« រ័សុល អិម ណិលសុន ៖ ព្យាការីនៅជំនាន់របស់យើង » លីអាហូណា ខែ កញ្ញា ឆ្នាំ ២០២៤ ។
រ័សុល អិម ណិលសុន ៖ ព្យាការីនៅជំនាន់របស់យើង
ដោយមានព្យាការីម្នាក់ដើម្បីណែនាំយើងនៅគ្រាចុងក្រោយនេះ យើងពិតជាមនុស្សដែលមានពរ ។
ប្រធាន រ័សុល អិម ណិលសុន ស្វាគមន៍មនុស្សម្នាបន្ទាប់ពីការប្រជុំធម្មនិដ្ឋាននៅប្រទេសសិង្ហបុរី កាលពីថ្ងៃទី ២០ ខែ វិច្ឆិកា ឆ្នាំ ២០១៩ ។
នៅពេលដែលអ្នកសម្ភាសម្នាក់បានរិះគន់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយថាជា « ព្រះវិហារមួយដែលគ្រប់គ្រងដោយពួកបុរសចំណាស់ៗ » ប្រធាន ហ្គរដុន ប៊ី ហ៊ិងគ្លី ( ឆ្នាំ ១៩១០–២០០៨ ) បានឆ្លើយតបថា « តើវាមិនប្រពៃទេឬ ដែលមានមនុស្សមានភាពចាស់ទុំនៅក្បាលទូក ជាបុរសដែលមានការវិនិច្ឆ័យ ដែលមិនត្រូវបានបក់ផាត់ចុះឡើងដោយគ្រប់ខ្យល់នៃសេចក្ដីបង្រៀនបោកនោះ ? »
ប្រធាន រ័សុល អិម ណិលសុន ជាព្យាការីនៅរស់ដែលមានវ័យចំណាស់បំផុតដែលបម្រើក្នុងគ្រាកាន់កាប់ត្រួតត្រានេះ គឺជាបុរសបែបនេះ ។ លោកបញ្ចប់ឆ្នាំទី ១០០ របស់លោកនៅថ្ងៃទី ៩ ខែ កញ្ញា ឆ្នាំ ២០២៤ ។ លោកជាអ្នកដឹកនាំដែលមានសេចក្តីអាណិតអាសូរ និងភាពសប្បុរសដ៏អស្ចារ្យ ចក្ខុវិស័យ និងភាពក្លៀវក្លា ភាពកក់ក្ដៅ និងប្រាជ្ញាដ៏មិនធម្មតា ។
ខ្ញុំស្រឡាញ់ប្រធាន ណិលសុន ។ យើងបានក្លាយជាមិត្តនឹងគ្នាអស់រយៈពេល ៦០ ឆ្នាំ និងជាសាវកជាមួយគ្នាអស់រយៈពេល ៤០ ឆ្នាំមកហើយ ។ ចាប់តាំងពីខែ មករា ឆ្នាំ ២០១៨ មក ខ្ញុំបានទទួលពរជ័យឲ្យបម្រើក្រោមការដឹកនាំរបស់លោកនៅក្នុងគណៈប្រធានទីមួយនៃសាសនាចក្រ ។
ដោយបានហៅឲ្យដឹកនាំសាសនាចក្រដែលបានស្ដារឡើងវិញរបស់ព្រះយេស៊ូវគ្រីស្ទ ហើយធ្វើជាគ្រូបង្រៀនដ៏លេចធ្លោរបស់សាសនាចក្រ នោះប្រធាន ណិលសុន ស្គាល់ព្រះអង្គសង្រ្គោះ ដែលលោកជាព្យាការីរបស់ទ្រង់ ។ ឆ្លងកាត់ការរស់នៅ និងការរៀនសូត្រអស់មួយសតវត្សរ៍ លោកមានភាពប៉ិនប្រសពក្នុងវិជ្ជាជីវៈ និងការបម្រើក្នុងកងយោធាដ៏លេចធ្លោ ។ ជាមួយនឹងគ្រួសារដ៏ធំរបស់លោក លោកបានក្លាយជាអ្នកដឹកនាំគ្រួសារដែលពោរពេញដោយក្ដីស្រលាញ់ និងមានប្រសិទ្ធភាព។ តាមរយៈការបម្រើទាំងឡាយនៅក្នុងសាសនាចក្រ រួមទាំង ៦ ឆ្នាំកន្លងមកនេះក្នុងនាមជាព្យាការីរបស់ព្រះអម្ចាស់ លោកបានក្លាយជាអ្នកដឹកនាំដ៏គំរូនៅក្នុងសាសនាចក្រដែលបានស្ដារឡើងវិញរបស់ព្រះអម្ចាស់ ។
ឆ្លងកាត់ការរស់នៅអស់មួយសតវត្សរ៍ ប្រធាន ណិលសុន បានរៀន និងអនុវត្តនូវគន្លឹះនៃសុភមង្គលក្នុងជីវិតនេះ និងក្នុងជីវិតដែលនឹងមកដល់—ជាអ្វីដែលលោកបានហៅថា « មេរៀនដ៏សំខាន់បំផុតមួយ » នៃជីវិត ។
លោកបានបង្រៀនយើងថា យើងគប្បី « ចាប់ផ្តើមជាមួយនឹងទស្សនៈវិស័យដ៏ច្បាស់លាស់ » ។
លោកស្រឡាញ់ដំណាក់របស់ព្រះអម្ចាស់ ។ អំឡុងពេលលោកជាប្រធានសាសនាចក្រ លោកបានប្រកាសព្រះវិហារបរិសុទ្ធថ្មីចំនួន ១៥៣—ដែលប្រហែលនឹងពាក់កណ្តាលនៃព្រះវិហារបរិសុទ្ធសរុបចំនួន ៣៣៥ ដែលបានសាងសង់ កំពុងសាងសង់ ឬត្រូវបានប្រកាសនៅក្នុងគ្រាកាន់កាប់ត្រួតត្រានេះ ។
លោកបានបង្រៀនយើងថា អគារព្រះវិហារបរិសុទ្ធរបស់យើងទាំងអស់កំពុងនាំព្រះវិហារបរិសុទ្ធ និងពរជ័យនៃសេចក្ដីសញ្ញានៃព្រះវិហារបរិសុទ្ធទៅកាន់តែជិតបុត្រាបុត្រីរបស់ព្រះបានកាន់តែច្រើនឡើង ។ នោះគឺជាផែនការរបស់ព្រះ ។
ប្រធាន ណិលសុន បានបង្រៀនថា « ខ្ញុំបានរៀនថា ផែនការរបស់ព្រះវរបិតាសួគ៌សម្រាប់យើងគឺ អស្ចារ្យ ថាអ្វីដែលយើងធ្វើក្នុងជីវិតនេះពិតជាសំខាន់ ហើយថាដង្វាយធួនរបស់ព្រះអង្គសង្គ្រោះគឺជាអ្វីដែលធ្វើឲ្យផែនការរបស់ព្រះវរបិតាយើងសម្រេចទៅបាន » ។ លោកបានមានប្រសាសន៍ថា ការយល់ដឹងអំពីផែនការនោះ « ដកអាថ៌កំបាំងចេញពីជីវិត និងភាពមិនច្បាស់លាស់ចេញពីអនាគតរបស់យើង ។ វាអនុញ្ញាតឲ្យ យើង ម្នាក់ៗជ្រើសរើស របៀប ដែលយើងនឹងរស់នៅលើផែនដីនេះ និង កន្លែង យើងនឹងរស់នៅជារៀងរហូត » ។
ក្នុងនាមជាពួកបរិសុទ្ធថ្ងៃចុងក្រោយ យើងពិតជាមនុស្សមានពរដែលត្រូវបានដឹកនាំដោយអ្នកបម្រើដ៏រាបសារបស់ព្រះអម្ចាស់ គឺប្រធាន ណិលសុន ដែលបានឧទ្ទិសដល់ការរៀបចំពិភពលោកសម្រាប់ការយាងមកជាលើកទីពីររបស់ព្រះអង្គសង្រ្គោះ និងព្រះប្រោសលោះរបស់យើង គឺព្រះយេស៊ូវគ្រីស្ទ ។ សូមឲ្យយើងទាំងអស់គ្នាបន្តអធិស្ឋាន ថ្លែងទីបន្ទាល់ គាំទ្រ និងអរព្រះគុណព្រះចំពោះព្យាការីរបស់យើង—ប្រធាន រ័សុល អិម ណិលសុន ។