“Paduol Kamo Kanako”

Akong minahal nga mga kaigsoonan, kalipay nako nga ikauban kamo niining kinatibuk-ang komperensiya sa Ang Simbahan ni Jesukristo sa mga Santos sa Ulahing mga Adlaw. Kini ang Iyang Simbahan. Kita nagkapundok diha sa mga bilding ug sa mga panimalay sa tibuok kalibotan diha sa Iyang ngalan.

Kita modala sa Iyang ngalan dinhi kanato kon kita mosulod sa Iyang gingharian pinaagi sa pakigsaad. Siya mao ang nabanhaw ug nahimaya nga Anak sa Dios. Kita mga mortal, makasinati og sala ug kamatayon. Apan, tungod sa Iyang gugma alang sa matag usa kanato, ang Manluluwas nagdapit kanato nga mas magpaduol ngadto Kaniya.

Ania ang Iyang imbitasyon kanato: “Paduol ngari kanako ug Ako mopaduol nganha kaninyo; pangita kanako nga makugihon ug kamo makakita kanako; pangayo, ug kamo makadawat; tuktok, ug kini pagabuksan nganha kaninyo.”

Adunay mga higayon nga mobati kita nga duol ngadto sa Manluluwas nga si Jesukristo. Ug bisan pa niana, usahay atol sa atong mortal nga mga pagsulay, mobati kita og gamayng pagkabulag gikan Kaniya ug nangandoy alang sa usa ka kasegurohan nga Siya nakaila sa unsay anaa sa atong mga kasingkasing ug nahigugma kanato isip mga indibidwal.

Ang imbitasyon sa Manluluwas naglakip sa paagi nga mobati niana nga kasegurohan. Pagpaduol ngadto Kaniya pinaagi sa paghinumdom Niya kanunay. Makugihon Siyang tinguhaa pinaagi sa pagtuon sa kasulatan. Pangayo pinaagi sa kinasingkasing nga pag-ampo ngadto sa Langitnong Amahan aron mobati nga mas duol ngadto sa Iyang Hinigugmang Anak.

Adunay yano nga paagi sa paghunahuna bahin niini. Kini mao ang inyong buhaton kon kamo nabulag sa dugay nga panahon gikan sa minahal nga mga higala. Kamo mangita og paagi nga makig-istorya kanila, inyong mahalon ang bisan unsang mensahe nga inyong nadawat gikan kanila, ug buhaton ninyo ang tanan nga inyong mahimo aron sa pagtabang kanila.

Kon mas kanunay kana nga nahitabo, kon nagpadayon kini og mas dugay, mas mapalig-on pa pag-ayo ang bugkos sa pagbati, ug mabati ninyo ang inyong kaugalingon nga mas nagkaduol gayod. Kon dako ang panahon nga milabay nga walay bililhon nga komunikasyon ug sa kahigayonan sa pagtabang sa usag usa, ang bugkos mohuyang.

Si Jesukristo nahigugma sa matag usa kanato. Siya nagtanyag niana nga kahigayonan nga mas magpaduol ngadto Kaniya. Sama sa usa ka mahigugmaon nga higala, buhaton ninyo kini sa sama gayod nga paagi, sa pakig-istorya pinaagi sa pag-ampo ngadto sa Langitnong Amahan diha sa ngalan ni Jesukristo, pagpaminaw alang sa bililhon nga giya gikan sa Espiritu Santo, ug dayon malipayon nga pagserbisyo sa uban alang sa Manluluwas. Sa dili madugay inyong mabati kana nga panalangin sa pagpaduol pa Kaniya.

Sa akong pagkabatan-on, akong nasinati ang kalipay sa akong pagpaduol sa Manluluwas—ug sa Iyang pagpaduol kanako—pinaagi sa yanong mga buhat sa pagkamasulundon sa mga sugo. Sa dihang batan-on pa ko, ang sakramento gitanyag atol sa usa ka gabii nga panagtigom. Ako nakahinumdom pa gihapon sa usa ka piho nga gabii, sobra sa 75 ka tuig ang milabay, sa dihang kini ngitngit ug bugnaw sa gawas. Nahinumdom ko sa usa ka pagbati sa kahayag ug kainit samtang naamgohan nako nga gituman nako ang sugo nga magpundok uban sa mga Santos aron moambit sa sakramento, nakigsaad sa atong Langitnong Amahan nga kanunayng mohinumdom sa Iyang Anak ug motuman sa Iyang mga sugo.

Sa pagtapos sa panagtigom nianang gabhiona, gikanta namo ang himno nga “Uban Nako; Gabii na,” uban sa halandomon nga mga pulong nga “Ginoo, ubani ako.”

Kini nga mga pulong nakahatag nako og dakong pagbati sa Espiritu, bisan isip usa ka batan-ong lalaki. Akong nabati ang gugma ug kasuod sa Manluluwas niadtong gabhiona pinaagi sa paghupay sa Espiritu Santo.

Pipila ka tuig ang milabay gusto nakong pukawon ang samang pagbati sa gugma sa Manluluwas ug ang kasuod nga akong gibati ngadto sa Ginoo atol niana nga panagtigom sa sakramento sa akong kabatan-on. Mao nga ako mituman og laing yano nga sugo: ako misiksik sa mga kasulatan.

Sa basahon ni Lucas, akong nabasa ang bahin sa ikatulong adlaw human sa Iyang Paglansang ug paglubong, sa dihang ang matinud-anong mga sulugoon miabot, tungod sa gugma alang sa Manluluwas, aron sa pagdihog sa Iyang lawas. Sa dihang miabot sila, ilang nakaplagan nga ang bato giligid palayo sa lubnganan ug wala na ang Iyang lawas.

Duha ka anghel ang nagbarog ug nangutana nganong nangahadlok sila:

“Ngano nga ang buhi anha man ninyo pangitaa diha sa mga patay?

“Wala Siya dinhi, kondili nabanhaw: hinumdomi ang iyang gisulti kaninyo sa didto pa siya sa Galilea,

“Nga, Ang Anak sa tawo kinahanglan igatugyan ngadto sa mga kamot sa mga tawong makasasala, ug igalansang sa krus, ug sa ikatulo ka adlaw mabanhaw siya.”

Nianang gabhiona atol sa kilumkilom, duha ka disipulo ang naglakaw gikan sa Jerusalem diha sa dalan paingon ngadto sa Emaus, ug ang nabanhaw nga Ginoo nagpakita ngadto kanila ug milakaw uban kanila.

Ang basahon ni Lucas nagtugot nato nga makalakaw uban nila nianang gabhiona:

“Ug samtang nagsultihanay ug nagpangutan-anay sila, si Jesus miduol ug mikuyog kanila.

“Apan ang ilang mga mata nahipugngan aron dili sila makaila kaniya.

“Ug siya miingon kanila, Unsa ba kining inyong gisultihan samtang nanaglakaw kamo? Ug sila mihunong, sa panagway nga masulub-on?

“Ug ang usa kanila, nga ginganlan si Cleopas, mitubag kaniya, Ikaw ra ba ang bugtong dumuloong sa Jerusalem nga wala mahibalo sa mga butang nga nanghitabo didto sulod niining mga adlawa?”

Sila misulti Kaniya sa ilang kasub-anan nga namatay si Jesus sa dihang sila misalig nga Siya ang mahimong Manunubos sa Israel.

Tingali adunay pagbati sa tingog sa nabanhaw nga Manluluwas samtang namulong Siya niining duha ka nagsubo ug nagbangotan nga mga disipulo.

Samtang nagpadayon ko sa pagbasa, miabot kini nga mga pulong nga nakapainit sa akong kasingkasing, sama sa akong gibati sa dihang ako usa pa ka gamay nga batang lalaki:

“Ug sa nagkahiduol na sila sa balangay, nga ilang gipadulngan: gipasabot niya nga daw mopadayon siya sa unahan.

“Apan gihawiran siya nila nga nag-ingon, Pabilin uban kanamo, kay hapit na magabii ug tapos na ang adlaw. Ug siya misaka ug mipabilin uban kanila.”

Ang Manluluwas midawat nianang gabhiona sa pagdapit nga mosulod sa balay sa Iyang mga disipulo. Siya mitupad sa pagpangaon kanila. Siya mikuha og pan, mipanalangin niini, mipikas-pikas niini, ug gihatag kini ngadto kanila. Ang ilang mga mata nabuka, ug sila nakaila Kaniya. Dayon Siya nawala sa ilang panan-aw.

Girekord ni Lucas alang nato ang pagbati niadtong bulahan nga mga disipulo: “Ug sila nasig-ingon ang usa sa usa, Dili ba ang atong mga kasingkasing nagdilaab man sa sulod nato samtang nagsulti siya kanato diha sa dalan, samtang nagsaysay siya kanato sa kasulatan?”

Ang duha ka disipulo nagdali dayon sa pagbalik ngadto sa Jerusalem aron sultihan ang onse ka Apostoles sa unsay nahitabo. Samtang sila nagpakigbahin sa ilang kasinatian, ang Manluluwas mipakita pag-usab.

Siya mibarog sa ilang taliwala ug “miingon kanila, Ang kalinaw magauban kaninyo.” Siya dayon mirebyo sa mga panagna sa Iyang misyon sa pagtubos sa mga sala sa tanang anak sa Iyang Amahan ug sa pagbugto sa mga higot sa kamatayon.

“Ug miingon kanila, Sa ingon niini nahisulat, nga ang Kristo kinahanglan gayod magaantos, ug sa ikatulo ka adlaw mabanhaw siya gikan sa mga patay:

“Ug nga sa iyang ngalan ang paghinulsol ug ang pagpasaylo sa mga sala kinahanglan igawali ngadto sa tanang kanasoran, sugod sa Jerusalem.

“Kamo mao ang mga saksi niining mga butanga.”

Sama sa Iyang minahal nga mga disipulo, ang matag anak sa Langitnong Amahan kinsa mipili nga mosulod pinaagi sa ganghaan sa bunyag ubos sa pakigsaad nga mahimong saksi sa Manluluwas ug moatiman niadtong nanginahanglan sa tibuok natong mortal nga kinabuhi. Kini nga pasalig gihimo nga klaro alang kanato pinaagi sa bantogan nga propeta sa Basahon ni Mormon nga si Alma gatosan ka tuig na ang milabay didto sa Katubigan sa Mormon:

“Kay nagmatinguhaon kamo sa pag-ipon sa pundok sa Dios, ug pagatawgon nga iyang katawhan, ug andam nga mopas-an sa mga alantoson sa usag usa, nga kini mogaan;

“Oo, ug andam sa pagbangotan uban niadtong nagbangotan; oo, ug sa paghupay niadtong nanginahanglan og kahupayan, ug mobarog isip mga saksi sa Dios sa tanang panahon ug sa tanang butang, ug sa tanang dapit …, bisan hangtod sa kamatayon, aron matubos kamo sa Dios, … nga makabaton kamo og kinabuhing dayon.”

Samtang kamo magmatinud-anon niini nga mga saad, inyong makaplagan nga ang Ginoo motuman sa Iyang saad nga mahimong usa uban kaninyo diha sa inyong pagserbisyo, mohimo sa inyong mga palas-anon nga magaan-gaan. Kamo makaila sa Manluluwas, ug sa umaabot nga panahon kamo mahisama Kaniya ug “[ma]hingpit diha Kaniya.” Pinaagi sa pagtabang sa uban alang sa Manluluwas, inyong makaplagan nga kamo nagkaduol ngadto Kaniya.

Daghan kaninyo adunay mga minahal nga wala na magsubay sa dalan paingon ngadto sa kinabuhing dayon. Kamo naghunahuna kon unsa pay inyong dugang nga mahimo aron mabalik sila. Kamo makasalig sa Ginoo aron mas mapaduol ngadto kanila samtang kamo moserbisyo Kaniya uban sa hugot nga pagtuo.

Inyong mahinumdoman tingali ang saad sa Ginoo kang Joseph Smith ug Sidney Rigdon dihang layo sila sa ilang pamilya alang sa Iyang mga buluhaton: “Akong mga higala nga sila si Sidney ug Joseph, ang inyong mga banay anaa sa maayo nga kahimtang; ania sila sa akong mga kamot, ug Ako mohimo ngadto kanila unsa ang akong buot buhaton nga maayo; kay ania kanako ang tanan nga gahom.”

Samtang inyong bugkosan ang mga samad niadtong nanginahanglan, ang gahom sa Ginoo mopaluyo kaninyo. Ang Iyang mga bukton ituy-od uban sa inyong mga bukton aron sa pagtabang ug pagpanalangin sa mga anak sa atong Langitnong Amahan.

Ang matag sulugoon sa pakigsaad ni Jesukristo makadawat sa Iyang direksiyon gikan sa Espiritu samtang sila mopanalangin ug moserbisyo sa uban alang Kaniya. Dayon sila mobati sa gugma sa Manluluwas ug makakaplag sa kalipay sa pagpaduol ngadto Kaniya.

Ako usa ka saksi sa Pagkabanhaw sa Ginoo sama kasegurado ingon og ako atua didto uban sa duha ka disipulo diha sa balay sa dalan sa Emaus. Ako nasayod nga Siya buhi.

Kini mao ang Iyang tinuod nga Simbahan—ang Simbahan ni Jesukristo. Kita, sa Adlaw sa Paghukom, mobarog atubangan sa Manluluwas, nawong sa nawong. Kini mahimong usa ka panahon sa dakong kalipay alang niadtong, niining kinabuhia, kinsa nagpaduol ngadto Kaniya sa Iyang pagserbisyo ug naghinamhinam nga makapaabot nga makadungog sa Iyang mga pulong: “Maayo! Buotan ka ug matinumanon nga sulugoon.”

Ako mopamatuod isip usa ka saksi sa nabanhaw nga Manluluwas ug atong Manunubos, sa ngalan ni Jesukristo, amen.