« យើងថ្លែងទីបន្ទាល់អំពីព្យាការីនៅរស់របស់យើង » លីអាហូណា ខែ កញ្ញា ឆ្នាំ ២០២៤ ។
យើងថ្លែងទីបន្ទាល់ អំពីព្យាការីនៅរស់របស់យើង
យើងអរគុណទ្រង់ចំពោះព្យាការី ។
ខ្ញុំដឹងថាប្រធាន រ័សុល អិម ណិលសុន គឺជាព្យាការីនៃព្រះ ហើយខ្ញុំមានអំណរគុណដែលព្រះបានមានព្រះបន្ទូលទៅកាន់លោក ។ សេចក្ដីស្រឡាញ់របស់ប្រធាន ណិលសុន ចំពោះយើងគឺជាការបើកសម្ដែងមួយអំពីសេចក្ដីស្រឡាញ់របស់ព្រះ ។ ខ្ញុំស្រឡាញ់ប្រធាន ណិលសុន ។ ការសន្យាដែលលោកប្រកាសគឺមកពីព្រះ ។
ចាស្ទីន ហ៊ីនូថាន ប្រទេសហ្វីលីពីន
ប្រធាន ណិលសុន បង្រៀនខ្ញុំថា អ្វីដែលសំខាន់បំផុតនៅថ្ងៃនេះគឺត្រូវជ្រើសរើសព្រះគ្រីស្ទដោយស្រឡាញ់ និងគោរពសេចក្ដីសញ្ញាទាំងឡាយ ។
រ៉ាយអិន ហូម ប្រទេសនូវែលសេឡង់
ខ្ញុំមានអំណរគុណយ៉ាងខ្លាំងចំពោះព្យាការី រ័សុល អិម ណិលសុន ។ ខ្ញុំសូមថ្លែងទីបន្ទាល់របស់ខ្ញុំថា លោកគឺជាបុរសម្នាក់ដែលត្រូវបានហៅដោយព្រះដើម្បីដឹកនាំ និងពង្រឹងយើងនៅថ្ងៃចុងក្រោយនេះ ។ បើយើងធ្វើតាមដំបូន្មានរបស់លោក នោះអ្វីៗទាំងអស់នឹងល្អ ។
ណិលសុន អាល់មីដា ប្រទេសកាប់វែរ
សូមអរគុណ ប្រធាន ណិលសុន អស់ពីដួងចិត្តរបស់យើង ចំពោះការផ្តល់ពាក្យនៃប្រាជ្ញាពីព្រះវរបិតាសួគ៌របស់យើង ។ សូមព្រះប្រទានពរដល់លោក ប្រធាន ណិលសុន ព្យាការីជាទីស្រឡាញ់របស់យើង !
ប្រិនដា បយលេ ប្រទេសស្កុតឡេន
សូមអរគុណ ប្រធាន ណិលសុន ចំពោះការបង្រៀនដ៏បំផុសគំនិត និងការលើកទឹកចិត្តរបស់លោក ។ ពួកយើងស្រឡាញ់លោក ។
ថោង ពុទ្ធារី ប្រទេសកម្ពុជា
ខ្ញុំមានអំណរគុណយ៉ាងខ្លាំងចំពោះសេចក្ដីស្រឡាញ់ និងការយល់ដឹងដែលប្រធាន ណិលសុន ផ្តល់ឲ្យក្នុងនាមជាព្យាការី ។ សុន្ទរកថារបស់លោកអំពីព្រះវិហារបរិសុទ្ធបាននាំខ្ញុំឆ្ពោះទៅការទទួលអំណោយទានពិសិដ្ឋរបស់ខ្ញុំ ការប្រជុំធម្មនិដ្ឋានរបស់លោកសម្រាប់យុវមជ្ឈិមវ័យបានរំឭកខ្ញុំឲ្យស្គាល់អត្តសញ្ញាណចម្បងរបស់ខ្ញុំ ក្នុងនាមជាបុត្ររបស់ព្រះ ហើយការជំរុញរបស់លោកសម្រាប់ការប្រមូលផ្តុំអ៊ីស្រាអែលដែលខ្ចាត់ខ្ចាយ គឺជាប្រធានបទដ៏ខ្ជាប់ខ្ជួនមួយក្នុងគ្រួសារ និងសហគមន៍វួដរបស់ខ្ញុំ ។ សំខាន់បំផុត លោកបានជួយខ្ញុំឲ្យខិតទៅជិតព្រះអង្គសង្គ្រោះរបស់ខ្ញុំ ។
ហ្គ្រេស ប៊ឺត សហរដ្ឋអាមេរិក
ខ្ញុំបានពិចារណាយ៉ាងជ្រាលជ្រៅអំពីការបង្រៀនរបស់ព្យាការីជាទីស្រឡាញ់របស់យើង រ័សុល អិម ណិលសុន ។ ការបង្រៀនរបស់លោកបានបំផុសគំនិតដល់ជីវិតខ្ញុំ ។ ពាក្យសម្ដីដ៏ព្យាករណ៍របស់លោកបានជំរុញចិត្តខ្ញុំឲ្យបន្តឆ្ពោះទៅមុខ ហើយរស់នៅតាមដំណឹងល្អកាន់តែពេញលេញនៅក្នុងពិភពលោកដ៏ចលាចល និងពោរពេញដោយជម្លោះនេះ ។ ខ្ញុំមានអារម្មណ៍សុវត្ថិភាពខ្លាំងណាស់ដែលដឹងថា យើងមានព្យាការីនៅជំនាន់របស់យើង ដែលដាស់តឿនយើងឲ្យមានវិញ្ញាណនៃសេចក្ដីសុខសាន្ត ដើម្បីចៀសវាងពីការឈ្លោះប្រកែកជាមួយមិត្តភក្តិរបស់យើង ។ ខ្ញុំឲ្យតម្លៃលើការបង្រៀនដ៏អស្ចារ្យរបស់លោក ។
អាណា ម៉ុនតូយ៉ា ប្រទេសហុងឌូរ៉ាស
ខ្ញុំមានទីបន្ទាល់ដ៏រឹងមាំមួយថា ប្រធាន រ័សុល អិម ណិលសុន គឺជាព្យាការីរបស់ព្រះសម្រាប់ថ្ងៃចុងក្រោយនេះ ។ ខ្ញុំមានឯកសិទ្ធិក្នុងការធ្វើជាសាក្សីដែលឃើញយ៉ាងច្បាស់ពីភាពរាបសារបស់លោក ភាពសាមញ្ញរបស់លោក និងសេចក្ដីស្រឡាញ់ដែលលោកមានចំពោះមនុស្សទូទៅ ។ ជាការពិត លោកគឺជាបុរសដ៏ជម្រើស ដើម្បីដឹកនាំនគររបស់ព្រះនៅលើផែនដីក្នុងគ្រាដ៏ពិសេសនេះ ។ ខ្ញុំបានស្តាប់ ហើយធ្វើតាមដំបូន្មានរបស់លោកដែលបានដឹកនាំខ្ញុំឲ្យរស់នៅដោយសុចរិត និងប្រឈមមុខនឹងឧបសគ្គនៃជីវិតរមែងស្លាប់ ។ ខ្ញុំមានអារម្មណ៍នៃសេចក្ដីស្រឡាញ់ធំធេងចំពោះប្រធាន ណិលសុន ហើយខ្ញុំដឹងពីការរួមចំណែកដ៏អស្ចារ្យរបស់លោកចំពោះការរីកលូតលាស់នៃនគរព្រះ និងការប្រមូលផ្តុំអ៊ីស្រាអែល តាមរយៈការបំផុសគំនិតរបស់លោក និងការប្រកាសរបស់លោកសម្រាប់ការសាងសង់ព្រះវិហារបរិសុទ្ធនៅទូទាំងពិភពលោក ។
ដេវីដ ជី ហ្វឺណានដេស ប្រទេសប្រេស៊ីល
នៅថ្ងៃទី ២៤ ខែ សីហា ឆ្នាំ ២០១៩ ព្យាការីបានមានប្រសាសន៍ជាភាសាអេស្ប៉ាញ ហើយបានប្រាប់យើងឲ្យរក្សាបទបញ្ញត្តិរបស់ព្រះអម្ចាស់ ។ ខ្ញុំទទួលអារម្មណ៍នៃសេចក្ដីស្រឡាញ់របស់ព្រះយេស៊ូវគ្រីស្ទយ៉ាងខ្លាំងចំពោះការខិតខំរបស់ព្យាការីក្នុងការរៀនភាសារបស់យើង ។ ខ្ញុំដឹងថា តាមរយៈព្យាការីដែលនៅរស់ ព្រះទ្រង់លើកទឹកចិត្ត ណែនាំ ការពារ ដឹកនាំ និងប្រទានពរដល់យើង ។
សល អាលហ្វ្រេដូ រ៉ូហាស ដេ លេអន ប្រទេសក្វាតេម៉ាឡា