« ការណ៍ល្អដែលដំណឹងល្អបាននាំមកដល់ខ្ញុំ » លីអាហូណា ខែ កញ្ញា ឆ្នាំ ២០២៤ ។
សំឡេងពួកបរិសុទ្ធថ្ងៃចុងក្រោយ
ការណ៍ល្អដែលដំណឹងល្អបាននាំមកដល់ខ្ញុំ
ដោយសារមនុស្សនៅព្រះវិហារ ខ្ញុំបានទទួលអារម្មណ៍ពីព្រះវិញ្ញាណបរិសុទ្ធ ។
ពេលខ្ញុំធំឡើង វីរបុរសរបស់ខ្ញុំគឺជាជីតាខាងម្តាយខ្ញុំ acheii របស់ខ្ញុំ ។ គាត់មានជំនឿរឹងមាំណាស់ ។ ខ្ញុំបានទៅព្រះវិហារផ្សេងៗជាច្រើនជាមួយគាត់ ប៉ុន្តែសាសនាមិនមែនសម្រាប់រូបខ្ញុំទេ ។
ពេលខ្ញុំបានជួបជីណា ដែលបានក្លាយជាភរិយារបស់ខ្ញុំ នាងគឺជាសមាជិកដ៏ស្មោះត្រង់ម្នាក់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ នាងចង់ឲ្យខ្ញុំរៀនអំពីសាសនាចក្រដើម្បីយើងអាចរៀបការនៅក្នុងព្រះវិហារបរិសុទ្ធ ។ ប៉ុន្តែខ្ញុំមិនចង់បានបែបនោះទេ ។ ខ្ញុំមិនមែនអ្នកកាន់សាសនាទេ ។
នៅទីបំផុតយើងបានរៀបការតាមច្បាប់ស៊ីវិល ។ បន្ទាប់ពីយើងមានកូនម្នាក់ ខ្ញុំនៅតែមិនចាប់អារម្មណ៍នឹងសាសនាចក្រដដែល តែជីណានៅតែចូលរួម ។
ទីបំផុត ខ្ញុំបានសម្រេចចិត្តថា ខ្ញុំនឹងបង្ហាញថាសាសនាចក្ររបស់នាងគឺខុសឆ្គង ដោយការទៅព្រះវិហារផ្សេងទៀត ។ ការណ៍នេះបានបន្តអស់ជាច្រើនឆ្នាំ ប៉ុន្តែមិនថាខ្ញុំទៅកន្លែងណាទេខ្ញុំមិនស្រណុកចិត្តសោះ ។
បន្ទាប់មក នៅថ្ងៃអាទិត្យមួយ នៅពេលជីណារៀបចំកូនស្រីយើងដើម្បីទៅព្រះវិហារ ខ្ញុំក៏បានចាប់ផ្ដើមស្លៀកពាក់សម្រាប់ព្រះវិហារផងដែរ ។ នាងបានសម្លឹងមើលខ្ញុំ ហើយសួរថា « តើបងកំពុងធ្វើអ្វីហ្នឹង ? » ខ្ញុំតបថា « បងនឹងទៅព្រះវិហារជាមួយអូនដែរ » ។ នាងបានសម្លឹងមើលកូនស្រីយើង ហើយនិយាយថា « រៀបចំខ្លួនឲ្យលឿនឡើង ! យើងមិនចង់ឲ្យប៉ាកូនផ្លាស់ប្តូរចិត្តគាត់ទេ ! »
ដូច្នេះ យើងបានចេញទៅ ។ ព្រោះខ្ញុំទទួលអារម្មណ៍ពីព្រះវិញ្ញាណបរិសុទ្ធតាមរយៈមនុស្សនៅព្រះវិហារ នោះពួកគេគឺផ្នែកមួយដ៏ចាំបាច់សម្រាប់ការប្រែចិត្តជឿរបស់ខ្ញុំ ។ បន្ទាប់ពីនោះ ពួកអ្នកផ្សព្វផ្សាយសាសនាបានមកផ្ទះរបស់យើង ។ ពួកគេពិតជាអស្ចារ្យណាស់ ការបង្រៀនដែលពួកគេបានចែកចាយគឺអស្ចារ្យណាស់ចំពោះខ្ញុំ ហើយព្រះវិញ្ញាណបានជ្រួតជ្រាបពេញដួងចិត្ដខ្ញុំ ( សូមមើល មរ៉ូណៃ ១០:៤–៥ ) ។
ពេលខ្ញុំទៅសួរសុខទុក្ខជីតារបស់ខ្ញុំ ដើម្បីប្រាប់គាត់ពីអ្វីដែលខ្ញុំបានរកឃើញ គាត់មិនសប្បាយចិត្តទេ ។ ប៉ុន្តែខ្ញុំបានដឹងថា ខ្ញុំត្រូវធ្វើតាមដួងចិត្តរបស់ខ្ញុំ ។
ខ្ញុំបានចូលរួមសាសនាចក្រ ហើយមិនយូរប៉ុន្មានជីណា និងខ្ញុំបានផ្សារភ្ជាប់នៅក្នុងព្រះវិហារបរិសុទ្ធ ។ កូនស្រីរបស់យើងបានផ្សារភ្ជាប់នឹងយើង ហើយឥឡូវនេះយើងមានកូនបីនាក់ទៀត ដែលបានកើតនៅក្នុងសេចក្តីសញ្ញានេះ ។
វាចំណាយពេល ១០ ឆ្នាំ សម្រាប់ acheii របស់ខ្ញុំ ដើម្បីគោរពអ្វីដែលយើងជឿលើសាសនាចក្រនៅទីបំផុត ។ នៅក្នុងការបញ្ចប់ការសិក្សាវិទ្យាល័យរបស់កូនប្រុសខ្ញុំ គាត់បានប្រាប់អ្នកទាំងអស់គ្នាជាភាសា ណាវ៉ាចូ ថា « តារីករាយនឹងគ្រួសារនេះ ។ តាគាំទ្រអ្វីដែលពួកគេជឿ ។ កូនៗរបស់ពួកគេពិតជាដឹងពីរបៀបអធិស្ឋាន » ។
ខ្ញុំជាសមាជិកតែម្នាក់គត់នៃសាសនាចក្រ ក្នុងគ្រួសារញាតិសន្តានរបស់ខ្ញុំ ប៉ុន្តែខ្ញុំដឹងថា ពួកគេទទួលយកថា ការប្រែចិត្តជឿរបស់ខ្ញុំគឺពិតប្រាកដ ហើយពួកគេឃើញពីការណ៍ល្អដែលដំណឹងល្អដែលបាននាំមកដល់ភរិយារបស់ខ្ញុំ កូនៗរបស់យើង និងខ្លួនខ្ញុំ ។