« តើខ្ញុំអាចពង្រឹងទីបន្ទាល់របស់ខ្ញុំអំពីព្យាការីដោយរបៀបណា ? » លីអាហូណា ខែ កញ្ញា ឆ្នាំ ២០២៤ ។
ចូរមកតាមខ្ញុំ
តើខ្ញុំអាចពង្រឹងទីបន្ទាល់របស់ខ្ញុំអំពីព្យាការីដោយរបៀបណា ?
សន្និសីទទូទៅអាចជួយយើងពង្រឹងទីបន្ទាល់របស់យើងអំពីព្យាការីដែលនៅរស់ ។
នៅក្នុងគម្ពីរហេលេមិន ព្យាការីសាំយូអែលបានថ្លែងទីបន្ទាល់អំពីព្រះយេស៊ូវគ្រីស្ទ ហើយផ្ដល់ការព្រមាន និងការអញ្ជើញដល់ពួកសាសន៍នីហ្វៃ ( សូមមើល ហេលេមិន ១៣–១៤ ) ។ នៅជំនាន់យើង យើងក៏មានឱកាសស្តាប់ការព្រមានទាន់ពេលវេលាពីព្យាការីរបស់យើង និងថ្នាក់ដឹកនាំសាសនាចក្រដទៃទៀតផងដែរ ។ ការស្តាប់តាមការអញ្ជើញរបស់ពួកលោកជួយយើងឲ្យដើរតាមផ្លូវនៃសេចក្ដីសញ្ញា ។
សន្និសីទទូទៅគឺជាឱកាសដ៏ល្អឥតខ្ចោះមួយ ដើម្បីស្តាប់ប្រសាសន៍ថ្មីៗបំផុតពីថ្នាក់ដឹកនាំដ៏បំផុសគំនិតរបស់យើង ហើយខិតកាន់តែជិតព្រះយេស៊ូវគ្រីស្ទ ។ នេះជាវិធីមួយចំនួនដែលបងប្អូនអាចពិចារណាប្រើប្រាស់សន្និសីទទូទៅដើម្បីបង្កើនទីបន្ទាល់របស់បងប្អូនអំពីព្យាការីដែលនៅរស់ ៖
-
មុនសន្និសីទទូទៅ សូមពិចារណាដោយអធិស្ឋានអំពីមូលហេតុដែលការមានព្យាការីគឺសំខាន់ចំពោះបងប្អូន ។ សូមពិចារណាអធិស្ឋានដើម្បីទទួលបានការបញ្ជាក់ពីព្រះវិញ្ញាណថា ប្រធានសាសនាចក្របច្ចុប្បន្នគឺជាព្យាការីរបស់ព្រះ អ្នកមើលឆុត និងជាអ្នកទទួលវិវរណៈនៅលើផែនដីសព្វថ្ងៃនេះ ។ « ការដឹងដោយវិវរណៈថា មានព្យាការីដែលនៅរស់ម្នាក់លើផែនដីនេះផ្លាស់ប្ដូរអ្វីៗទាំងអស់ » ។
-
ស្រាវជ្រាវអំពីអត្ថន័យនៃការគាំទ្រព្យាការី និងអ្នកមានសិទ្ធិអំណាចទូទៅ ។ សូមចូលរួមក្នុងការគាំទ្រពួកលោកនៅក្នុងការហៅបម្រើរបស់ពួកលោកក្នុងអំឡុងសម័យប្រជុំរសៀលថ្ងៃសៅរ៍ ។
-
« ហើយដោយព្រះចេស្ដានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្ដីពិតនៃគ្រប់ការណ៍ទាំងអស់ » ( មរ៉ូណៃ ១០:៥ ) ។ នៅពេលដែលបងប្អូនស្តាប់សារលិខិតពីថ្នាក់ដឹកនាំសាសនាចក្រ សូមយកចិត្តទុកដាក់ទៅលើព្រះវិញ្ញាណដែលថ្លែងទីបន្ទាល់ថា ពាក្យសម្តីរបស់ពួកលោកគឺពិត ។
-
តួនាទីសំខាន់មួយរបស់ព្យាការីគឺដើម្បីធ្វើជាសាក្សីអំពីព្រះយេស៊ូវគ្រីស្ទ ហើយបង្រៀនយើងឲ្យ « សម្លឹងមើលទៅព្រះរាជបុត្រានៃព្រះដោយនូវសេចក្ដីជំនឿ » ( សូមមើល ហេលេមិន ៨:១៣–១៦ ) ។ បងប្អូនប្រហែលជាចង់កត់ចំណាំពីអ្វីដែលព្យាការី និងអ្នកឡើងនិយាយផ្សេងទៀតបង្រៀនអំពីព្រះអង្គសង្រ្គោះ ។
-
« តាមរយៈ [ ប្រធាន រ័សុល អិម ណិលសុន ] យើងបានទទួលការអញ្ជើញរាប់មិនអស់ហើយបានទទួលការសន្យាថានឹងទទួលបានពរជ័យដ៏រុងរឿងបើយើងនឹងផ្តោតជីវិតរបស់យើងទៅលើព្រះអង្គសង្គ្រោះរបស់យើងគឺព្រះយេស៊ូវគ្រីស្ទ » ។ សូមពិចារណាធ្វើបញ្ជីនៃការអញ្ជើញដែលព្យាការី និងអ្នកឡើងនិយាយផ្សេងទៀតក្នុងអំឡុងពេលសន្និសីទបានអញ្ជើញ ។ សូមយោងទៅកាន់បញ្ជីនោះវិញ ដើម្បីជួយបងប្អូនឲ្យខិតខំដើម្បីប្រែក្លាយកាន់តែដូចជាព្រះគ្រីស្ទ ។
-
សូមចងចាំពីការអញ្ជើញរបស់ប្រធាន ណិលសុន ៖ « ខ្ញុំសូមដាស់តឿនដល់បងប្អូនឲ្យសិក្សាសារលិខិតសន្និសីទនេះឲ្យបានញឹកញាប់—ម្ដងហើយម្ដងទៀត—អំឡុងប្រាំមួយខែក្រោយ » ។ ពេលបងប្អូនស្ដាប់ ឬអានសារលិខិតទាំងនោះម្ដងទៀត សូមគូសចំណាំនូវអ្វីដែលលេចធ្លោចំពោះបងប្អូន ។
-
ប្រធាន ណិលសុន អញ្ជើញយើងឲ្យ « ស្វែងរក និងរំពឹងថាមានអព្ភូតហេតុ » ។ ពេលបងប្អូនគោរពតាមដំបូន្មានរបស់ព្យាការី ហើយធ្វើការផ្លាស់ប្ដូរក្នុងជីវិតរបស់បងប្អូន សូមយកចិត្តទុកដាក់ទៅលើពរជ័យដែលបងប្អូនទទួល និងអព្ភូតហេតុដែលបងប្អូនឃើញ ( សូមមើល ហេលេមិន ១៦:៤–៥ ) ។
នៅពេលដែលបងប្អូនធ្វើតាមជំហានទាំងនេះ ដើម្បីអភិវឌ្ឍទីបន្ទាល់របស់បងប្អូនអំពីព្យាការី អ្នកមើលឆុត និងអ្នកទទួលវិវរណៈ សូមដាក់សេចក្ដីជំនឿរបស់បងប្អូនទៅលើព្រះយេស៊ូវគ្រីស្ទ និងព្រះវរបិតាសួគ៌ដែលពោរពេញដោយសេចក្ដីស្រឡាញ់ ។ ដោយក្ដីស្រឡាញ់ ព្រះបានប្រទានដល់យើងនូវព្យាការីទាំងឡាយ ដើម្បីដឹកនាំយើងឲ្យត្រឡប់ទៅកាន់ទ្រង់វិញ—ព្យាការីដែលជាអ្នកនាំពាក្យរបស់ទ្រង់ បង្ហាញពីព្រះរាជបំណងប្រាថ្នារបស់ទ្រង់ទៅកាន់ពិភពលោក ។ ( សូមមើល គោលលទ្ធិ និងសេចក្ដីសញ្ញា ១:៣៨; ២១:៥–៦ ) ។ ប្រសិនបើយើងជ្រើសរើសធ្វើតាមដំបូន្មានរបស់អ្នកបម្រើរបស់ទ្រង់ នោះយើងជ្រើសរើសធ្វើតាមទ្រង់ហើយ ។