Balaan nga Awtoridad, Halangdon nga mga Batan-ong Lalaki

Salamat, Elder Andersen, alang nianang talagsaon nga pagpahayag sa gahom sa pagkapari ug sa gahom sa Pag-ula sa Manluluwas.

Usa ka Dominggo sa buntag niining Enero, samtang naglingkod ko sa panagtigom alang sa sakramento, sobra sa usa ka dosena nga mga batan-ong lalaki ang gipaluyohan aron i-advance sa Aaronic nga Pagkapari. Nabati nako ang pisikal nga kausaban sa kalibotan.

Kalit kong nakaamgo nga sa tibuok kalibotan, sa matag time zone, diha sa mga panagtigom alang sa sakramento sama gayod niana, napulo ka liboan ka deacon, mga teacher, ug mga priest—sama sa higala ni Presidente Holland niining buntaga, si Easton—ang gipaluyohan aron maordinahan ngadto sa tibuok kinabuhi nga mga pangalagad sa pagkapari nga mahitabo sa tibuok Simbahan.

Matag Enero, gipandong ang mga kamot diha sa ulohan sa mga 100,000 ka batan-ong lalaki, nagkonektar kanila pinaagi sa ordinansa ngadto sa usa ka klaro nga linya sa awtoridad nga masubay balik pinaagi sa Pagpahiuli ngadto kang Joseph ug Oliver, ngadto kang Juan Bautista, ug ngadto kang Jesukristo.

Karon, atong Simbahan dili kanunay nga mopahayag gayod og mga emosyon o pagtuo nga dayag nga makita. Dinhi, kita molihok nga dili mokuha og atensiyon sa mga tawo.

Apan bisan pa, ang pagkakita niining nagdahunog nga bag-ong naordinahan nga mga naghupot sa pagkapari nga mikatap sa tibuok yuta, naghunahuna ko—sa usa ka “simbahan sa hingpit nga kalipay” nga paagi—kon dili ba kini kinahanglan isinggit gikan sa mga atop. “Karon,” naghunahuna ko, “kinahanglan adunay mga trompeta ug hagting sa mga piyangpiyang ug mabulokon nga mga pabuto. Kinahanglan adunay mga parada!”

Nakahibalo sa gahom sa Dios kon unsa gayod kini, saksi kita sa pagkausab sa mismong mga sundanan niini nga kalibotan pinaagi sa diosnon nga awtoridad nga mikatap sa yuta.

Kini nga mga ordinasyon mopasiugda niini nga mga batan-ong lalaki ngadto sa tibuok kinabuhi nga pagserbisyo samtang ilang makaplagan ang ilang kaugalingon diha sa mahinungdanon nga mga panahon ug mga dapit diin ang ilang presensiya ug mga pag-ampo ug ang pagkapari sa Dios nga ilang gihuptan mahimong importante kaayo.

Ang ordinasyon niining mga batan-ong lalaki nagsugod sa usa ka tigpangalagad nga anghel nga gipadala sa Dios. Ang nabanhaw nga Juan Bautista sa karaang kapanahonan mipakita ngadto ni Joseph ug ni Oliver, mipandong sa iyang mga kamot diha sa ilang mga ulo, ug miingon, “Diha kaninyo akong kauban nga mga sulugoon, sa ngalan sa Mesiyas akong itugyan ang Pagkapari ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (Doktrina ug mga Pakigsaad 13:1).

Si Juan mitawag niini nga awtoridad nga ang “Pagkapari ni Aaron,” sunod sa igsoon nga lalaki ug kompanyon sa pagkapari ni Moises. Sa karaang panahon, ang mga naghupot niini nga pagkapari ni Aaron mao ang motudlo ug moabag sa mga ordinansa—mga ordinansa nga nagtutok sa pagkadisipulo ngadto sa umaabot nga Mesiyas, ang Ginoong Jesukristo (tan-awa sa Deuteronomio 33:10).

Ang basahon sa Numeros klaro nga nagtudlo sa mga naghupot sa pagkapari ni Aaron sa mga buluhaton sa paggamit sa mga sudlanan sa mga ordinansa. “Ug itugyan kang Aaron ug sa iyang mga anak … [ug] sila maoy mag-atiman … sa lamisa … [ug] sa mga galamiton sa Dapit nga Balaan nga maoy gamiton sa mga pari” (Numeros 3:10, 31).

Ang ordinansa sa halad nga hayop sa Daang Tugon natuman na ug giilisan pinaagi sa kinabuhi ug Pag-ula sa Manluluwas. Kana nga karaan nga ordinansa giilisan sa ordinansa nga atong gitawag karon og sakramento sa Panihapon sa Ginoo.

Ang Ginoo nagsalig sa mga naghupot sa pagkapari ni Aaron karon sa pagbuhat sa susama gayod nga mga butang nga ilang gibuhat sa karaan: sa pagtudlo ug sa pagpangalagad sa mga ordinansa—ang tanan sa pagpahinumdom gayod kanato sa Iyang Pag-ula.

Kon ang mga deacon, mga teacher, ug mga priest motabang sa sakramento, sila makadawat sa mga panalangin niini sama lang sa tanan: pinaagi sa pagtuman sa pakigsaad nga ilang gihimo samtang sila indibidwal nga moambit sa pan ug tubig. Apan sa pagbuhat niining sagrado nga mga katungdanan, sila usab makakat-on pa og dugang mahitungod sa ilang mga tahas ug mga responsibilidad sa pagkapari.

Ang Aaronic nga Pagkapari gitawag nga ang pagpangandam nga pagkapari sa usa ka bahin tungod kay ang mga ordinansa niini motugot kanila nga makasinati sa responsibilidad ug hingpit nga kalipay sa pagkaanaa sa buluhaton sa Ginoo, nag-andam kanila alang sa umaabot nga pagserbisyo sa pagkapari, kon sila mahimong matawag sa pagpangalagad nga wala damha—lakip sa pagsulti sa dinasig nga mga panalangin sa mga panahon sa dihang ang mga paglaom ug mga pangandoy, ug bisan ang kinabuhi ug kamatayon, nameligro.

Ang ingon nga seryoso nga mga gilaoman nagkinahanglan og seryoso nga pagpangandam.

Ang Doktrina ug mga Pakigsaad nagpasabot nga ang mga deacon ug mga teacher “mopasidaan, mopatin-aw, moawhag, ug motudlo, ug modapit sa tanan sa pagduol ngadto ni Kristo” (Doktrina ug mga Pakigsaad 20:59). Agig dugang niini nga mga kahigayoan, ang mga priest mao ang mobuhat sa “pagsangyaw … ug pagbunyag,” (Doktrina ug mga Pakigsaad 20:50).

Aw, tanan niana ingon og daghan kaayo, apan sa tinuod nga mga sitwasyon, kini nga mga butang natural nga mahitabo, sa tibuok kalibotan.

Usa ka bishop mitudlo sa iyang bag-o nga kapangulohan sa korum sa mga deacon. Mao nga ang kapangulohan nagsugod sa paghisgot kon unsaon kaha nila pagbuhat kana sa ilang korum ug sa ilang ward. Sila midesisyon nga kinahanglan silang magsugod sa pagbisita sa edaran nga mga miyembro sa ward aron mahibaloan kon unsay ilang gikinahanglan ug dayon buhaton kana.

Apil niadtong ilang giserbisyohan mao si Alan, usa ka walay batasan, kasagaran mapasipad-on, ug usahay makig-away nga silingan. Ang asawa ni Alan, si Wanda, nahimong usa ka miyembro sa Simbahan, apan si Alan, ingnon ta nga, sama sa usa ka lisod nga tawo.

Bisan pa, ang mga deacon nagkugi, nagpasiaw aron ibaliwala ang iyang mga panginsulto, samtang sila mipala sa niyebe ug mipagawas sa basura. Ang mga deacon lisod nga dili higugmaon, ug si Alan sa kataposan nagsugod sa paghigugma kanila. Sa usa ka punto sila midapit kaniya nga mosimba.

“Dili ko ganahan sa simbahan,” siya mitubag.

“Aw, ganahan ka namo,” miingon sila. “Mao nga kuyog namo. Pwedeng moadto lang ka sa among miting sa korum lang kon gusto nimo.”

Ug uban sa pagtugot sa bishop, siya miadto—ug nagpadayon siya sa pag-adto.

Ang mga deacon nahimong mga teacher, ug samtang nagpadayon sila sa pagserbisyo kaniya, siya mitudlo kanila sa pag-ayo sa mga sakyanan ug sa paghimo sa mga butang. Sa panahon nga kini nga mga deacon nga nahimong mga teacher nga nahimong mga priest, si Alan nagtawag kanila nga “akong mga batang lalaki.”

Sila matinguhaong nag-andam alang sa mga misyon ug mihangyo kaniya kon sila mahimong magbansay sa mga leksiyon sa misyonaryo ngadto kaniya. Siya nanumpa nga siya dili gayod maminaw ug dili gayod motuo, apan, oo, sila mahimong magbansay diha sa iyang balay.

Ug dayon si Alan nasakit. Ug siya nahimong dili na kaayo estrikto.

Ug usa ka adlaw, diha sa miting sa korum, siya malumo nga mihangyo kanila nga mag-ampo alang niya aron mohunong sa pagpanigarilyo, ug mao nga gibuhat nila. Ug dayon sila misunod kaniya ngadto sa panimalay ug gisakmit ang tanan niyang gitipigan nga tabako.

Samtang ang iyang nagkaluya nga panglawas mibutang ni Alan diha sa mga ospital ug sa mga sentro sa rehabilitasyon, ang “iyang mga batang lalaki” miserbisyo kaniya, hilom nga nagpakita sa mga gahom sa pagkapari ug sa matuod nga gugma (tan-awa sa Doktrina ug mga Pakigsaad 121:41).

Ang milagro mipadayon sa dihang si Alan mihangyo nga bunyagan—apan siya mipanaw dayon sa wala pa kini mahitabo. Sa iyang hangyo, ang iyang mga deacon nga nahimong mga priest mao ang mga tagyayong sa lungon ug ang mga mamumulong sa iyang lubong, diin sila—tukmang—mipasidaan, mipatin-aw, miawhag, mitudlo, ug midapit sa tanan ngadto kang Kristo.

Ug sa wala madugay, diha sa templo, usa kadto sa “mga batang lalaki ni Alan” kinsa mibunyag samtang ang kanhi nga presidente sa korum sa mga deacon ang mi-proxy alang kang Alan.

Tanan nga gisulti ni Juan Bautista nga buhaton, ilang gibuhat. Ilang gibuhat ang unsay gibuhat sa mga deacon, mga teacher, ug mga priest sa tibuok Simbahan ug sa tibuok niini nga kalibotan.

Usa sa mga butang nga ang mga naghupot sa pagkapari ni Aaron gitahasan sa pagbuhat naglakip sa ordinansa sa sakramento.

Sa miaging tuig nahimamat nako ang usa ka dinasig nga bishop ug ang iyang maayo nga asawa. Sa bag-ohay lang nga Sabado sa buntag, sila nagdrayb padulong ngadto sa bunyag sa ilang anak nga lalaki, ug miantos sa masulub-on ug kalit nga pagkamatay sa ilang pinangga nga dos anyos nga anak nga babaye, si Tess.

Pagkasunod buntag, ang ilang mga miyembro sa ward nagpundok alang sa panagtigom alang sa sakramento nga napuno sa kaluoy, nag-antos usab sa pagkamatay niining hingpit nga gamay nga batang babaye. Walay nagdahom nga ang pamilya sa bishop maanaaa sa simbahan nianang buntaga, apan pipila ka minuto sa wala pa magsugod ang panagtigom, sila hilom nga misulod ug milingkod sa ilang dapit.

Ang bishop miadto sa pulpito ug milakaw labay sa iyang kasagaran nga lingkoranan taliwala sa iyang mga magtatambag ug milingkod hinuon taliwala sa iyang mga priest diha sa lamesa sa sakramento.

Atol nianang magul-anon ug walay kinatulgan nga gabii sa wala pa nangita og panabot ug kalinaw, nakadawat siya og kusog nga impresyon sa unsay labing gikinahanglan sa iyang pamilya—ug unsay labing gikinahanglan sa iyang ward. Kini mao ang makadungog sa tingog sa ilang bishop, ang ilang presidente sa Aaronic nga Pagkapari sa ward, ilang nagbangotan nga amahan, sa pagsulti sa mga saad sa pakigsaad sa sakramento.

Mao nga, sa paglabay sa panahon, siya miluhod uban niadto nga mga priest ug nakig-istorya ngadto sa Iyang Amahan. Uban sa dakong kagul-anan niana nga okasyon, siya misulti sa pipila sa labing gamhanan nga mga pulong nga si bisan kinsa gitugotan sukad sa pagsulti og kusog niining kinabuhia.

Mga pulong nga may mahangtorong sangpotanan.

Mga pulong sa ordinansa.

Mga pulong sa pakigsaad.

Instruksiyon nga mokonektar nato ngadto sa mismong mga katuyoan niining kinabuhia—ug ngadto sa labing maanindot nga mga sangpotanan sa plano sa Langitnong Amahan alang kanato.

Mahunahuna ba ninyo kon unsay nadungog sa kongregasyon diha niana nga chapel nianang adlawa—unsay ilang nabati diha sa mga pulong nga atong madungog matag Dominggo diha sa atong mga chapel?

“O Dios, ang Amahan sa Kahangtoran, mohangyo kami kanimo pinaagi sa ngalan sa imong Anak, nga si Jesukristo, sa pagpanalangin ug pagbalaan niining pan ngadto sa mga kalag sa tanang moambit niini, nga sila mokaon agig paghinumdom sa lawas sa imong Anak, ug mosaksi kanimo, O Dios, ang Amahan sa Kahangtoran, nga sila andam nga modala diha sa ilang kaugalingon sa ngalan sa imong Anak, ug sa kanunay mahinumdom kaniya ug motuman sa iyang mga sugo nga iyang gihatag kanila; nga sila sa kanunay makabaton sa iyang Espiritu nga makig-uban kanila. Amen” (Doktrina ug mga Pakigsaad 20:77).

Ug dayon: “O Dios, ang Amahan sa Kahangtoran, kami mohangyo kanimo, pinaagi sa ngalan sa imong Anak, nga si Jesukristo, sa pagpanalangin ug pagbalaan niining [tubig] ngadto sa mga kalag sa tanan nga moinom niini, nga sila mohimo niini agig paghinumdom sa dugo sa imong Anak, nga gipaagas alang kanila; nga sila mosaksi nganha kanimo, O Dios, ang Amahan sa Kahangtoran, nga sila sa kanunay mahinumdom kaniya, nga sila makabaton sa iyang Espiritu nga makig-uban kanila. Amen” (Doktrina ug mga Pakigsaad 20:79).

Kining maayo nga amahan ug inahan nagpamatuod nga kana nga saad natuman. Sila, sa pagkatinuod, sa ilang mahangtoron nga kahupayan, “[n]akabaton sa iyang Espiritu nga makig-uban kanila.”

Ako mahangtorong mapasalamaton nga ang mga naghupot sa Aaronic nga Pagkapari, uban sa mga gahom niini, mga ordinasa, ug mga katungdanan, mopanalangin gayod kanatong tanan pinaagi mismo sa mga yawe sa ”pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (Doktrina ug mga Pakigsaad 13:1). Sa ngalan ni Jesukristo, amen.