Ang Gugma sa Dios

Sa usa ka ting-init samtang nagbiyahe ngadto sa hilit nga dapit, ang among pamilya migahin og usa ka gabii nga nangatulog sa gawas ubos sa walay panganod nga kalangitan. Klaro kaayo sa ibabaw kanamo mao ang matahom nga Milky Way, puno sa dili maihap nga kabitoonan ug may panagsang bulalakaw. Samtang nahingangha kami sa kahalangdon sa gilalang sa Dios, mibati kami og talahorong koneksiyon ngadto Kaniya. Ang among gagmayng mga anak, kinsa nagdako sa Hong Kong, wala pa gayod makasinati og bisan unsa nga sama niini sukad. Inosente silang nangutana kon nagpuyo ba kami ubos sa sama nga langit didto sa amoa. Gisulayan nako sa pagpasabot sila nga mao ra gihapon kini nga langit, apan ang polusyon sa hangin ug ang polusyon sa kahayag diin kami nagpuyo nagpugong nga among makita kining mga bitoon bisan naa ra kini didto.

Ang mga kasulatan nagtudlo kanato nga “ang pagtuo mao ang may kasegurohan kita sa mga butang nga atong gilaoman nga dili makita.” Samtang ang makalibog nga mga butang ug ang kalibotanong mga tentasyon motabon sa atong espirituhanong panan-aw, kon mogamit kita og pagtuo sa Dios ug sa Iyang Anak, nga si Jesukristo, makadawat kita og tin-aw nga kaseguroan sa Ilang katinuod ug sa Ilang pagpakabana kanato.

Diha sa Basahon ni Mormon, si propeta Lehi nakakita “og kahoy, kansang bunga lamian nga makalipay sa usa ka tawo” ug “hilabihan ang katam-is niini labaw pa sa tanan.” Dihang mitilaw siya sa bunga, mipuno kini sa iyang kalag sa tumang kamaya, ug nagtinguha nga ang iyang pamilya mokaon usab niini. Atong mahibaloan nga kini nga kahoy nagrepresentar sa “gugma sa Dios,” ug sama ni Lehi, kita usab makadawat og malipayong saksi sa Dios kon dapiton nato Siya sa atong kinabuhi.

Si Jesukristo ang nagrepresentar sa gugma sa Langitnong Amahan alang kanato. Pinaagi sa Iyang maulaong sakripisyo, Siya midala diha sa Iyang Kaugalingon sa atong mga sala ug gibun-og alang sa atong mga kadaotan. Personal Niyang gipas-an ang atong mga kagul-anan, mipas-an sa atong mga kasubo, ug gidala sa Iyang Kaugalingon ang atong mga kasakit ug mga balatian. Iyang gipadala ang Espiritu Santo sa paghupay kanato, ug ang mga bunga sa Espiritu naglakip sa kalipay, kalinaw, ug pagtuo, nga mopuno kanato og paglaom ug gugma.

Bisan og ang gugma sa Dios makab-ot sa tanan, daghan ang makugihong nangita niini, samtang ang uban nagtinguha nga mobati sa gugma sa Dios apan wala motuo nga angayan sila niini. Ang uban labihan kamatinguhaon aron magpabilin nga mobati niini. Ang mga kasulatan ug ang propeta sa Ginoo nagtudlo nga padayon kitang makasinati sa gugma sa Dios kon, pinaagi sa grasya ni Jesukristo, balikbalik kitang maghinulsol, tinuorayng mopasaylo, maningkamot sa pagtuman sa Iyang mga sugo, ug walay pagpanuko nga moserbisyo sa uban. Atong bation ang gugma sa Dios kon buhaton nato ang mga butang nga magpaduol kanato ngadto Kaniya, sama sa pagpakigsulti Kaniya matag adlaw pinaagi sa pag-ampo ug pagtuon sa kasulatan, ug mohunong sa paghimo og mga butang nga mopalayo kanato gikan Kaniya, sama sa pagkagarboso, kamabingkilon, ug kamasinupakon.

Si Presidente Russell M. Nelson midapit kanato sa “pag[tangtang], uban sa tabang sa Manluluwas, sa karaan nga mga sagbot sa atong mga kinabuhi” ug sa “paghunong sa kaligutgot.” Miawhag siya kanato sa “paglig-on sa atong espirituwal nga mga pundasyon pinaagi sa pagsentro sa atong kinabuhi diha sa Manluluwas ug sa mga ordinansa ug mga pakigsaad sa Iyang templo.” Misaad siya nga “kon kita motuman sa atong mga pakigsaad sa templo, kita makabaton og mas dakong akses ngadto sa makapalig-on nga gahom sa Ginoo. … Kita makasinati sa tiunay nga gugma ni Jesukristo ug sa atong Langitnong Amahan sa dakong kaabunda!”

Duna koy higala nga napanalanginan og matahom nga pamilya ug maayong panarbaho. Nausab kini dihang ang sakit naghimo kaniyang dili na makatrabaho, nga gisundan sa pagdiborsiyo. Ang mga tuig sukad niana malisod, apan ang iyang gugma sa iyang mga anak ug ang mga pakigsaad nga gihimo niya ngadto sa Dios naghimo kaniyang makapadayon. Usa ka adlaw nahibaloan niya nga ang iyang kanhi asawa nagminyo og usab ug mihangyo og pagkansela sa ilang pagkaselyo sa templo. Nagproblema siya ug naglibog. Nangayo siya og kalinaw ug panabot sa sulod sa balay sa Ginoo. Sa adlaw human sa iyang pagbisita, nakadawat ko sa mosunod nga mensahe gikan niya:

“Duna koy talagsaong kasinatian sulod sa templo pagka gabii. Seguro maklaro nga aduna gihapon koy gamay nga pagsupak. … Nasayod ko nga kinahanglan ko nga mag-usab, ug nag-ampo ko sa tibuok semana aron mahimo kini. … Kagabii sulod sa templo sa literal mibati ko sa Espiritu nga mitangtang sa pagsupak gikan sa akong kasingkasing. … Usa kadto ka dakong kahupayan nga mawagtang na kini. … Ang hunahuna sa pisikal nga palas-anon nga nagpaantos kanako nawala.”

Samtang siya aduna pa sa iyang mga hagit, ang akong higala mibahandi niana nga kasinatian sulod sa balay sa Ginoo diin ang makapagawasnon nga gahom sa gugma sa Dios nakatabang niya nga mobati nga mas duol sa Dios, mas positibo sa kinabuhi, ug dili na kaayo mabalak-on mahitungod sa iyang umaabot.

Kon makasinati kita sa gugma sa Dios, atong mapas-an ang atong mga palas-anon uban sa kasayon ug motugyan nga mapailobon ug malipayon sa Iyang kabubut-on. Makasalig kita nga ang Dios mohinumdom sa Iyang mga pakigsaad kanato, moduaw kanato atol sa atong mga kasakit, ug mohaw-as kanato gikan sa pagkaulipon. Magmatinguhaon usab kita nga mopakigbahin sa kamaya nga atong gibati uban sa atong pamilya ug sa mga minahal. Sama sa pamilya ni Lehi, ang matag tawo adunay kabubut-on sa pagpili kon mokaon ba sa bunga o dili, apan ang atong oportunidad mao ang paghigugma, pagpakigbahin, ug pagdapit sa paagi nga kadtong atong mga gihigugma mobati sa gugma sa Dios.

Aron matabangan ang uban nga mobati sa gugma sa Dios, kinahanglan kitang mougmad sulod sa atong kaugalingon og mga kinaiyang Kristohanon sama sa pagpaubos, gugmang putli, kamanggiluy-on, ug pailob, ug motabang sa uban nga mopaduol sa Manluluwas pinaagi sa pagsunod sa duha ka dagkong mga sugo sa paghigugma sa Dios ug paghigugma sa atong isigkatawo.

Usa sa among mga anak nga lalaki naglisod sa iyang pagpakig-uban sa uban ug pagsalig sa kaugalingon sa batan-on pa siya. Ang akong asawa ug ako nag-ampo aron mahibalo unsaon siya sa pagtabang, ug kami andam bisan unsay ipabuhat kanamo sa Ginoo. Usa ka adlaw naaghat ko nga mangutana sa akong presidente sa elders korum kon duna ba siyay nahibaloan nga tawo nga nanginahanglan nga mahimo nakong mabisitahan nga kuyog ang akong anak. Human sa pipila ka paghunahuna, mihangyo siya nga bisitahan namo ang usa ka babaye nga dunay grabeng mga hagit sa kahimsog ug, uban sa pagtugot sa presidente sa branch, magdala og sakramento ngadto kaniya matag semana. Nalipay ko apan nabalaka usab kon unsa kahay reaksyon sa akong anak niining sinemana nga pasalig.

Sa among una nga pagbisita, nasubo ang among kasingkasing alang niining minahal nga babaye, kay siya kanunayng nag-agulo sa kasakit. Mapasalamaton kaayo siya alang sa sakramento, ug nalingaw kami sa pagbisita kaniya ug sa iyang bana. Human sa pipila ka pagbisita, usa ka Dominggo naa ko sa layo ug dili makakuyog sa akong anak, apan gipahinumdoman nako siya sa among asaynment. Dihang nauli na ko, mahinamon kaayo akong maminaw kon kumusta ang pagbisita. Ang akong anak mitubag nga wala siya maghunahuna nga ang iyang mga klasmeyt mohimo og maayo kaayong mga butang nga sama niini. Ug giklaro niya sa pagpasabot pinaagi sa pag-ingon nga gidala niya ang iyang igsoong lalaki kuyog niya aron motabang, ug nga ang sakrament hapsay ra, apan kining minahal nga sister nagsubo atol sa semana tungod kay nagdapit siya og mga higala ngadto sa iyang panimalay aron motan-aw og mga salida, apan ang iyang video player dili mogana. Miingon ang akong anak nga nag-search siya sa online, nakit-an unsay problema ug giayo kini alang kaniya diha dayon. Mibati siya nga nakatabang, malipayon ug gisaligan nga mohimo og butang nga nagpasanag sa adlaw sa sister. Gibati niya ang gugma sa Dios alang kaniya.

Kon bisan sa inyong labihan nga paningkamot malisod ang kinabuhi, bisan mobati kamo nga ang inyong mga pag-ampo wala dungga, o kon dili kamo mobati sa gugma sa Dios, palihog hibaloi nga ang inyong matag paningkamot mahinungdanon ug, sama kasegurado sa mga bitoon nga naa sa ibabaw kanato, nga ang Langitnong Amahan ug si Jesukristo nasayod, nakadungog, ug nahigugma kaninyo.

Sa usa ka okasyon, dihang ang iyang mga disipulo sakay sa usa ka sakayan nga “gikusokuso sa mga balod,” ang Manluluwas milakaw padulong kanila didto sa tubig ug mipaneguro kanila, nga nag-ingon, “Salig kamo, ako kini; ayaw kamo kalisang.” Dihang si Pedro gustong molakaw sa tubig padulong sa Manluluwas, gikamay siya ni Jesus, nga nag-ingon, “Dali.” Ug dihang nalihis ang pagtutok ni Pedro ug nagsugod sa pag-unlod, diha dayon ang Manluluwas mitunol sa Iyang kamot sa pagbira kaniya ug midala kaniya nga luwas samtang nag-ingon, “O tawo nga diyutayg pagtuo, nganong nagduhaduha ka man?”

Kon sugaton man kita og mga hagit sa atong kinabuhi, andam ba kitang magmadasigon ug magmaisogon? Unsaon nato sa paghinumdom nga ang Manluluwas dili mobiya kanato ug nga Siya naa sa atong duol, tingali sa mga paagi nga dili pa nato mamatikdan? Andam ba kitang moduol Kaniya inubanan sa pagtuo, ilabi na kon ang dalan sa atong atubangan ingon og imposible? Ug sa unsang mga paagi nga Siya moalsa kanato ngadto sa kaseguroan kon kita nagkalisod? Sa unsang paagi kita matinud-anong motan-aw Kaniya sa matag hunahuna, nga walay pagduhaduha o kahadlok?

Kon gusto kamong mobati sa gugma sa Dios nga mas abunda sa inyong kinabuhi, dapiton ko kamo sa pagkonsiderar sa mga mosunod:

• Una, kanunay nga mohunong og kadiyot sa paghinumdom nga kamo anak sa Dios ug maghunahuna sa mga butang diin kamo mapasalamaton.

• Ikaduha, mag-ampo matag adlaw, mohangyo sa Langitnong Amahan sa pagtabang kaninyo nga makahibalo kon kinsa sa inyong palibot ang nagkinahanglan nga mobati sa Iyang gugma.

• Ikatulo, sinserong mangutana kon unsay inyong mahimo sa pagtabang niana nga indibidwal nga mobati sa gugma sa Dios.

• Ug ikaupat, lihoka diha dayon ang inspirasyon nga inyong nadawat.

Kon padayon kitang mag-ampo ug mangayo alang sa uban, ipakita sa Dios kanato ang mga tawo nga mahimo natong matabangan. Ug kon molihok kita diha dayon, mamahimo kitang himan sa Iyang pagtubag sa ilang mga pag-ampo. Pinaagi sa paghimo niini, paglabay sa panahon, madawat nato ang mga tubag sa atong mga pag-ampo ug mobati kita sa gugma sa Dios sa kaugalingon natong kinabuhi.

Pipila ka bulan ang milabay samtang nagbiyahe sa Vietnam, ang akong asawa ug ako sakay sa eroplano nga milupad atol sa kusog kaayo nga bagyo. Ang pagtay-og hilabihan, ug ang kaitom sa mga panganod, kusog kaayong ulan, ug mga kilat makita gikan sa among bintana. Human sa taas ug dihadiha namong pagpasaka ang among eroplano nakalapas sa nagbagyong panganod ug mitunga niining mahimayaong talan-awon. Napahinumdoman na usab kami bahin sa atong Langitnong Amahan ug ni Jesukristo ug mibati sa Ilang talagsaon nga gugma alang kanamo.

Minahal nga mga higala, isip usa nga nakasinati sa gugma sa Dios, malipayon akong mosaksi nga ang Manluluwas nga si Jesukristo mao ang gugma sa Dios. Ang iyang gugma alang kanato hingpit, personal, ug mahangtoron. Samtang kita matinud-anong mosunod Kaniya, unta mapuno kita sa Iyang gugma ug unta kita mahimong parola nga mogiya sa uban ngadto sa Iyang gugma. Sa ngalan ni Jesukristo, amen.