Hugot nga Pagtuo: Usa ka Kasabotan sa Pagsalig ug Kamaunongon
Ang hugot nga pagtuo motubo samtang kita mosalig kang Jesukristo ug mamulak samtang kita magmatinud-anon ug magmaunongon ngadto Kaniya.
Sa nag-edad ko og 17, mihimo ko og kasabotan sa akong higala nga si José Luis sa pagtudlo kaniya kon unsaon sa paglangoy. Mao nga usa ka buntag mihatag kami og panahon sa pagbansay. Sa dihang ang among leksiyon nahuman na ug mibiya nako sa pool, nakadungog ko sa akong higala nga nagsinggit alang sa tabang. Nalumos siya diha sa lalom nga bahin sa pool.
Ako daling milayat ngadto sa tubig ug milangoy padulong ngadto kaniya samtang nag-ampo alang sa tabang. Samtang akong gikuptan ang iyang kamot aron birahon siya pasaka sa ibabaw, ang akong desperado nga higala mikapyot sa akong bukobuko ug hugot kaayong mikupot sa akong liog nga natuok ko. Karon kaming duha nangalumos. Naningkamot sa akong labing maayo aron makaabot sa ibabaw, ako nag-ampo uban sa akong tibuok nga kusog alang sa usa ka milagro gikan sa Dios. Dayon, hinay-hinay apan makanunayon, ang gahom sa Dios nagpakita samtang mibati ko og kamot nga nagduso kanako paingon sa mabaw nga bahin sa pool, nagdala kanamo ngadto sa kaluwasan.
Kini nga kasinatian mikompirmar og mahinungdanon nga leksiyon nga gitudlo kaniadto ni Presidente Russell M. Nelson, “Kon mokab-ot kamo alang sa gahom sa Ginoo diha sa inyong kinabuhi uban sa samang paningkamot sa tawo nga hapit na malumos nga naningkamot nga makaginhawa, ang gahom gikan ni Jesukristo inyong maangkon.”
Minahal nga mga bata ug mga batan-on, karon gusto kong makig-istorya kaninyo mahitungod sa mahinungdanon nga baroganan sa hugot nga pagtuo diha ni Jesukristo.
Ang Hugot nga Pagtuo diha ni Kristo Nagpasabot og Pagsalig Kaniya
Unsa man ang buot ipasabot sa pagbaton og hugot nga pagtuo diha ni Jesukristo? Nagpasabot ba kini nga kita motuo Kaniya o adunay pagpamatuod nga Siya tinuod? Kana tingali usa ka sinugdanan, apan kini labaw pa gayod niana. Nakahunahuna ba kamo sukad sa hugot nga pagtuo isip pagsalig? Hunahunaa ang tawo nga imong gisaligan pag-ayo—tingali usa ka sakop sa pamilya o usa ka higala. Nganong gisaligan ninyo sila? Tingali tungod kay kamo nakakita sa ilang kanunay nga gugma ug tabang.
Kon kita adunay hugot nga pagtuo kang Kristo, atong maila ang Iyang mga panalangin ug makapalambo og relasyon sa pagsalig ngadto Kaniya.
Unsaon Ninyo sa Pagpalambo sa Inyong Pagsalig diha ni Kristo?
Sa usa ka bag-ohay lang nga debosyonal sa kabatan-onan, gidapit kamo nga pamalandongan ang usa ka panahon sa inyong kinabuhi dihang nakadawat kamo og langitnong bidlisiw sa kahayag. Sulayi kini nga buhat!
Pagsugod pinaagi sa pagpamalandong mahitungod ni Kristo ug sa kalipay nga gidala sa Iyang Pag-ula ug ebanghelyo nganha sa inyong kinabuhi. Usab, paghimo og rekord sa “mga espirituhanong panumdoman nga angay hinumdoman” diin ang Dios anaa alang kaninyo, sa inyong mga minahal, ug alang sa mga tawo diha sa mga kasulatan. Karon, kini nga mga pagpamatuod dili magdala og gahom sa inyong kinabuhi hangtod ang Espiritu mokulit niini diha sa “mga papan” sa inyong kasingkasing. Busa pamalandongi ug irekord ang tanan nga gitakda sa Dios alang niini nga mga milagro nga moabot sa tukma gayod nga panahon.
Sunod, gamita kini nga buhat isip usa ka oportunidad sa pagpaduol ngadto sa Dios. Pag-ampo ngadto sa inyong Langitnong Amahan ingon og kini mao ang unang higayon. Ipahayag ang inyong gugma ug pasalamat alang sa Iyang mga panalangin. Pangutan-a pa gani Siya unsa ang Iyang gibati mahitungod kaninyo ug mahitungod sa direksiyon nga gipadulngan sa inyong kinabuhi.
Kon kamo sinsero ug mapaubsanon, madungog ninyo ang Iyang tubag ug magsugod sa usa ka personal ug malungtaron nga relasyon ngadto sa Langitnong Amahan ug ni Jesukristo. Dili lang kana, kondili ang inyong relihiyoso nga mga naandan mahimong makahuloganon! Sama pananglit, magmahinamon kamo sa inyong mga pag-ampo, personal nga pagtuon, ug pagsimba sa templo isip mga oportunidad nga makaila Kanila ug makauban Kanila.
Ang Hugot nga Pagtuo Molambo uban ang Pagkamaunongon
Timan-i nga ang hugot nga pagtuo motubo samtang kita mosalig kang Jesukristo ug mamulak samtang kita magmatinud-anon ug magmaunongon ngadto Kaniya. Kon gusto kamo og tinuod nga relasyon kang Kristo, ipakita Kaniya pinaagi sa paghimo og mga pakigsaad ug pagpasidungog kanila uban sa pagkamatinud-anon ug pagkamaunongon. Ang paghimo og mga pakigsaad ngadto ni Jesukristo makapalig-on sa paglaom. Ang pagpasidungog kanila makapalig-on sa hugot nga pagtuo.
Tugoti ako sa paggamit sa usa ka personal nga ehemplo: Sa dihang bata pa ko, nakit-an nako ang akong inahan usa ka adlaw nga naghilak nga nag-inusara. Dihang gipangutana nako siya kon ngano, malumo siyang miingon, “Gikinahanglan ko ikaw nga mahimong usa ka maayong bata.” Bisan tuod ako nasayod nga dili ako ang hinungdan sa iyang kagul-anan, ako nahigugma ug misalig sa akong inahan nga walay sama ug gusto nga mohimo sa iyang kinabuhi nga dili kaayo lisod. Mao nga, uban sa mga luha sa akong mga mata ug uban sa tanan nga kaseryoso nga mahimo sa usa ka nuybe anyos, ako misaad kaniya niana nga adlaw nga ako sa kanunay maningkamot nga mahimong labing maayo nga anak nga lalaki ug mohimo kaniya nga mapasigarbohon kanako.
Mahunahuna ba ninyo ang gahom niana nga saad kaniadto—ug anaa pa gihapon—dinhi kanako?
Kana nga saad ngadto kaniya mogiya sa akong kinabuhi. Sa dili pa mohimo og mga desisyon, akong hunahunaon kon ang akong mga lihok makapahimuot ba kaniya. Ang kasabotan niini nga saad ug ang relasyon uban sa akong inahan mao ang mga angkla alang sa akong pamatasan sa tibuok nakong kinabuhi.
Paglabay sa katuigan, samtang mas nakaila ko ni Jesukristo, nahibalo na ko kon unsaon sa pagbase sa akong hugot nga pagtuo diha Kaniya. Ako mihimo og mga pakigsaad ngadto sa Ginoo, ug samtang ako nagtinguha sa pagtahod niini, Siya mipasaylo sa akong mga sala, migiya sa akong kinabuhi, ug “gipuno niya ako sa iyang gugma” ngadto sa kinauyokan sa akong pagkatawo. Si Kristo misilsil ngari kanako og lawom nga gugma, pagtahod, ug pagkamaunongon alang Kaniya.
Nakasabot ba kamo nganong “ang hugot nga pagtuo usa ka baroganan sa paglihok” ug nga “kon walay pagtuo dili gayod mahimo ang pagpahimuot [sa Dios]”?
Samtang kamo mosulay sa pagbuhat sa unsay makapahimuot Kaniya, kamo moingon, sama ni Jose sa Ehipto sa dihang siya gitintal sa asawa ni Potipar, “Busa unsaon ko paghimo kining dakong pagkadaotan, ug makasala batok sa Dios?” Ug kon mag-atubang og oposisyon, kamo moingon, sama sa batan-ong Propeta Joseph, “Ako nasayod niini, ug ako nasayod nga ang Dios nasayod niini, ug ako dili makalimod niini … ako nasayod nga ang pagbuhat sa ingon ako makasala sa Dios.”
Mao nga ang hugot nga pagtuo diha ni Jesukristo usa ka kasabotan sa pagsalig nga giumol sa pagkamaunongon ug gugma. Sa laing pagkasulti, agi og pasalamat sa maluluy-ong gugma sa Dios (hesed), atong gipakita ang atong maunongong gugma (emunah) pinaagi sa pagtuman sa Iyang mga sugo.
Si Kristo nagsaad, “Ang nagabaton sa akong mga sugo ug nagatuman niini … pagahigugmaon sa akong Amahan, ug ako mahigugma kaniya ug magapadayag sa akong kaugalingon ngadto kaniya.” Kon mopasalig kamo nga magmaunongon ngadto Kaniya, Siya mopakita sa Iyang gugma alang kaninyo.
Hugot nga Pagtuo kon Mag-atubang og Kalisdanan
Apan unsaon man ninyo sa pagtubag nianang makadaot nga mga sitwasyon nga nagkinahanglan sa Iyang mga milagro? Samtang ang mga hagit dili kalikayan ug usahay makahadlok, padayon lang nga walay kahadlok paingon ngadto Kaniya, sama sa gidapit sa tema sa 2025 nga FSY nga komperensiya: “Tan-aw ngari kanako sa matag hunahuna; ayaw pagduhaduha, ayaw kahadlok.”
Unsaon Man Ninyo nga Mopadayon nga Walay Kahadlok Paingon Ngadto Kaniya?
Handurawa nga kamo usa ka eksplorer diha sa usa ka dili pamilyar nga teritoryo. Aron mabuntog ang mga babag sa unahan, nagkinahanglan kamo og usa ka tinubdan sa kahayag. Ang inyong pagkamatinud-anon ngadto sa Dios ug ang inyong kanunay nga pakig-uban Kaniya mao ang gas alang sa inyong lampara. Busa kon makasugat kamo og ngitngit ug makuyaw nga mga sitwasyon, imbes nga molakaw padulong niini nga walay makita, inyong pasigahon ang inyong lampara nga puno sa lana sa hugot nga pagtuo kang Kristo aron sa paghatag og gamay nga mga timailhan sa paglaom diha sa dili sigurado nga dalan. Ang inyong nangagi nga mga kasinatian makadugang sa inyong paglaom nga ang Ginoo mopaluyo kaninyo sa inyong panaw.
Unsa ka Dako ang Inyong Pag-uswag uban sa Inyong Paglaom ug Hugot nga Pagtuo diha ni Kristo?
Nahinumdom mo sa akong istorya diha sa pool? Niana nga higayon sa pagkawalay paglaom, ang milagro miabot sa paagi nga akong gilaoman, apan ang Dios wala maggarantiya nga kini kanunay nga sumala sa atong kabubut-on. Ang atong hugot nga pagtuo kinahanglan nga nakasentro diha ni Kristo ug ang atong paglaom diha sa Iyang mga panalangin, ingon nga Siya mopili sa pagpadala niini. “Laomi ang mga milagro,” apan “ipatigbabaw ang Dios labaw sa tanan diha sa atong mga kinabuhi.”
Ang mga Saad sa Dios ngadto sa Iyang Matinud-anong Katawhan
Akong batan-ong mga higala, unsa ka dako ang among paghigugma ug pagsalig kaninyo! Kamo nahisakop sa pamilya sa Dios ug mga anak sa pakigsaad. Tuohi ug saligi si Jesukristo. Siya makapahimo kaninyo nga tinud-anay nga mamahimo nga Iyang mga disipulo.
Ako modapit kaninyo sa pagsugod karon sa pag-amuma sa inyong relasyon ni Jesukristo. Paghimo og pasalig nga dili gayod mobiya Kaniya.
Ang inyong pagkamaunongon, gugma, ug pagsalig kang Kristo mohulma sa inyong kinaiya ug pagkatawo sunod sa Iyang kinaiya. Kamo makaangkon og pagsalig ug kalig-on aron mabuntog ang mga pag-atake ni Satanas. Ug kon kamo makahimo og mga sayop, kamo magtinguha alang sa Iyang kapasayloan. Sa kataposan, ang inyong paglaom alang sa umaabot mahimong hayag. Siya mosalig kaninyo sa Iyang gahom sa pagtuman sa bisan unsa nga Iyang gidahom gikan kaninyo, gani ang gahom sa pagbalik ngadto sa Iyang presensya.
Ako mopamatuod kaninyo sa hingpit nga kalipay nga nagagikan sa pagkanta sa “awit sa matubsanon nga gugma” ug sa pagkahimong “gigakos … sa kahangtoran sa mga bukton sa iyang gugma.” Sa sagradong ngalan ni Jesukristo, amen.