Hingpit nga Kalipay Pinaagi sa Pakigsaad sa Pagkadisipulo

Usa ka adlaw niadtong 2023, si Uyanga Altansukh anaa sa trabahoan sa amihananang bahin sa Mongolia nga ang siyudad sa Darkhan sa dihang ang Mongolian nga presidente sa misyon misulod sa iyang gitrabahoan. Sa iyang mga pulong:

“Nakita nako siya ug naghunahuna nga siya aduna niining kahayag sa iyang panagway. Siya mabination kaayo ug makalingaw niadtong anaa sa iyang palibot, ug nindot ang akong gibati. Sa wala pa siya mobiya, nangutana ko niya og pipila ka pangutana. Pipila ka adlaw ang milabay, mibalik siya sa akong gitrabahoan ug nangutana kon pwede ba ko motambong sa iyang simbahan. Naghunahuna ko basin makatabang kini. Nabalaka ko sa kaugmaon sa akong mga anak, kay ang katilingban puno sa kaugtas ug kangitngit. Gusto ko nga ang akong mga anak mahisama niini nga tawo nga hayag ang ilang panagway, nagsangyaw og hingpit nga kalipay ngadto sa uban nga anaa sa ilang palibot.

“Usa ka adlaw ang mga misyonaryo mitudlo namo sa balaod sa ikapulo. Ang akong mga anak misulti uban sa kadasig, ‘Kinahanglang mobayad ta sa atong ikapulo, Ma.’ Nakita nako ang hugot nga pagtuo sa akong mga anak nianang higayona. Sa wala pa ko nagpasakop sa Simbahan, mitan-aw ko sa kinatibuk-ang komperensiya ug naminaw ni Presidente Russell M. Nelson nga namulong. Siya mipahibalo sa bag-ong mga templo sa tibuok kalibotan ug miingon nga ang bag-ong templo itukod sa Ulaanbaatar, Mongolia. Nalipay ko ug nakahilak, bisan kon wala ko makasabot kon ngano. Pinaagi niini nga kalipay, makaingon ko nga ang akong pagtuo ug pagpamatuod nag-uswag.”

Si Uyanga, sama sa ubang minilyon, kabahin sa mahinungdanon nga pagpundok sa Israel agi og pagpangandam sa Ikaduhang Pag-anhi ni Jesukristo. Iyang gisugdan ang iyang panaw subay sa dalan sa pakigsaad ug nahimong usa ka disipulo ni Kristo. Unsa ang ipasabot nga mahimong usa ka disipulo ni Kristo? Nakadayeg ko sa Japanese nga pulong alang sa disipulo—deshi—de nagpasabot manghod nga lalaki, ug shi nagpasabot nga anak.

Si Jesukisto namahayag, “Ako diha na sa sinugdanan uban sa Amahan, ug ako mao ang Unang Natawo.” Tungod sa kon si kinsa gayod Siya ug sa unsay Iyang nahimo, kita nagsimba Kaniya, kita nagtahod Kaniya, kita naghimaya Kaniya, ug kita nagsunod Kaniya. Si Kristo mitubos nato, ug kita mapasalamaton sa kahangtoran alang sa Iyang walay kinutoban ug maulaon nga sakripisyo.

Kita adunay Langitnong Amahan, kinsa nahigugma nato isip Iyang mga anak. Ang Iyang gugma alang nato hingpit. Si Jesukristo ug ang Iyang misyon nagpakita sa gugma sa Dios alang nato. Sama sa gisulat ni Juan, “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon.”

Sa atong tinguha nga makasabot sa unsay wala nato mahibaloi, tingali usahay mosalig kita sa atong pamilyar nga mortal nga mga kasinatian, o mga butang nga atong nahibaloan gayod. Pananglitan, kita medyo makakat-on bahin sa Dios pinaagi sa atong kaugalingong pagkaginikanan ug mortal nga mga relasyon sa pamilya. Pero, kinahanglang mag-amping kita sa paggamit niini nga mga pagtandi nga layo na kaayo tungod sa atong pagpaninguha sa pagsabot sa atong Langitnong Amahan. Ang mga kinaiya sa Dios nga Amahan lapas pa sa bisan unsang dili kaayo hingpit nga mga kinaiya sa usa ka tawong napukan tungod sa sala. Ang Dios nga Amahan mao ang hingpit nga Amahan. Siya hingpit nga mahigugmaon, mabination, mapailobon, ug masinabtonon, ug hingpit nga mahimayaon. Kita makasalig Kaniya sa hingpit. Ang gugma ni Kristo nagpakita sa gugma sa Dios nga Amahan ug nagrepresentar niana nga gugma.

Si Jesukristo mao ang ehemplo ug pamaagi. Diha kang Kristo, mas masabtan nato ang hingpit nga mga kinaiya sa Amahan ug ang Iyang plano. Pinaagi ni Kristo, kita gihatagan sa makaabag nga gahom aron mabuntog ang kalagmitan sa kinaiyanhon nga mga lalaki ug mga babaye aron kita mas mahisama sa Amahan.

Sama sa atong Langitnong Amahan, si Jesukristo hingpit nga maluluy-on ug makiangayon. Kining balaanon nga mga kinaiya sa kaangayan ug kaluoy wala magsumpaki. Kini nagkauyon. Ang kaangayan ug kaluoy nagpakita sa hingpit nga gugma sa Dios alang sa Iyang mga anak. Makasalig kita sa Dios nga Amahan ug ni Jesukristo tungod kay Sila makiangayon ug patas natong tanan.

Ang Dios nga Amahan ug ang Iyang Anak, si Jesukristo hingpit nga nahiusa diha sa katuyoan ug gugma. Tungod kay ang Dios ug si Jesukristo nahigugma nato, gihatagan kita og oportunidad ug pribilihiyo isip tinuod nga mga disipulo sa paghimo og mga pakigsaad uban Kaniya. Sa atong pagbuhat sa ingon, ang atong relasyon uban kang Kristo milambo, “Ug karon, tungod sa pakigsaad diin kamo nakahimo kamo pagatawgon nga mga anak ni Kristo, iyang mga anak nga lalaki, ug iyang mga anak nga babaye; kay tan-awa, niining adlawa siya sa espirituhanon nga paagi nanganak kaninyo; kay kamo nag-ingon nga ang inyong mga kasingkasing nausab pinaagi sa hugot nga pagtuo diha sa iyang ngalan; busa, kamo natawo kaniya ug nahimo nga iyang mga anak nga lalaki ug iyang mga anak nga babaye.”

Isip mga disipulo, kon kita mohimo ug motuman sa sagrado nga mga pakigsaad, kita panalanginan og espirituwal nga gahom. Kita makonektar ngadto kang Kristo ug sa Dios nga Amahan sa espesyal nga relasyon ug makasinati sa Ilang gugma ug hingpit nga kalipay sa gidak-on nga gitagana alang niadtong naghimo ug nagtuman sa mga pakigsaad. Ang atong abilidad sa pagbati sa hingpit nga gidak-on sa gugma sa Dios, o sa pagpadayon diha sa Iyang gugma, nagdepende sa atong matarong nga mga tinguha ug mga binuhatan.

Sa Juan kapitulo 15, bersikulo 9, mabasa nato, “Nahigugma ako kaninyo ingon nga ang Amahan nahigugma kanako.” Ug dayon mihatag nato og imbitasyon: “Pabilin kamo sa akong gugma.”

Diha sa sunod nga bersikulo, gihatagan kita og paagi sa pagpadayon diha sa Iyang gugma: “Kon tumanon ninyo ang akong mga sugo, magpabilin kamo sa akong gugma; sama nga Ako nagtuman sa mga sugo sa akong Amahan, ug nagpabilin sa Iyang gugma.”

Dayon atong makita ang katuyoan sa pagsunod sa mga sugo diha sa bersikulo 11: “Gisultihan ko kamo niini aron mabatonan ninyo ang akong kalipay ug mahingpit ang inyong kalipay.”

Pinaagi sa tinuod nga pakigsaad sa pagkadisipulo, kita mahimong magsugod sa pagsabot sa kinaiya sa Dios ug sa hingpit nga kalipay nga gusto Niya nga masinati sa Iyang tanang anak. Kita usab mahimong magsugod sa pagsabot sa pipila ka baroganan nga sa sinugdanan murag makalibog. Pananglitan, sa unsang paagi nga ang Dios adunay hingpit nga kalipay nga ang pipila sa Iyang mga anak hilabihan man nga nag-antos? Ang tubag makita diha sa hingpit nga panglantaw sa Dios ug sa Iyang hingpit nga plano. Siya nakakita nato gikan sa sinugdanan ngadto sa atong mahimayaong potensyal nga umaabot. Siya mihatag og paagi, pinaagi sa Iyang Anak, si Jesukristo, alang natong tanan, Iyang mga anak, aron mabuntog ang kasakitan, pag-antos, mga sala, kahasol, ug kagul-anan sa pagkamortal. Ang Dios naghatag nato og paagi ug pagpili.

Ang mga ehemplo niadtong nakasinati og hingpit nga kalipay pinaagi sa pagkadisipulo mahimong makatabang nato nga mas makasabot niini nga konsepto. Tingali nakadungog kamo sa hugpong sa mga pulong nga kita ingon lamang ka malipayon sama sa atong labing masulub-on nga anak. Nakita nako nga dili kinahanglan nga maingon niini ang sitwasyon. Ang akong 94 anyos nga apohang babaye adunay sobra sa 200 ka buhi nga kaliwatan. Moabot ang panahon, labing menos usa sa 200 ang mahimong masulub-on. Kon kini nga pamahayag tinuod, ang akong inahan maanaa sa walay kataposan nga kahimtang sa pagkamasulub-on, nga siya dili man. Kadtong nakaila niya nasayod kon unsa siya ka malipayon.

Karon gusto kong mopakigbahin og laing kasinatian. Niadtong Enero 2019, ang akong asawa, si Debbie, ug ako gidapit ngadto sa opisina ni Presidente Nelson. Iyang gibutang ang lingkoranan sa among duol, ug naglingkod kami nga hapit mag-abot ang among mga tuhod. Human mihatag namo sa among kasamtangan nga calling, si Presidente Nelson milingi kang Debbie ug mipunting ngadto kaniya. Siya mabination, mahigugmaon, malumo, ug puno sa kalipay, sama sa hingpit nga amahan ug apohan. Gikuptan niya ang kamot ni Debbie ug gipikpik kini, naghatag niya og kaseguroan nga OK ra kini ug ang among pamilya mapanalanginan. Alang namo nianang higayona murag kami ang labing importante nga mga tawo ngadto niya ug siya aduna sa tanang oras sa kalibotan alang namo. Mibiya kami nianang Biyernes sa hapon nga mibati nga adunay kaseguroan, gihigugma, ug malipayon.

Pagka-lunes nakita namo ang balita. Nianang sama nga adlaw nga si Presidente Nelson nakig-uban namo, usa sa iyang mga anak nga babaye namatay sa kanser. Nakalitan mi. Ang among mga kasingkasing napuno samtang nagbangutan kami alang niya ug sa iyang pamilya. Ang among mga kasingkasing napuno usab sa pasalamat alang sa Iyang Kristohanon nga pagtagad ngari namo samtang nagbangutan alang sa iyang anak nga babaye nga nag-antos.

Samtang namalandong kami niini nga kasinatian, nangutana kami sa among kaugalingon, “Giunsa kaha niya nga mahimong mabination kaayo, mahigugmaon, ug gani malipayon sa ingon ka lisod nga panahon?” Ang tubag mao tungod kay siya nasayod. Siya nasayod nga si Kristo nagmadaogon. Siya nasayod nga makauban niya ang iyang anak nga babaye pag-usab ug mogahin sa kahangtoran uban kaniya. Ang hingpit nga kalipay ug ang mahangtorong panglantaw nagagikan sa pagkabugkos ngadto sa Manluluwas pinaagi sa paghimo ug pagtuman sa mga pakigsaad ug pinaagi sa Kristohanon nga pagkadisipulo.

Si Presidente Nelson mitudlo: “Sama nga ang Manluluwas mitanyag og kalinaw nga ‘lapaw sa tanang pagpanabot’ [Mga Taga-Filipos 4:7], Siya usab mitanyag og gikusgon, giladmon, ug gilapdon sa kalipay nga lapas sa tawhanong pangatarongan o mortal nga panabot. Sama pananglit, daw dili posible nga mobati og kalipay kon nag-antos ang inyong anak og walay kaayohan nga sakit o kon nawagtangan kamo sa inyong trabaho o kon giluiban kamo sa inyong kapikas. Apan mao gayod kana ang kalipay nga gitanyag sa Manluluwas.”

Samtang kita naghimo ug nagtuman sa mga pakigsaad, natural lang nga molingi kita sa uban ug makabaton og tinguha nga motabang sa uban nga mobati sa dakong kalipay ug gugma nga atong gibati sa atong mga relasyon pinaagi sa pakigsaad. Mahimo kitang kabahin sa labing mahinungdanong kawsa dinhi sa yuta karon—ang pagpundok sa Israel. Makatabang kita sa pagdala sa mga anak sa Dios ngadto kang Kristo. Sama sa gitudlo ni propeta Jacob, “Ug bulahan kamo; tungod kay nagkugi kamo sa pagtrabaho uban kanako sa akong ubasan, ug mituman sa akong mga sugo, ug midala ngari kanako pag-usab sa kinaiyanhon nga bunga, …makaangkon kamo og kamaya uban kanako tungod sa bunga sa akong ubasan.”

Samtang naningkamot kita sa atong kaugalingon nga molihok isip mga disipulo sa pakigsaad, diha sa bisan unsa nga ang-ang sa atong kapasidad, ang atong relasyon ngadto sa Amahan ug sa Anak mapalambo, ug ang atong kalipay mapauswag, ug ang atong mahangtorong panglantaw mapalapdan. Dayon kita tugahan og gahom ug mobati sa hingpit nga kalipay sa gidak-on nga gitagana alang sa tinuod nga mga disipulo sa pakigsaad sa Dios. Sa sagradong ngalan ni Jesukristo, amen.