Balaanon nga mga Tabang alang sa Mortalidad

Pinaagi ni Propeta Joseph Smith, ang Ginoo mipadayag og pipila ka butang mahitungod sa atong kinabuhi sa wala pa dinhi sa yuta. Didto nagpuyo kita nga espiritung mga anak sa Dios. Kay ang Dios nagtinguha sa pagtabang aron mouswag ang Iyang mga anak, mihukom Siya nga maghimo og usa ka yuta diin kita makadawat og lawas, makakat-on pinaagi sa kasinatian, makapalambo og balaanong mga hiyas, ug aron masulayan kon kita motuman ba sa mga sugo sa Dios. Kadtong mahimong sarang makaangkon og “himaya nga idugang diha sa ilang mga ulo hangtod sa kahangtoran” (Abraham 3:26).

Aron masugdan ang mga kondisyon niining balaan nga plano, ang Dios mipili sa Iyang bugtong Anak nga mahimo natong Manluluwas. Si Lucifer, kansang gisugyot nga alternatibo moguba sa kabubut-on sa tawo, nahimo nga Satanas ug “gilaglag.” Gipalayas ngadto sa yuta ug gihikawan sa kahigayonan sa mortal nga kinabuhi, si Satanas gitugotan nga mosulay sa “pag-ilad ug pagbuta sa mga tawo, ug pagdala kanila nga ulipon sa iyang pagbuot, gani kutob sa dili maminaw ngadto sa tingog sa [Dios]” (Moises 4:4).

Ang mahinungdanon sa talagsaong plano sa Dios alang sa mortal nga paglambo sa Iyang mga anak mao ang ilang pagsinati og “kaatbang sa tanan nga butang” (2 Nephi 2:11). Sama nga ang atong pisikal nga mga braso dili molambo o mamentinar kon walay paningkamot batok sa balaod sa grabidad, mao usab ang mortal nga paglambo sa tawo nagkinahanglan og lainlaing pakigbatok sa mga tintasyon ni Satanas ug sa ubang mortal nga oposisyon. Labing importante sa espirituhanong paglambo mao ang hinatag sa Dios nga gahom ug rekisito sa pagpili tali sa maayo ug daotan. Kadtong mopili sa maayo molambo ngadto sa ilang mahangtoron nga padulngan. Kadtong mopili og daotan—kay tanan makabuhat man sa managlahing mga tintasyon sa mortalidad—magkinahanglan og makaluwas nga tabang, nga gidisenyong ihatag sa mahigugmaon nga Dios.

Labing seguro, ang labing lig-on nga mortal nga tabang sa Dios mao ang Iyang paghatag og usa ka Manluluwas, si Jesukristo, kinsa mag-antos aron mobayad sa kantidad sa sala ug mohatag og kapasayloan alang sa gihinulsolang mga sala. Kana nga maluluy-on ug mahimayaong Pag-ula nagpasabot kon nganong ang pagtuo diha ni Ginoong Jesukristo mao ang unang baroganan sa ebanghleyo. Ang Iyang Pag-ula “mopahitabo sa pagkabanhaw sa mga patay” (Alma 42:23), ug kini “motubos sa mga sala sa kalibotan” (Alma 34:8), nga [mag]papas sa atong tanan nga nahinulsolan nga mga sala ug naghatag sa atong Manluluwas ug naghatag sa atong Manluluwas og gahom sa pagtabang kanato sa atong mortal nga mga kahuyang.

Agig dugang sa mahimayaong pagpapas sa mga sala nga nahimo ug sa pagkapasaylo, ang plano sa mahigugmaong Amahan ug sa Anak naghatag og daghang uban pang mga gasa sa pagprotekta kanato, lakip ang pagprotekta kanato gikan sa pagpakasala sukad sa sinugdanan sa atong kinabuhi. Ang atong mortal nga kinabuhi kanunayng magsugod nga may amahan ug inahan. Sa maayong paagi, kini adunay managlahing mga gasa sa paggiya sa atong kalamboan. Kondili, ang ilang absensiya usa ka bahin sa oposisyon nga angay natong buntogon.

Ang plano sa atong Langitnong Amahan nagsangkap og ubang mga tabang nga mogiya kanato latas sa atong mga panaw sa pagka-mortal. Mamulong ako sa upat niini. Palihog ayaw ko limitahi nga upat, ra gyod ang akong hisgotan, kay nagsapaway ra kini. Dugang pa, duna pay ubang maluluy-ong mga proteksiyon dugang niini.

Una, mamulong ko bahin sa Kahayag o Espiritu ni Kristo. Sa iyang talagsaong pagtulun-an diha sa basahon ni Moroni, si Moroni mikutlo sa pagtulun-an sa iyang amahan nga “ang Espiritu ni Kristo gihatag ngadto sa matag tawo, nga siya masayod sa maayo gikan sa daotan” (Moroni 7:16). Mabasa nato ang sama nga pagtulun-an diha sa modernong mga pagpadayag:

“Ug ang Espiritu naghatag og kahayag ngadto sa matag tawo nga mianhi sa kalibotan; ug ang Espiritu naglamdag sa matag tawo sa tibuok kalibotan, nga nagpatalinghog sa tingog sa Espiritu” (Doktrina ug mga Pakigsaad 84:46).

Usab: “Kay ang akong Espiritu gipadala sa kalibotan aron modan-ag sa mga mapaubsanon ug mahinulsolon, ug sa pagpanghimaraot sa mga dili diosnon” (Doktrina ug mga Pakigsaad 136:33).

Si Presidente Joseph Fielding Smith mipasabot niini nga mga kasulatan: “Wala pasagdi sa Ginoo ang katawhan (dihang natawo sila dinhi sa kalibotan), sa pagpangita sa kahayag ug kamatuoran, apan ang matag tawo … natawo nga may katungod nga makadawat sa giya, sa instruksiyon, sa tambag sa Espiritu ni Kristo o Kahayag sa Kamatuoran.”

Ang ikaduha sa talagsaong mga tabang nga gihatag sa Ginoo aron tabangan kitang makapili sa unsay husto mao ang hut-ong sa balaanong mga direksiyon diha sa mga kasulatan isip kabahin sa plano sa kaluwasan (plano sa kalipay). Kini nga mga direksiyon mao ang mga sugo, mga ordinansa, ug mga pakigsaad.

Ang mga sugo motino sa dalan nga gihatag sa Langitnong Amahan alang kanato aron molambo ngadto sa kinabuhing dayon. Ang mga tawo nga naghunahuna nga ang mga sugo maoy paagi nga mohukom ang Dios kon kinsa ang silotan napakyas sa pagsabot niini nga katuyoan sa mahigugmaon nga plano sa Dios sa kalipay. Niana nga dalan, atong maanam-anam sa pagkab-ot ang gikinahanglang relasyon ngadto sa atong Manluluwas ug mosarang aron madugangan ang Iyang gahom sa pagtabang kanato sa atong dalan paingon sa destinasyon nga Iyang gitinguha alang kanatong tanan. Ang atong Langitnong Amahan nagtinguha sa Iyang tanan nga anak nga makabalik sa celestial nga gingharian, diin ang Dios ug ang atong Manluluwas nagpuyo, ug makabaton sa matang sa kinabuhi niadtong nanagpuyo sa celestial nga himaya.

Ang mga ordinansa ug mga pakigsaad mga kabahin sa balaod nga nagmarka sa dalan padulong sa kinabuhing dayon. Ang mga ordinansa, ug ang sagradong mga pakigsaad nga atong gihimo ngadto sa Dios pinaagi niini, mao ang gikinahanglang mga lakang ug mahinungdanong mga panalipod subay niana nga agianan. Gusto nakong hunahunaon ang tahas sa mga pakigsaad isip ang pagpakita nga ubos sa plano sa Dios, ang Iyang kinatas-ang mga panalangin ihatag niadtong mosaad daan sa pagtuman og pihong mga sugo ug motuman niadtong mga saad.

Ang ubang hinatag sa Dios nga mga tabang sa paghimo og eksaktong mga pagpili mao ang mga pagpahayag sa Espiritu Santo. Ang Espiritu Santo mao ang ikatulong sakop sa Dios nga Kapangulohan. Ang Iyang tulumanon, nga gipasabot diha sa kasulatan, mao ang pagpamatuod bahin sa Amahan ug sa Anak, sa pagtudlo kanato, sa pagdala sa tanang butang sa atong panumdoman, ug paggiya kanato ngadto sa tanang kamatuoran. Ang mga kasulatan naglakip og daghang mga deskripsiyon sa mga ipahayag sa Espiritu Santo, sama sa espirituhanong pagsaksi agig tubag sa pangutana mahitungod sa katinuod sa Basahon ni Mormon. Ang pagpahayag dili angay ikalibog sa gasa sa Espiritu Santo, nga itugyan human sa bunyag.

Usa sa labing mahinungdanong mga tabang sa Dios sa Iyang matinud-anong mga anak mao ang gasa sa Espiritu Santo. Ang kamahinungdanon niini nga gasa tin-aw kaayo nga kini pormal nga itugyan human sa paghinulsol ug sa bunyag pinaagi sa tubig, “ug dayon [ang mga kasulatan mipasabot] mosunod ang kapasayloan sa inyong mga sala pinaagi sa kalayo ug sa Espiritu Santo” (2 Nephi 31:17). Ang mga tawo nga aduna niining kapasayloan sa mga sala—ug dayon kanunay nga mobag-o sa ilang paglimpyo pinaagi sa inadlaw nga paghinulsol ug pagpakabuhi sumala sa pakigsaad nga ilang gihimo pinaagi sa ordinansa sa sakramento—mosarang sa saad nga ang Espiritu Santo, ang Espiritu sa Ginoo, “sa kanunay … makig-uban kanila” (Doktrina ug mga Pakigsaad 20:77).

Sa ingon niana, si Presidente Joseph F. Smith mitudlo nga ang Espiritu Santo “molamdag sa mga hunahuna sa katawhan kabahin sa mga butang sa Dios, sa pagkombinser kanila sa panahon sa ilang pagkakabig sa ilang pagbuhat sa kabubut-on sa Amahan, ug maanaa kanila ang usa ka malungtarong pagpamatuod isip usa ka kauban sa kinabuhi, nga naglihok isip usa ka segurado ug luwas nga giya ngadto sa tanan nga kamatuoran ug nagpuno kanila kada adlaw sa kalipay ug kamaya, uban sa tinguha sa pagbuhat og maayo ngadto sa tanang mga tawo, sa pag-antos nga masaypan kaysa mobuhat og sayop, nga magmabination ug manggiluy-on, mainantoson ug manggihatagon. Ang tanan kinsa anaa niining dili masukod nga gasa, niining perlas nga labing bililhon, adunay padayon nga kauhaw sa pagkamatarong. Kon wala ang tabang sa Balaang Espiritu,” sa pagtapos miingon si Presidente Smith, “walay mortal nga tawo ang makahimo sa paglakaw diha sa higpit ug pig-ot nga agianan.”

Aduna sa daghang gamhanan nga tabang nga mogiya kanato sa atong mortal nga panaw, makasagmuyo nga daghan ang padayong dili andam sa ilang gitakda nga pakigkita sa atong Manluluwas ug Manunubos, si Jesukristo. Ang Iyang sambingay mahitungod sa napulo ka dalagang birhen, nga balikbalik nga gipamulong niini nga komperensiya, nagsugyot mahitungod niadtong gidapit sa pakighimamat Kaniya, nga katungâ lamang ang maandam.

Tanan kita nasayod sa mga sanglitanan niadtong mga dili andam: ang nauli nang mga misyonaryo kinsa mipahunong sa ilang espirituwal nga paglambo pinaagi sa mga panahon sa pagkadili aktibo, kabatan-onan nga mibutang sa peligro sa ilang espirituwal nga paglambo pinaagi sa pagpahilayo sa ilang kaugalingon gikan sa pagtulun-an ug sa mga kalihokan sa Simbahan, mga kalalakin-an nga milangay sa ilang pagka-ordina sa Melchizedek nga Pagkapari, mga lalaki ug babaye—usahay ang mga kaliwat sa halangdong mga pioneer o takos nga mga ginikanan—kinsa mipalayo sa dalan sa pakigsaad nga wala na maghimo ug magtuman sa mga pakigsaad sulod sa balaang templo.

Daghan niana nga pagsimang mahitabo kon ang mga miyembro mapakyas sa pagsunod sa mahinungdanong plano sa espirituwal nga pag-atiman sa personal nga pag-ampo, matag adlaw nga pagtuon sa kasulatan, ug kanunay nga paghinulsol. Sa sukwahi, ang uban wala na mohimo sa sinemana nga pagbag-o sa mga pakigsaad pinaagi sa wala pag-ambit sa sakramento. Ang pipila moingon nga ang Simbahan wala makahatag sa ilang mga gikinahanglan, kana ilang ipuli sa unsay ilang nakita nga panginahanglan sa umaabot sa unsay ilang tan-aw nga maoy ilang gikinahanglan kaysa unsay gihatag sa Ginoo diha sa Iyang daghan nga pagtulun-an ug mga oportunidad alang sa atong mahinungdanon nga pagserbisyo sa uban.

Ang pagpaubos ug pagsalig sa Ginoo mao ang mga sulbad sa ingon niana nga mga pagsimang. Sigon sa gitudlo sa Basahon ni Mormon, ang Ginoo “mopanalangin ug mopauswag niadtong mobutang sa ilang pagsalig diha kaniya” (Helaman 12:1). Ang pagsalig sa Ginoo usa ka partikular nga panginahanglan alang sa tanan kinsa nasayop sa pagsukod sa mga sugo sa Dios ug sa mga pagtulun-an sa Iyang mga propeta batok sa labing bag-o ug kaalam sa tawo.

Namulong ako mahitungod sa daghan nga tabang nga gihatag sa mahigugmaong Amahan sa Langit aron matabangan ang Iyang mga anak nga makabalik ngadto Kaniya. Ang atong bahin niining balaan nga plano mao ang pagsalig sa Dios ug pagtinguha ug paggamit niining balaanong tabang, labi na sa Pag-ula sa Iyang Hinigugmang Anak, atong Manluluwas ug Manunubos , si Jesukristo. Ako nag-ampo nga kita motudlo ug mosunod niini nga mga baroganan, sa ngalan ni Jesukristo, amen.