គ្នានោះទេ ។ តាមពិតទៅ ក្នុងនាមជាយុវមជ្ឈិមវ័យ វាពិបាកក្នុងការមិនប្រៀបធៀបជីវិតរបស់យើងទៅនឹងមនុស្សដែលនៅជុំវិញយើងណាស់ ។ ប៉ុន្តែ សូមចាំថា បងប្អូនមានការគ្រប់គ្រងលើសុភមង្គល របស់បងប្អូនផ្ទាល់ ។
សូមសួរខ្លួនឯង ៖ តើអ្វីទៅដែលធ្វើឲ្យ បងប្អូន សប្បាយចិត្ត ?
តើអ្វីដែលធ្វើឲ្យបងប្អូនញញឹម ?
ដូចដែលប្រធាន ឌៀថើរ អេហ្វ អុជដូហ្វ បានផ្ដល់យោបល់នៅពេលដែលលោកជាទីប្រឹក្សាទីពីរនៅក្នុងគណៈប្រធានទីមួយថា « សូមកាត់បន្ថយការប្រញាប់ប្រញាល់ ហើយចំណាយពេលបន្ថែមបន្តិចដើម្បីស្គាល់ខ្លួនឯងឲ្យកាន់តែច្បាស់ » ។ សូមរកមើលភាពស្រស់ស្អាតក្នុងការណ៍តូចតាច ៖ ដើរស្រូបខ្យល់អាកាស ។ ទៅព្រះវិហារបរិសុទ្ធ ។ ចុះឈ្មោះសម្រាប់គម្រោងការបម្រើមួយ ។ ស្វែងរកចំណូលចិត្តថ្មី ឬបន្តចំណូលចិត្តចាស់ដែលបងប្អូនទុកចោល ។
អែលឌើរ រីឆាដ ជី ស្កត ( ១៩២៨–២០១៥ ) ក្នុងកូរ៉ុមនៃពួកសាវកដប់ពីរនាក់ ធ្លាប់បានមានប្រសាសន៍អំពីរបៀបដែលការច្នៃប្រឌិតអាចបំភ្លឺជីវិតរបស់យើង ៖ « សូមជ្រើសរើសអ្វីមួយដូចជាតន្ត្រី រាំរែក ចម្លាក់ ឬកំណាព្យ ។ ការមានភាពច្នៃប្រឌិតនឹងជួយបងប្អូនឲ្យរីករាយនឹងជីវិត ។ វាបង្កើតនូវស្មារតីនៃការដឹងគុណ ។ វាអភិវឌ្ឍទេពកោសល្យដែលមើលមិនឃើញ សម្រួចសមត្ថភាពរបស់បងប្អូនដើម្បីរកហេតុផល ប្រព្រឹត្ត និងស្វែងរកគោលបំណងក្នុងជីវិត ។ វាកម្ចាត់ចោលនូវភាពឯកោ និងការឈឺចាប់ក្នុងចិត្ត ។ វាផ្តល់នូវការចាប់ផ្ដើមឡើងវិញ បញ្ឆេះភាពសោមនស្សរីករាយ និងភាពស្វាហាប់សម្រាប់ជីវិត » ។
ការស្វែងរកអ្វីដែលបំពេញដួងចិត្តដោយសុភមង្គលអាចជួយបញ្ឆេះពន្លឺឡើងវិញក្នុងជីវិតរបស់បងប្អូន នៅពេលដែលបងប្អូនជាប់គាំង ។
ផ្តោតលើអ្វីដែលសំខាន់បំផុត
ប្រសិនបើជីវិតសន្ធប់ពេក ហើយបងប្អូនមានអារម្មណ៍ថា វាទាញយកថាមពលទាំងអស់របស់បងប្អូន គ្រាន់តែដើម្បីឆ្លងផុតមួយថ្ងៃៗ នោះសូមចំណាយពេលនៅស្ងៀម ដើម្បីផ្តោតអារម្មណ៍ទៅលើអ្វីដែលសំខាន់ បំផុត ។
ដើម្បីធ្វើដូច្នេះ ប្រធាន អុជដូហ្វ បានផ្ដល់យោបល់ថា យើងត្រូវ « ធ្វើឲ្យជីវិតយើងសាមញ្ញបន្តិច » ។ សូមផ្ដោតជីវិតរបស់បងប្អូនឡើងវិញទៅលើសេចក្ដីស្រឡាញ់របស់ព្រះវរបិតាសួគ៌ និងអំណោយដ៏ស្រស់ស្អាតនៃដង្វាយធួនរបស់ព្រះគ្រីស្ទ ។ ផ្ដល់អាទិភាពដល់ទំនាក់ទំនងរបស់បងប្អូនជាមួយក្រុមគ្រួសារ មិត្តភក្តិ និងខ្លួនឯង ។
ចូរយកភាពវិជ្ជមានប្រយុទ្ធនឹងភាពអវិជ្ជមាន ពន្លឺនៃព្រះយេស៊ូវគ្រីស្ទ និងដំណឹងល្អរបស់ទ្រង់ប្រយុទ្ធនឹងភាពងងឹត ។
ដូចជាប្រធាន ណិលសុន បានលើកទឹកចិត្តយើងថា ៖ « ចូរយើងកុំគ្រាន់តែ ស៊ូទ្រាំ ក្នុងរដូវកាលបច្ចុប្បន្ននេះប៉ុណ្ណេះឡើយ ។ ចូរយើង ឱបក្រសោបយកអនាគតដោយសេចក្ដីជំនឿ ! » ខណៈដែលកំពុងស៊ូទ្រាំនឹងការលំបាកក្នុងជីវិត ចូររៀនរីករាយនឹងភាពស្រស់ស្អាតរបស់វាផងដែរ ។ សុភមង្គលដ៏អស់កល្បជានិច្ចដែលដំណឹងល្អសន្យា មិនចាប់ផ្ដើមនៅពេលអនាគតឡើយ—វាចាប់ផ្តើមឥឡូវនេះ ។