Ang Akong Gugma alang sa Manluluwas Mao ang Akong “Ngano”

Nakabantay ba mo nga ang atong minahal nga propeta, si Presidente Russell M. Nelson, nagpadayon sa pagpadangat og mga pagdapit ngari nato? Dili ikatingala, siya midapit nato sa pagtuon ug pagpamalandong sa mga mensahe nga gipakigbahin sa kataposang duha ka komperensiya. Niadtong Abril 2024, miingon siya, “Manghinaot ko nga balikbalikon ninyo sa pagtuon ang mga mensahe niini nga komperensiya sa tanang umaabot nga mga bulan.” Dayon, pagka-Oktubre 2024, miingon siya: “Ako moawhag kaninyo sa pagtuon sa mga mensahe [sa mga mamumulong]. Gamita kini ingon nga usa ka pag-ila kon unsay tinuod ug kon unsay dili atol sa mosunod nga unom ka bulan.”

Kini nga mga pagdapit mahimong idugang sa propetikanhong mga pagdapit nga atong nadawat sa tibuok natong kinabuhi, lakip na ug ilabi na niadtong atong nadawat sa bag-ohay lang nga katuigan. Mahimong mobati o maghunahuna kita nga kini nga mga pagdapit mao ang laing butang nga kinahanglan natong idugang sa atong mga lista sa angayng buhaton, tungod lamang kay kita gidapit o gihangyo sa pagbuhat niini. Apan aduna bay mas labaw pa niini?

Sa pagpamalandong bahin niini ug sa tanang pagdapit nga atong nadawat, nakahinumdom ko og usa ka butang nga akong nakat-onan ug nadesisyonan sa dugay nang panahon. Naningkamot ko sa pagbuhat niini nga mga butang diin mahinungdanon nako tungod kay gihigugma nako Siya; gihigugma nako ang atong Manluluwas. Kini mao ang tinuod ug labing gamhanang rason kon nganong nagbuhat ko sa unsay akong gibuhat, ug dayon konektado niini mao ang akong gugma alang ninyo, akong mga kaigsoonan.

Isip inyong igsoon, nanghinaot ko nga inyong ikonsiderar ang akong mga pulong isip usa ka sinsero nga pagdapit sa pagtinguha sa pagsabot sa oportunidad nga ikonektar ang tanan nga atong gibuhat ngadto sa atong gugma alang sa Manluluwas.

Ang paghimo niini makatabang nato nga masabtan ang tinuod nga “ngano” luyo sa tanang butang nga atong gibuhat isip mga disipulo sa Manluluwas. Makatabang kini kanato sa pagpalig-on sa atong koneksiyon ngadto sa Dios pinaagi sa pakigsaad, sa pagsabot sa Iyang balaanon ug mahangtoron nga mga kamatuoran—Iyang mahangtoron ug hingpit nga mga kamatuoran nga dili gayod mausab. Ang mahangtorong mga kamatuoran sama sa “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kon dili makabaton hinuon sa kinabuhing dayon.”

Makapaikag nga usahay tungod kay kanunay natong gibuhat ang mga butang hangtod sa punto nga nahimo kining mga tradisyon, atong gitugotan kini nga mga tradisyon o mga kalihokan nga maoy modiktar sa atong mga paningkamot sa pagpalig-on sa pagtuo diha ni Jesukristo. Murag nagbuhat kita niini nga mga butang tungod kay gibuhat na nato kini sa daghang katuigan, nga wala maghunahuna sa epekto niini sa atong koneksiyon ngadto sa Manluluwas pinaagi sa pakigsaad.

Sa atong kalibotan, kasagaran nakatutok kita sa unsay atong gibuhat ug sa kanunayng pagtuman sa mga buluhaton ug mga tumong. Sa espirituhanong aspeto, kita adunay kahigayonan nga makahimo og lapas pa kaysa pagbuhat lamang sa mga butang o sa pagtuman sa mga tumong pinaagi sa pagsabot kon nganong gibuhat nato kini. Kon kita makasabot ug makakonektar nga ang rason luyo sa atong mga buhat may kalabotan sa atong gugma alang sa Manluluwas ug sa atong Langitnong Amahan, pinaagi sa pagpahimulos niini nga mga oportunidad, atong masabtan nga bisan kon ang pagbuhat sa matarong nga mga butang sama sa mga kalihokan sa Simbahan o mga tradisyon ug ang tukmang pagbuhat niini usa ka maayo nga butang, kon kini atong ikonektar ngadto sa “ngano,” kita panalanginan aron makasabot sa rason. Dili lang mobuhat og maayo nga mga butang o mobuhat niini sa saktong paagi; kita usab mobuhat niini alang sa saktong rason.

Pananglitan, kon magtakda kamo og tumong sa pagbasa sa mga kasulatan, sa pag-ampo og sinsero, o sa pagpangandam sa kalihokan alang sa inyong pamilya o sa ward, ang tinuod ba nga tumong mao lamang ang pagtuman niini nga mga buluhaton? O kini ba nga mga buhat mao ang pamaagi, ang mga himan nga inyong magamit, aron matuman ang tinuod nga tumong? Ang katuyoan ba aron lang makapahigayon og kalihokan tungod kay mao na kini ang atong gihimo sulod sa daghang katuigan ug dayon tsekan ang kahon nga kita nakakompleto niini? O, sa makausa pa, mao ba kini ang pamaagi nga atong gamiton aron makat-on, mobati, ug mokonektar ngadto sa Manluluwas?

Palihog ayaw saypa sa pagsabot ang akong punto bahin sa mga kalihokan ug mga tradisyon o sa pagtakda og mga tumong ug sa pagpaninguha aron matuman kini; walay sayop niini. Pero, dapiton ko kamo nga ablihan ang inyong mga kasingkasing ug mga hunahuna ngadto sa oportunidad ug panalangin sa pagsabot ngano nga nagbuhat kita niini nga mga butang ug giunsa nato pagkinabuhi sumala sa atong relihiyon.

Usa ka mahinungdanong ehemplo sa mga tradisyon nga nakasentro ni Kristo mao ang hagit ni Presidente Dallin H. Oaks nga gipadangat ngari natong tanan sa ngalan sa Unang Kapangulohan. Si Presidente Oaks miingon, “Sa atong pagsulod niining bag-ong tuig, mangandam kita alang sa Pasko sa Pagkabanhaw nga kasaulogan sa maulaong sakripisyo ni Jesukristo. … Bisan unsa pa ang gituohan o gibuhat sa uban, kinahanglan nga atong saulogon ang Pagkabanhaw sa atong buhi nga Manluluwas pinaagi sa pagtuon sa Iyang mga pagtulun-an ug sa pagtabang sa pag-establisar og mga tradisyon sa Pasko sa Pagkabanhaw diha sa atong katilingban sa kinatibuk-an, ilabi na sa sulod sa atong kaugalingong mga pamilya.” Sama sa inyong nakita, dili lang kini usa ka pagdapit nga magbaton og mga tradisyon. Kondili, atong gamiton kini nga mga tradisyon isip pamaagi sa pagkat-on pa og dugang mahitungod sa Manluluwas ug sa paghinumdom sa Iyang Pagkabanhaw.

Kon kita mas makakonektar sa rason ngadto sa atong gugma alang sa Manluluwas, kita mas makadawat sa unsay atong gikinahanglan o gitinguha. Si Presidente Nelson miingon, “Bisan unsa nga mga pangutana o mga problema nga ikaw aduna, ang tubag kanunay makaplagan diha sa kinabuhi ug mga pagtulun-an ni Jesukristo.” Ug dayon iyang gipadangat kini nga pagdapit: “Pagkat-on pa og dugang bahin sa Iyang Pag-ula, sa Iyang gugma, sa Iyang kalooy, sa Iyang doktrina, ug sa Iyang gipahiuli nga ebanghelyo sa pagkaayo ug paglambo. Dangop ngadto Kaniya! Sunod Kaniya!”

Pamalandongi kini sa inyong mga kasingkasing ug mga hunahuna: Nagtuo ba kamo nga ang pagdapit ni Presidente Nelson adunay intensyon sa pagtabang nato sa pag-andam og lista sa tsekanan diin kita magtigom og dugang nga kahibalo ug mokompleto sa mga buluhaton aron atong matsekan kini nga pagdapit gikan sa atong mga lista sa angayng buhaton? O siya nagdapit ba nato sa pagkonsiderar sa mga aspeto niining mahangtorong kamatuoran ug mga baroganan isip oportunidad aron masabtan ang “ngano” ug ikonektar ang gugma sa Manluluwas pinaagi sa pakigsaad alang nato ngadto sa atong tibuok kinabuhi nga panaw sa pagkadisipulo?

Tugoti ko nga ihulagway ang baroganan nga gusto nakong ipadangat. Usa ka opsiyon, nga tingali sobra ra kaayo, mao ang tingob nga pagbasa sa tanang mensahe gikan sa kinatibuk-ang komperensiya; dayon, kon mahuman na ko, tsekan nako kini nga pagdapit gikan sa akong lista sa angayng buhaton nga wala nay laing buhaton sa unsay akong nabasa. Nakasabot ko nga sobra ra kaayo kini nga sitwasyon, apan dili kini imposibling matinuod. Tingali, daghan ang anaa sa pipila ka punto tali niini ug sa unsay sulundon.

Ang pagdapit mao nga tun-an ug pamalandongan ang mga mensahe gikan sa kinatibuk-ang komperensiya ug gamiton kini sa pagtino ug pagsabot kon unsay atong mahimo aron molambo.

Kon atong sundon ang pagdapit, sabton ang “ngano” nga nagpaluyo niini, makaangkon kita og mas daghang oportunidad nga mas mapaduol sa Manluluwas. Magsugod kita sa pagkasabot nga tungod kay gihigugma nako ang Manluluwas, gusto ko nga mas makakat-on pa mahitungod Kaniya pinaagi sa pagtuon sa mga pulong sa buhing mga propeta. Ug tungod kay gihigugma nako ang akong isigkatawo, ako mopakigbahin sa mga pagtulun-an sa mga propeta, mga manalagna, ug mga tigpadayag ngadto sa uban, magsugod ngadto sa akong mga minahal.

Sa duha ka ehemplo, naghimo kamo sa matarong nga butang. Diha sa usa, ang tumong ingon og naggamit sa mga pamaagi nga gihatag ngari nato sa Langitnong Amahan ug sa Manluluwas, nga mao ang mga mensahe nga gipakigbahin atol sa kinatibuk-ang komperensiya. Ang ikaduhang bersiyon naghangop sa mahinungdanong panalangin sa pagbaton og panglantaw ngadto sa nagpaluyo nga mga rason, nagtanyag og paagi nga masabtan ang mahangtorong kamatuoran ug mga panalangin nga gisaad sa tanan kinsa mohimo sa mga pagtulun-an ug kinabuhi sa atong Manluluwas, si Jesukristo, nga labing gitutokan sa ilang kinabuhi.

Minahal nga mga kaigsoonan, nanghinaot ko nga inyong mabati ug makita ang kaimportante sa pagkonektar sa atong mga buhat ngadto sa atong gugma alang sa Manluluwas. Sa usa ka kalibotan nga puno sa koneksiyon, daghang tingog ang mosulay sa pag-impluwensya ninyo ug, kon mahimo, moganoy kaninyo aron motuo nga ang ubang mahinungdanong mga kamatuoran sa gipahiuli nga ebanghelyo ni Jesukristo dili kinahanglanon. Kini nga mga tingog magsugod sa mahinungdanong kamatuoran sa panginahanglan alang sa pagpahiuli niining ulahing mga adlaw, lakip na sa kamahinungdanon nga adunay gingharian sa Dios dinhi sa yuta, nga girepresentar sa gipahiuli nga Simbahan ni Jesukristo sa mga Santos sa Ulahing mga Adlaw.

Tingali makadungog kamo og mga tingog nga namugos nga ang personal nga relasyon o ang pagsabot ngadto sa Manluluwas lamang igo na ug nga ang relihiyon o ang gipahiuli nga Simbahan dili kinahanglanon o dili mahinungdanon. Dapiton ko kamo nga maghinayhinay sa pagkonsiderar o gani dili magpadala nga maimpluwensyahan niining sayop nga mga ideya ug mas paspas nga mahinumdom sa unsay gisulti ug gitudlo sa Manluluwas ngari nato sukad sa karaang mga panahon—nagsugod sa gugma sa Langitnong Amahan ug ni Jesukristo alang nato ug ikonektar ang atong gugma alang Kanila nga mao ang rason sa pagsunod Kanila.

Ang Dios nga Amahan ug ang Iyang Anak mianhi ug misulti kang Joseph Smith nga ipahiuli ang Simbahan ni Jesukristo ug sugdan ang dispensasyon sa kahingpitan sa mga panahon, ang Iyang Gingharian dinhi sa yuta. Busa, Ang Simbahan ni Jesukristo sa mga Santos sa Ulahing mga Adlaw mao ang pamaagi nga giestablisar sa Langitnong Amahan aron maakses ang mga pakigsaad nga makaabag nato sa pagpauli. Sa ingon niana, nagkinahanglan kita og mas labaw pa kaysa personal lamang nga relasyon ngadto sa Langitnong Amahan ug sa Iyang Anak; gikinahanglan nato ang mga ordinansa sa pagkapari diin pinaagi niini naghimo kita og pakigsaad ngadto Kanila. Nagtanyag kini og koneksiyon ngadto Kanila pinaagi sa pakigsaad ug naghatag nato og akses ngadto sa Ilang gugma pinaagi sa pakigsaad, nga nakapahimo niining posible aron makab-ot ang labing taas nga gingharian sa himaya nga giandam alang sa tanan niadtong matinuoron ug matinud-anon sa ilang mga pakigsaad.

Sa tanang kusog sa akong kalag, ako mosaksi sa katinuod ug kabalaan sa atong Manluluwas, si Jesukristo. Siya nahigugma kaninyo. Siya nasayod sa unsay nahitabo sa inyong kinabuhi. Bukas ang Iyang mga bukton, nga nagpadangat sa pagdapit “Duol kamo kanako, … ug papahulayon ko kamo.”

Gihigugma nako ang Manluluwas, ug ang akong gugma alang Kaniya mao ang akong “ngano.” Sa ngalan ni Jesukristo, amen.