Ug Naghisgot Kita ni Kristo

Sa kataposan sa usa ka taas nga buluhaton sa gawas sa nasod, ang akong asawa, si Lesa, ug ako misulod sa usa ka terminal sa airport aron mangandam alang sa usa na lang ka flight—sa lawom nga kagabhion—aron makauli. Samtang nagbarog kami kauban sa daghang tawo diha sa hinay kaayo nga naglihok nga linya, nabati namo ang nagkadako nga kabalaka sa mga isig ka tigbiyahe nga nabalaka mahitungod kon makasakay sa mga flight, moagi sa pagrebyo sa passport ug visa, ug malamposon nga mahuman sa mga pagsusi sa seguridad.

Sa kataposan naabot kami sa usa ka estasyon nga giokupar sa usa ka customs officer nga ingon wala naapektohi sa taas nga mga lebel sa kaugtas ug kabalaka diha sa lawak. Siya sama sa naandan nga hapit wala maghunahuna niini, nga walay pagtan-aw sa mata, mikuha sa akong mga dokumento, mikompirmar sa akong litrato, mipakli sa usa ka pahina human sa usa, ug sa kataposan mitatak sa akong pasaporte uban sa usa ka bug-at nga lagubo.

Siya dayon mikuha sa papeles ni Lesa. Walay emosyon, nagduko ug nakatutok sa iyang trabaho, siya han-ay nga mipakli sa mga pahina uban ang usa ka eksperto nga mata, nakatutok sa mga detalye sa dokumento sa iyang atubangan. Kami ingon og nasorpresa sa dihang siya kalit nga mihunong, mihangad, ug mitan-aw sa mata ni Lesa sa usa ka tinuyo ug mahigalaon nga pagtutok. Uban sa usa ka malumo nga pahiyom, hinay niyang gitatakan ang pasaporte ni Lesa ug gihatag balik ang mga dokumento ngadto kaniya. Ang akong asawa mipahiyom og balik, midawat sa mga dokumento, ug nakigbinayloay og mahigalaon nga mga pulong sa pagpanamilit.

“Unsay gayod ang nahitabo?” Wala ko katuo nga nangutana.

Si Lesa dayon mipakita kanako sa unsay nakita sa agent—usa ka gamay nga kard nga adunay imahe sa Manluluwas. Kini aksidenteng nahulog gikan sa pitaka ni Lesa ngadto sa mga pilo sa iyang pasaporte. Kini maoy nakit-an sa customs officer. Kini maoy nakapausab sa iyang tibuok nga batasan.

Grace and Truth, ni Simon Dewey, sa maayong kabubut-on sa altusfineart.com, © 2025, gigamit nga adunay pagtugot

Kining gamay nga litrato sa Manluluwas mitabang sa duha ka estranghero nga mobati nga sila adunay gamayng koneksiyon. Kini miusab sa dili personal ngadto sa personal, nagrepresentar sa katahom, sa milagro, ug sa reyalidad sa Kahayag ni Jesukristo. Alang sa nahibilin niana nga adlaw ug kanunay sukad, akong gipamalandongan kana nga maanindot, yano nga higayon uban sa katingala ug nagmaya sa mahimayaon nga epekto sa Kahayag ni Kristo diha sa mga anak sa Dios.

Kita mga sumusunod ni Jesukristo, ug kita nagtinguha sa pagdawat ug pagpakigbahin sa Iyang kahayag. Gipasabot diha sa ngalan sa Simbahan mao ang atong teyolohiya ni “Jesukristo [nga] mao ang ulohang bato sa pamag-ang.” Pinaagi sa karaan ug buhi nga mga propeta, ang atong Langitnong Amahan misugo kanato nga “[m]aminaw Kaniya!” ug “moduol kang Kristo.” “Naghisgot [kita] kang Kristo, nagmaya [kita] diha kang Kristo, nagsangyaw [kita] mahitungod kang Kristo, ug nanagna [kita] mahitungod kang Kristo.”

Kita nagtudlo nga si Jesukristo mao ang Anak sa Dios, ug atol sa iyang yutan-on nga pangalagad, si Jesus mitudlo sa Iyang ebanghelyo ug miestablisar sa Iyang Simbahan.

Kita nagpamatuod nga sa kataposan sa Iyang kinabuhi, si Jesus miula alang sa atong mga sala sa dihang Siya nag-antos diha sa Tanaman sa Getsemane, gilansang diha sa krus, ug dayon nabanhaw.

Kita nagmaya kay tungod sa maulaon nga sakripisyo sa Manluluwas, kita mahimong mapasaylo ug malimpyohan sa atong mga sala kon kita maghinulsol. Kini makahatag kanato og kalinaw ug paglaom samtang naghimo niini nga posible alang kanato nga makabalik ngadto sa presensiya sa Dios ug makadawat og kahingpitan sa kalipay.

Kita nanagna nga tungod sa Pagkabanhaw ni Jesus, ang kamatayon dili mao ang kataposan apan usa ka importante nga lakang sa pag-uswag. “Kitang tanan mabanhaw human kita mamatay. Kini nagpasabot nga ang matag espiritu ug lawas sa tawo mahiusa pag-usab ug mabuhi hangtod sa kahangtoran.”

Ang buhi nga mga propeta sa atong panahon—kinsa nagdawat og pagpadayag gikan sa Dios aron sa pagtudlo ug pagpangulo kanato—nagkakusog nga nagdapit kanato nga moduol kang Kristo. Sila nagtabang kanato sa pagtutok sa Iyang ebanghelyo uban sa atong tibuok nga pagtagad ug tinguha. Kita makakutlo og daghang ehemplo sa mga pagpahiangay ug mga pagpalambo nga gipahibalo sa Unang Kapangulohan nga gidesinyo aron nga kita motutok kang Jesukristo. Ang pipila niini naglakip sa:

• Ang desisyon nga dili na gamiton ang ngalan nga “Mormon nga Simbahan” ug ilisan kini sa husto nga ngalan, Ang Simbahan ni Jesukristo sa mga Santos sa Ulahing mga Adlaw.

• Ang pagkaanaa sa bag-o, dinasig sa Kristo nga tema nga art nga ipakita diha sa mga meetinghouse.

• Mga tema ug musika sa Young Women ug Aaronic nga Pagkapari nga nakatutok kang Jesukristo, sama sa “Ako usa ka tinun-an ni Jesukristo” ug “Tan-aw ngadto kang Kristo.”

• Mas gihatagan og gibug-aton ang Pag-ula ug ang literal nga Pagkabanhaw ni Jesukristo isip ang labing mahimayaon nga mga panghitabo sa kasaysayan.

• Ang pagsaulog sa Pasko sa Pagkabanhaw isip usa ka panahon ug dili lang usa ka holiday, nga adunay paghatag og gibug-aton diha kang Jesukristo.

• Ang pagpaila sa makitang ilhanan sa Simbahan ni Jesukristo ug sa simbolikanhon nga kinaiya niini.

Atong mas tan-awon og klaro ang epekto sa pipila niini. Una, ang simbolo sa Simbahan.

Niadtong 2020, si Presidente Russell M. Nelson mipaila og bag-ong makitang ilhanan alang sa Simbahan. Kini nga simbolo nagpakita sa kamatuoran nga si Kristo mao ang anaa sa sentro sa Iyang Simbahan ug kinahanglan nga mao ang anaa sa sentro sa atong mga kinabuhi. Kita karon nakakita niining pamilyar nga simbolo diha sa mga rekomend sa templo, diha sa mga website ug mga magasin sa Simbahan, isip ang icon sa Gospel Library nga app, ug gani sa mga tag sa ID sa militar alang sa mga miyembro sa Simbahan nga nagserbisyo diha sa mga armadong kusog. Ang simbolo naglakip sa ngalan sa Simbahan nga anaa diha sa sulod sa usa ka pamag-ang nga bato, usa ka pahinumdom nga si Jesukristo mao ang ulohang bato sa pamag-ang, gipakita dinhi sa Cambodian ug gigamit sa 145 ka pinulongan.

Ang sentro sa simbolo mao ang usa ka representasyon sa minahal nga marmol nga Christus nga estatuwa nga hinimo ni Bertel Thorvaldsen, nga nahimong nailhan kaayo nga may kalabotan sa Simbahan ug makita diha sa mga sentro alang sa mga bisita ug diha sa mga nataran sa templo sa tibuok kalibotan. Ang pagkainila niini diha sa simbolo sa Simbahan nagsugyot nga si Kristo kinahanglan nga anaa sa sentro sa tanan natong buhaton. Sa samang paagi, ang gipatuyhad nga mga bukton sa Manluluwas nagpaila sa Iyang saad sa pagdawat sa tanan nga moduol ngadto Kaniya. Kini nga simbolo mao ang usa ka biswal nga representasyon sa gugma sa Manluluwas nga si Jesukristo ug usa ka kanunay nga pahinumdom sa buhi nga Kristo.

Tungod sa pagkakuryoso, nangutana ko sa daghang pamilya ug mga higala kabahin sa usa ka importante nga elemento sa simbolo sa Simbahan. Makapasorpresa, daghan ang wala nahibalo sa usa ka balaan nga kinaiya nga gipakita niini. Si Jesukristo nagbarog ilawom sa arko. Kini nagrepresentar sa nabanhaw nga Manluluwas nga migawas gikan sa lubnganan. Kita sa pagkatinuod nagsaulog sa nabanhaw, buhi nga Kristo, bisan diha sa paggamit sa simbolo sa Simbahan.

Karon atong hinuklogan ang kaimportante sa Pasko sa Pagkabanhaw. Sa bag-ohay nga mga mensahe sa Unang Kapangulohan kabahin sa Pasko sa Pagkabanhaw, kita gihagit nga atong “saulogon ang Pagkabanhaw sa atong buhi nga Manluluwas pinaagi sa pagtuon sa Iyang mga pagtulun-an ug sa pagtabang sa pag-establisar og mga tradisyon sa Pasko sa Pagkabanhaw sa atong katilingban sa kinatibuk-an, ilabi na sa sulod sa atong kaugalingong mga pamilya.” Sa laktod, kita giawhag nga mouswag ngadto sa usa ka mas halangdon ug mas balaan nga pagsaulog sa Pasko sa Pagkabanhaw.

Ako ganahan kaayo sa nagpadayon nga pagpadayag kabahin sa Pasko sa Pagkabanhaw ug nalipay alang sa inyong daghang paningkamot sa paghimo sa Pasko sa Pagkabanhaw nga usa ka sagrado ug balaan nga okasyon. Agig dugang sa pagpahigayon og usa ka oras nga panagtigom alang sa sakramento atol sa Dominggo sa Pasko sa Pagkabanhaw, ubang mga ehemplo sa takos nga mga kalihokan naglakip sa mga debosyonal sa ward ug stake ug mga kalihokan sa Dominggo sa Lukay ingon man atol sa Semana Santa. Kini nga mga paghinumdom naglakip sa mga kalihokan uban sa kabataan ug kabatan-onan ug kanunay nga naglakip og ubang tinuohan nga mga choir. Ang uban nagpahigayon og “Buhi nga Kristo” nga mga open house alang sa mga miyembro ug mga higala ug miapil sa daghang relihiyon nga mga kalihokan sa komunidad sa Pasko sa Pagkabanhaw.

Ang ingon nga mga kalihokan susama sa daghang pundok sa mga tawo diha sa dakbayan sa Jerusalem kansang mga tingog naghiusa aron sa pagdayeg sa Manluluwas atol sa Iyang madaogon nga pagsulod. Ang parehas nga madananihon mao ang mga report sa inyong mga tubag ngadto sa imbitasyon sa Unang Kapangulohan nga mosimba diha sa panimalay isip mga pamilya aron sa paghinumdom niining labing importante nga holiday.

Ako nagtuo nga ang pamilya nga pagsimba kalabot sa Pasko sa Pagkabanhaw misaka gayod. Duha ka tuig ang milabay, namulong ako mahitungod sa tinguha sa among pamilya nga mapalambo ang paagi sa among pagpasidungog sa Pasko sa Pagkabanhaw. Angkonon nako, kini usa ka buhat nga gipaningkamotan pa. Kami kanunayng ganahan kaayo sa usa ka espesyal nga pagkaon sa Pasko sa Pagkabanhaw, mga bukag sa Pasko sa Pagkabanhaw, ug usa ka pagpangita og mga itlog sa Pasko sa Pagkabanhaw, ug gibuhat gihapon namo. Apan, ang pagdugang on tinuyo nga espirituhanon nga habig nga motutok ni Jesukristo ug sa Iyang Pag-ula ngadto sa among selebrasyon nagdala og maanindot nga balanse sa among paghinumdom niining labing balaan sa tanang panghitabo.

Kining tuiga mao ang among ikatulo nga pagsulay sa paghimo sa Pasko sa Pagkabanhaw nga mas nakasentro kang Kristo. Sama sa pagkatawo ni Jesukristo sa Pasko, ang among pamilya nga pasundayag sa Pasko sa Pagkabanhaw naglakip sa yano nga mga igsusul-ob, pagbasa sa mga kasulatan gikan sa Bag-ong Tugon ug sa Basahon ni Mormon, musika, mga litrato sa Pasko sa Pagkabanhaw, mga dahon sa palmera—ug gamay nga kagubot, kon magmatinuoron gayod ako. Ang mga anak ug mga apo nagbasa ug nagsaysay sa mga pagdayeg sa Dominggo sa Lukay nga “Hosanna … Dalaygon ang nagaanhi sa ngalan sa Ginoo! Hosanna sa kahitas-an” ug, “Mao kini … si Jesus … sa Galilea” ingon og sama nga may kalabotan sa “Sa yuta panagdait sa mga tawo nga iyang gikahimut-an” sa panahon sa Pasko.

Kami karon nalingaw na sa sagol nga mga dekorasyon. Ang unsay kaniadto nga hapit mga kuneho ug mga itlog sa Pasko sa Pagkabanhaw lang karon nabalanse na sa Christus ug sa mga imahe sa walay sulod nga lubnganan, sa nabanhaw nga Manluluwas nga nagpakita diha sa tanaman gawas sa lubnganan, ug ang pagpakita sa Manluluwas ngadto sa mga Nephita. Kami usab naningkamot sa paghimo sa Pasko sa Pagkabanhaw nga usa ka panahon kaysa usa lang ka adlaw. Kami naningkamot nga mahimong mas sinati, mahunahunaon, ug masaulogon sa Dominggo sa Lukay ug sa Biyernes Santo ug sa sagrado nga mga panghitabo nga nahitabo atol sa tibuok Semana Santa.

Ang Pasko sa Pagkabanhaw nagtugot kanamo sa pagpasidungog sa maulaong sakripisyo ni Jesukristo ug sa literal ug malipayon nga Pagkabanhaw Niya. Ang among mga kasingkasing masulub-on samtang among hunahunaon ang pag-antos sa Manluluwas didto sa tanaman ug didto sa Kalbaryo, apan ang among mga kasingkasing magmaya samtang among handurawon ang walay sulod nga lubnganan ug ang langitnong mando nga “Siya nabanhaw!”

Ang bag-ohay lang nga pag-awhag sa Unang Kapangulohan nga “maglantaw sa Pasko sa Pagkabanhaw ug sa Pagkabanhaw ni Jesukristo—ang labing mahimayaon sa tanang mensahe ngadto sa katawhan” nagpakita gayod sa kamahinungdanon niini nga panahon. Samtang adunay ingon og nagkadako nga gituohan taliwala sa nagkadaiyang Kristiyano nga mga teyologo nga hunahunaon ang Pagkabanhaw sa pasumbingay ug simbolikanhon nga mga termino, kita momatuod sa atong doktrina nga “ang Pagkabanhaw nagpasabot nga ang tanan kinsa nabuhi sukad mabanhaw, ug ang Pagkabanhaw literal.” “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi.” Si Jesukristo mibugto sa mga higot sa kamatayon alang sa matag buhi nga kalag.

Kita sa pagkatinuod nagpabilin nga natingala sa grasya nga gitanyag ni Jesus kanato. Kita mohangop sa Iyang mga pulong nga “walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala.”

Si C. S. Lewis mipahayag nga “sa pagsangyaw sa Kristiyanismo nagpasabot [ngadto sa Apostoles] gayod sa pagsangyaw sa Pagkabanhaw. … Ang Pagkabanhaw mao ang nag-una nga tema sa matag Kristiyano nga wali nga gireport diha sa Mga Buhat. Ang Pagkabanhaw, ug ang mga sangpotanan niini, mao ang ‘ebanghelyo’ o ang maayong balita nga gidala sa mga Kristiyano.”

Ako mopahayag nga “adunay pagkabanhaw, … wala magmadaogon ang lubnganan, ug ang kahapdos sa kamatayon gituhop diha kang Kristo.”

Sa pagtapos, ako mopamatuod nga tanan kinsa modawat sa mga imbitasyon gikan sa atong buhi nga propeta ug sa iyang mga magtatambag nga mas tuyo nga mohinumdom sa balaan nga mga panghitabo nga girepresentar sa Pasko sa Pagkabanhaw makakaplag nga ang ilang relasyon ni Jesukristo mas magkalig-on gayod.

Pipila lang ka adlaw ang milabay, nahibaloan nako ang mahitungod sa usa ka lola kinsa misaysay sa istorya sa Pasko sa Pagkabanhaw ngadto sa iyang kwatro anyos nga apo gamit ang yano nga mga kopya sa lubnganan, sa bato nga mitabon sa lubnganan, ni Jesus, si Maria, sa mga disipulo, ug sa anghel. Ang batang lalaki mitan-aw ug naminaw og maayo samtang ang iyang lola mipakigbahin sa paglubong, pagsirado ug pag-abli sa lubnganan, ug sa eksena sa tanaman bahin sa Pagkabanhaw. Siya sa wala madugay mainampingong misubli sa istorya sa makapasorpresa nga detalye ngadto sa iyang mga ginikanan samtang iyang gilihok mismo ang mga pigura. Human niining maanindot nga gutlo, gipangutana siya kon nasayod ba siya kon nganong kita adunay Pasko sa Pagkabanhaw. Ang batang lalaki mihangad ug uban sa binata nga rason mitubag, “Tungod kay buhi man Siya.”

Akong idugang akong pagpamatuod ngadto sa iyaha—ug sa inyoha, ug nianang sa mga anghel ug sa mga propeta—nga Siya nabanhaw ug nga Siya buhi, diin ako nagpamatuod, sa ngalan ni Jesukristo, amen.