Gugmang Putli—usa ka Timailhan sa Tinuod nga Pagkadisipulo

Ang usa ka disipulo mao ang usa ka sumusunod o estudyante sa laing tawo. Ang mga disipulo mao ang “mga aprentis” kinsa mohalad sa ilang mga kinabuhi aron mahimong sama sa ilang magtutudlo. Sa ingon, ang pagkadisipulo ngadto ni Jesukristo nagpasabot nga labaw pa kay sa pagtuo sa Iyang mga pagtulun-an ug doktrina. Kini nagpasabot gani labaw pa sa pag-ila sa Iyang pagkabalaan ug pagdawat Kaniya isip atong Manluluwas ug Manunubos, sama ka importante niini.

Si Presidente Dallin H. Oaks mipasabot: “Ang pagsunod kang Kristo dili usa ka kaswal o panalagsa nga bulohaton. Usa kini ka padayon nga pasalig ug pagkinabuhi nga kinahanglang mogiya kanato sa tanang higayon ug sa tanang lugar.” Ang pagkadisipulo kinahanglan og pag-amping ug paningkamot aron kita mausab pinaagi sa maulaong sakripisyo sa Ginoo ug sa Iyang matugtanon nga gahom. Ang tinuod nga destinasyon sa pagkadisipulo mao ang pagkahimong sama ni Jesukristo—bisan ngadto sa punto diin atong madawat ang “iyang hitsura diha sa [atong] mga panagway.”

Aron mahimong mga disipulo sa Ginoo, kinahanglan nga atong tuyoon ang pagsunod sa iyang mga hunahuna ug mga aksiyon matag adlaw—pananglitan, ang Iyang pagkamasulundon, pagkamapainubsanon, ug pailob. Samtang hinay-hinay natong iapil kini nga mga hiyas sa atong kaugalingong pagkatawo, kita mahimong “makaambit sa [Iyang] diosnong kinaiya.” Kining pagsunod sa kinaiya sa Manluluwas mao ang labing importante sa pagsimba Kaniya. Sama sa gitudlo ni Presidente Nelson, “Ang atong pagsimba ni Jesus labing mapahayag pinaagi sa atong pagsunod ni Jesus”

Sa tanang daghan nga balaang hiyas ni Jesukristo nga atong sundon, ang usa nagbarog nga labing importante ug nagsimbolo sa tanan. Kana nga hiyas mao ang Iyang tiunay nga gugma, o gugma nga putli. Ang propeta nga si Mormon ug ang Apostol nga si Pablo nagpahinumdom nato nga kon wala ang gugma nga putli, “[kita] walay kapuslanan.” O, sumala sa gipadayag ngadto ni Propeta Joseph Smith, kon walay “gugma nga putli, [kita] walay mahimo.”

Ang Manluluwas Mismo miila sa gugma isip usa ka timaan o timailhan diin ang Iyang tinuod nga mga disipulo mailhan sa dihang Siya mipahayag:

“Usa ka bag-ong sugo ang akong ihatag kaninyo, nga kamo maghigugmaay sa usa ug sama nga gihigugma ko kamo aron maghigugmaay usab kamo sa usa ug usa.

“Tungod niini ang tanang tawo mahibalo nga kamo akong mga tinun-an, kon kamo maghigugmaay sa usa ug usa.”

Ang gugma nga putli usa ka makahuloganon nga konsepto nga mahimong lisod ipahayag apan sayon nga sabton niadtong tanan nga natandog niini. Ang Isangyaw ang Akong Ebanghelyo nagtudlo nga ang “gugma nga putli, sama sa hugot nga pagtuo, mosangpot ngadto sa aksiyon.” Sa pagkatinuod, ang gugma nga putli mahimong ihulagway nga “gugma inubanan og aksiyon.” Kini nga paghulagway naghatag og dakong pagpasabot ngadto sa katingbanan nga pamahayag sa kinabuhi sa Manluluwas—Siya “[n]aglibot aron sa pagbuhat ug maayo.”

Isip mga sumusunod ni Jesukristo, kita kinahanglang maningkamot sa pagsunod sa paagi sa pagpakita sa atong Agalon sa Iyang tiunay nga gugma alang sa uban. Bisan og ang Manluluwas nagpakita og gugmang putli sa daghang paagi, gusto ko nga itumong ang atensiyon sa tulo ka piho nga sundanan sa Iyang gugmang putli nga dali rang makit-an diha sa Iyang tinuod nga mga disipulo.

Una, ang Manluluwas nagpakita og gugmang putli pinaagi sa pagkamaluluy-on. Atol sa Iyang pangalagad taliwala sa mga Nephita nga narekord sa Basahon ni Mormon, ang Ginoo midapit sa mga tawo nga mopauli ug mamalandong sa mga butang nga Iyang gitudlo ug sa pag-andam alang sa Iyang pagbalik sa sunod nga adlaw. Ang rekord dayon namahayag:

“Nakita nga naghilak sila, ug nagtan-aw kaniya ingon og nagpasabot nga sila mohangyo kaniya sa pagpabilin og diyotay pa nga panahon uban kanila.

“Ug miingon siya kanila: Tan-awa, ang akong kasingkasing napuno sa kaluoy diha kaninyo.”

Ang kaluoy mao ang porsiyon sa gugma nga putli nga nagtinguha sa paghupay sa pag-antos. Napuno sa kaluoy, ang Ginoo miayo sa masakiton ug gitakboyan taliwala sa mga tawo. Pagkahuman, Iyang gipanalanginan ang ilang mga bata samtang ang mga anghel mikunsad gikan sa langit ug mialirong kanila. Iyang gipahigayon kining malumo, mahigugmaong mga buhat, ug daghan pa, tungod kay Siya “naluoy kanila.”

Samtang nagserbisyo isip batan-ong misyonaryo sa Habagatang Amerika, ako usab nakabenepisyo sa kaluoy sa usa ka mahal nga higala. Usa ka gabii samtang ako nagdrayb uban sa akong kompanyon padulong sa balay sa among presidente sa misyon, usa ka batan-ong lalaki nga nagbiseklita kalit nga mibabag sa atubangan sa akong sakyanan. Kalit kaayo kini nga panghitabo nga ako wala makalikay nga makabangga. Sa kasubo, kining batan-ong lalaki namatay tungod sa pagkabangga. Hilabihan ang akong kasubo sa iyang kamatayon. Nahadlok ug nakugang sa makahadlok nga reyalidad sa unsay bag-o lang nahitabo nga nakapabug-at sa akong emosyon, gidala ko sa bilanggoan ug gipriso. Wala gayod sukad ako mibati nga mas nahadlok ug nag-inusara. Ako napuno nga walay paglaom ug nahadlok nga mapriso sa akong tibuok kinabuhi.

Usa ka isig ka misyonaryo, si Elder Brian Kochever, nakahibalo sa aksidente ug natandog tungod sa kaluoy. Siya miabot sa bilanggoan ug mihangyo sa mga opisyal nga tugotan nga magpabilin uban nako diha sa selda aron nga ako dili mag-inusara. Sa milagrosong paagi, sila miuyon. Hangtod niining adlawa, ako mibati og dakong pasalamat alang niining buhat sa disipulo nga Kristohanong gugma, nga mipakalma, mihupay, ug misimpatiya nako atol sa panahon sa akong dakong kalisod sa akong kinabuhi. Ang iyang mahigugmaong kaluoy mao ang usa ka timailhan sa iyang pagkadisipulo. Sama sa naobserbahan ni Presidente Nelson, “Usa sa labing sayon nga paagi sa pag-ila sa tinuod nga sumusunod ni Jesukristo mao ang maluluy-on nga pagtagad niana nga tawo ngadto sa ubang tawo.”

Laing ehemplo kon sa unsang paagi ang Manluluwas nagpakita sa Iyang gugma mao ang pinaagi sa Iyang pag-obserbar ug pagpangalagad ngadto sa wala masulti nga mga panginahanglan sa uban. Ngadto sa tawo nga bakol sulod sa 38 ka tuig nga walay usa nga mitabang kaniya, ang Ginoo miayo kaniya ug miawhag kaniya nga magpuyo nga matarong. Ngadto sa babaye nga nakasala og pagpanapaw, Siya mitanyag og paglaom ug kahupayan imbes silotan. Alang sa tawo nga paralitiko nga gipaubos gikan sa atop, ang Ginoo mitanyag og kapasayloan sa mga sala, dili lang pagkaayo sa lawas.

Sa dihang gitawag ko nga moserbisyo isip usa ka bishop, ang among unom ka gagmay nga mga anak mihimo sa panagtigom alang sa sakramento nga mahagiton alang sa akong asawa, nga si Cristin, nga mag-inusarang modumala nila samtang maglingkod ko sa pulpito. Sama sa inyong mahunahuna, ang among mga anak sa kasagaran wala kaayoy balaang pagtahod. Nakamatikod sa iyang sitwasyon, duha ka miyembro sa among ward, si John ug Debbie Benich, milingkod tupad kaniya matag Dominggo aron motabang. Ang ilang pagkamabination nagpadayon sulod sa katuigan, ug sila nahimong puli nga mga apohan sa among pamilya. Sama sa Ginoo, kini nga mga disipulo nakamatikod sa wala isulti nga panginahanglan ug milihok inubanan sa gugma—ug usa ka nabantog nga timailhan sa ilang pagkadisipulo.

Sa kataposan, ang hingpit nga gugma sa Manluluwas mao ang pagtutok sa paghatag og katakos sa tanang anak sa Dios aron makatuman sa atong balaanon nga potensyal nga kita mahimong “moambit sa iyang kaluwasan, ug sa gahom sa iyang katubsanan.” Samtang kita mas mahisama sa atong Agalon, ang atong tinguha sa pagtabang sa atong kaigsoonan subay sa dalan sa pakigsaad molambo sa natural nga paagi.

Pananglitan, kita makabayaw ug makighigala niadtong kinsa mobati nga nasilo o nakalimtan, motabang niadtong kinsa bag-o sa atong kongregasyon nga mobati nga giabi-abi, o modapit sa mga higala nga mosimba uban nato sa panagtigom alang sa sakramento—tingali niining umaabot nga Pasko sa Pagkabanhaw. Adunay dili maihap nga mga paagi sa pag-awhag ug pagtabang sa uban sa ilang kauswagan kon kita mag-amping ug mohimo og aksiyon ug mainampoong magtinguha sa tabang sa langit nga makabaton og mga mata nga makakita ug kasingkasing nga mobati giunsa ni Jesukristo pagtan-aw ug pagbati alang kanila.

Ang pagtabang sa uban subay sa ilang dalan sa pakigsaad mahimo pinaagi sa usa ka dili kasagaran nga buhat sa pagserbisyo. Isip usa ka ehemplo, atol sa akong kasamtangan nga buluhaton sa Pilipinas, akong nahibaloan ang pamilyang Agamata. Sila nabunyagan niadtong 2023, ug dayon madasigon silang nagtakda og petsa nga maselyo isip usa ka pamilya sa duol nga templo sa Urdaneta Philippines Temple. Pero, sa wala pa ang ilang appointment sa pamilya, pipila ka bagyo ang miigo sa rehiyon. Si Brother Agamata, usa ka mag-uuma sa humay, wala makapananom sa iyang tanom atol sa grabe nga mga unos. Sa dihang ang unos sa kataposan milabay na, kinahanglan siya magdali sa pagtanom sa humay samtang ang yuta nahumol pa sa tubig—nindot nga kondisyon sa pagpananom. Subo lang, ang biyahe ngadto sa templo kinahanglan nga iuswag.

Duha ka disipulo, si Elder ug Sister Cauilan, uban sa tulo ka batan-ong pangserbisyo nga mga misyonaryo, nakadungog sa pakigbisog sa pamilyang Agamata ug mitanyag sa pagtabang bisan og walay kasinatian sa pagpanguma. Nagtrabaho ubos sa grabeng kainit sa adlaw, sila mitabang sa pagpananom sa mga semilya, nagtugot sa mga Agamata sa pagkompleto sa ilang buluhaton ug pagtambong sa ilang pagpaselyo ngadto sa templo sumala sa eskedyul. Si Elder Cauilan nakaobserbar nga ang mga panagway “[sa mga Agamata] misanag samtang nakita namo sila nga nagsinina og puti diha sa balay sa Ginoo. Ang hingpit nga kalipay nga among gibati sa pagpangalagad ngadto sa usa mao ang hingpit nga kalipay nga dili ikatandi!”

Ang mga Agamata nakatagamtam karon sa buhong nga mga panalangin sa pagkaselyo isip usa ka mahangtorong pamilya tungod sa pipila ka disipulo nga napuno sa gugmang putli—usa ka timailhan sa ilang pagkadisipulo—determinado nga motabang sa ilang kaigsoonan nga mopadayon sa ilang dalan sa pakigsaad.

Mga kaigsoonan, ang pagkadisipulo ngadto ni Jesukristo mao ang bugtong paagi sa pag-angkon og walay kataposan nga kalipay. Kini usa ka dalan nga puno sa pag-amping ug aksiyon ug may katuyoan nga mga buhat sa gugma ngadto sa uban. Samtang ang dalan sa pagkadisipulo tingali malisod ug mahagiton ug samtang usahay kita makigbisog ug mapakyas, makaangkon kita og kahupayan nga ang Dios naghunahuna kanato ug gustong motabang nato matag higayon nga kita mosulay. Si Isaias nagpahinumdom nato nga ang “Dios mokupot sa [atong] kamot, mag-ingon … , Ayaw kahadlok; ako motabang kanimo.”

Uban niini nga kaseguroan gikan sa atong Amahan sa Langit diha sa hunahuna, ako matinguhaon nga mag-ampo nga kita mosunod sa imbitasyon ni Presidente Nelson sa paghatag og prayoridad sa atong pagkadisipulo. Hinaot nga kita “mag-ampo ngadto sa Amahan uban sa tibuok kusog sa kasingkasing,” aron “mapuno niini nga gugma, nga iyang gitugyan diha sa tanan kinsa tinuod nga mga sumusunod sa iyang Anak, nga si Jesukristo; … nga kon siya moabot kita mahimong sama kaniya,” tungod kay gidala nato ang timailhan sa tinuod nga pagkadisipulo nga mao ang “gugmang putli … ang tiunay nga gugma ni Kristo.”

Ako mopamatuod nga si Jesukristo mao ang atong buhi nga mahimayaong Manluluwas, Manunubos, Panig-ingnan, ug Higala. Sa ngalan ni Jesukristo, amen.