« ព្រះមានអ្វីដែលប្រសើរជាងសម្រាប់យើង » លីអាហូណា ខែ កញ្ញា ឆ្នាំ ២០២៤ ។
សំឡេងពួកបរិសុទ្ធថ្ងៃចុងក្រោយ
ព្រះមានអ្វីដែលប្រសើរជាងសម្រាប់យើង
ពេលពួកអ្នកផ្សព្វផ្សាយសាសនាបានបង្រៀនខ្ញុំថា ខ្ញុំជាបុត្ររបស់ព្រះ ខ្ញុំបានដឹងថាទ្រង់មានពរជ័យបន្ថែមទៀតសម្រាប់គ្រួសារខ្ញុំ និងខ្ញុំ ។
រូបថតមកពីអ្នកនិពន្ធ
ខ្ញុំបានធំឡើងនៅភូមិតូចមួយ នៅជនបទក្នុងប្រទេសហ្វីលីពីន ។ គ្រួសារខ្ញុំក្រីក្រ ។ នៅប្រទេសហ្វីលីពីន ប្រសិនបើបងប្អូនគ្មានលុយទេ បងប្អូនមិនអាចទៅសាលារៀនបានទេ ។ ទោះបីជាមានឧបសគ្គនោះក៏ដោយ ខ្ញុំគឺជាយុវជនដ៏មានមហិច្ឆតាម្នាក់ ។
ខ្ញុំបានប្រាប់ឪពុកម្ដាយខ្ញុំថា ខ្ញុំចង់ក្លាយជាវេជ្ជបណ្ឌិត ឬគ្រូបង្រៀន ឬជាអ្នកជំនាញអ្វីមួយ ប៉ុន្តែពួកគាត់តែងតែប្រាប់ខ្ញុំឲ្យឈប់ស្រមៃទៅ ។ យើងពុំមានលុយសម្រាប់ខ្ញុំដើម្បីទៅសាកលវិទ្យាល័យទេ ។ ឪពុកម្ដាយខ្ញុំចង់ឲ្យខ្ញុំសប្បាយចិត្ត ហើយមិនខកចិត្តនឹងជីវិតខ្ញុំ ។
ពួកគាត់បាននិយាយថា « ការធ្វើជាអ្នកជំនាញម្នាក់មិនមែនសម្រាប់ពួកយើងទេ » ។ ពួកគាត់មិនជឿថា មានអ្វីដែលប្រសើរជាងនេះសម្រាប់គ្រួសាររបស់យើង ជាងអ្វីដែលយើងមានរួចទៅហើយនោះទេ ។
ប៉ុន្តែ កាលនោះគឺមុនពេលពួកយើងបានចូលរួមនឹងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
យើងបានរស់នៅឆ្ងាយពីទីក្រុង ប៉ុន្តែពួកអ្នកផ្សព្វផ្សាយសាសនាបានរកឃើញយើង ហើយបន្តត្រឡប់មកវិញ ។ ពួកគេបានលះបង់ជាច្រើន ដើម្បីមកបង្រៀនគ្រួសារខ្ញុំ ប៉ុន្តែពួកគេបានផ្លាស់ប្ដូរជីវិតរបស់យើងជារៀងរហូត ។
ពេលយើងចូលរួមក្នុងសាសនាចក្រ ខ្ញុំបានដឹងថា ខ្ញុំជាបុត្ររបស់ព្រះដែលមានសក្តានុពលដើម្បីលូតលាស់ និងរៀនសូត្រ ហើយប្រែក្លាយ ( សូមមើល ម៉ូសេ ១:៣៩; « ក្រុមគ្រួសារ ៖ សេចក្តីប្រកាសដល់ពិភពលោក » ក្នុងបណ្ណាល័យដំណឹងល្អ ) ។ ដោយមានចំណេះដឹងអំពីដំណឹងល្អ ខ្ញុំបានដឹងថា វាដល់ពេលដើម្បីលើកកម្ពស់សេដ្ឋកិច្ចសង្គមគ្រួសាររបស់ខ្ញុំហើយ ។ យើងលែងជាមនុស្សក្រីក្រមកពីភូមិតូចមួយទៀតហើយ—យើងជាបុត្រាបុត្រីដ៏ស័ក្ដិសមរបស់ព្រះដែលសមនឹងទទួលពរជ័យដែលទ្រង់បានសន្យាដល់អ្នកដើរតាមដ៏ស្មោះត្រង់របស់ទ្រង់ ។
ពួកអ្នកផ្សព្វផ្សាយសាសនាបាននាំដំណឹងល្អចូលមកក្នុងជីវិតរបស់ខ្ញុំ ដំណឹងល្អបាននាំមកនូវតន្ត្រីមកក្នុងជីវិតខ្ញុំ ហើយតន្ត្រីបានធ្វើឲ្យខ្ញុំទទួលបានអាហារូបករណ៍ដើម្បីចូលរៀននៅសាកលវិទ្យាល័យ ។ ខ្ញុំបានទទួលសញ្ញាប័ត្រផ្នែកអប់រំកម្រិតអនុវិទ្យាល័យ ហើយបន្ទាប់មកមានសញ្ញាប័ត្រផ្នែកតន្ត្រី ដែលសិក្សាចម្បងក្នុងការដឹកនាំក្រុមចម្រៀង ។ ឥឡូវនេះខ្ញុំបង្រៀនតន្ត្រីនៅសាកលវិទ្យាល័យ លីសេអូ ឌើ កាកាយ៉ាន និងដឹកនាំក្លឹបក្រុមចម្រៀងដែលច្រៀងខ្លីៗជាក្រុមនៅវិទ្យាល័យលីសេអូ យូ ។ ខ្ញុំក៏ដឹកនាំក្រុមចម្រៀងសមាជិកសាសនាចក្រផងដែរ ។ បេសកកម្មរបស់យើងគឺដើម្បីចែកចាយសេចក្ដីពិតរបស់ព្រះតាមរយៈតន្ត្រី ។
ការបញ្ចប់ការសិក្សាពីសាកលវិទ្យាល័យបានផ្តល់ឲ្យខ្ញុំនូវជីវិតថ្មីមួយ ។ ខ្ញុំមិនដឹងថា ខ្ញុំនឹងនៅទីណាទេថ្ងៃនេះ បើគ្មានដំណឹងល្អរបស់ព្រះយេស៊ូវគ្រីស្ទ ។
មនុស្សគ្រប់គ្នាសមនឹងទទួលបានឱកាសរៀនដឹងដូចខ្ញុំដែរថា ពួកគេមានព្រះវរបិតាសួគ៌ ហើយទ្រង់ប្រទានពរដល់ពួកគេឲ្យមានសក្តានុពលដើម្បីលូតលាស់ និងរៀនសូត្រ ហើយប្រែក្លាយ ។